Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Nobiembre 2012

Agpatulongka iti Dios

Agpatulongka iti Dios

Agpatpatulongka kadi ken Jehova iti panangpadakkelmo iti annakmo?

“Idi pinanawannakami nga agiina ni lakayko, inyararawko iti Dios a tulongannakami. Sinungbatanna ti kararagko. Saankami a nagkurang iti aniaman a kasapulanmi. Tinulongan ken inwanwannakami.”—MAKI, JAPAN.

UMAD-ADU itan ti materialistiko a tattao isu a manmanon ti mangikabkabilangan iti Dios. Ngem interesado kadatayo ti Namarsua ken kayatna nga agballigitayo iti biag. Nagsayaat ti pannakayebkas ti riknana iti Isaias 41:10: “Dika agbuteng, ta addaak kenka. . . . Pudno a tulongankanto.”

Iti napalabas nga artikulo, naammuantayo no kasano a tultulongannatayo ti Dios babaen kadagiti nasayaat a prinsipio iti Biblia. (2 Timoteo 3:16) Ngem ti Biblia ket saan la a basta mangiwanwan. Isursurona met ti nagsayaat a personalidad ti Dios ken ti ayatna kadatayo. Kas napaneknekanen ti adu a Kristiano a nagannak—agsolsolo man wenno saan—aktual a mapasarantay ti kinaimbag ti Dios no iyaplikartayo dagiti pannursuro ti Biblia.

Robert, Austria: “Ni Jehova a Dios ti kasayaatan nga ama wenno ina. Ammona ti kasapulan dagiti annaktayo, ken ammona no kasano a salakniban ida, isu a kanayon nga agkararagkami nga agama kenkuana.”

Ayusa, Japan: “Maragsakanak a makakita nga agtaltalek ti anakko iti tulong ni Jehova no ibagana, ‘Kaduata ni Jehova isu nga awan rumbeng a pagdanaganta.’”

Cristina, Italy: “No kasla diak kabaelan a solbaren ti maysa a problema, agkararagak ken Jehova, ket ipabiangko daytan kenkuana. Insigida a tumalged ti riknak ta ammok a masolbarto met laeng dayta iti kasayaatan a pamay-an.”

Laurentine, France: “Mapaneknekak a bembendisionannak ni Jehova kas agsolsolo a nagannak. Talaga a sarsaranayenna dagiti marigrigatan, agraman dagiti awanan iti amma wenno inna.”

Keiko, Japan: “Saan a mangidumduma ti Dios. Kayatna nga ipakita ti nadungngo a pannakaseknanna iti amin a pamilia, kompleto man ti nagannakda wenno saan.”—Aramid 10:34.

Gapu ta tultuladenna ti kinadungngo ken pannakaseknan ti Dios kadatayo, naikuna ni Jesu-Kristo: “Umaykayo kaniak, dakayo amin a mabambannogan ken madagdagsenan, ket pagin-awaenkayto . . . , ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mateo 11:28-30) Talaga nga iparparikna ni Jesus ken ti nailangitan nga amana a ni Jehova a natalgedtayo iti sidong ti naayat a panangaywanda. Mabasatayo iti Salmo 34:8: “Nanamenyo ken kitaenyo a ni Jehova naimbag.” Wen, kayat ti Dios a makitam a mismo nga epektibo dagiti balakadna, ken bin-ig a ti pagsayaatanyo ti pampanunotenna. Awatem kadi ti nadungngo nga awisna?