Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2012

 Agimtuod Dagiti Agtutubo

Ania ti Manamnamak Inton Addan Asawak?—Paset 2

Ania ti Manamnamak Inton Addan Asawak?—Paset 2

ITI NAPALABAS A RUAR, inusigtayo ti dadduma kadagiti pagimbagan ken problema a manamnamam iti panagasawa.

ITI DAYTOY A RUAR, pagsasaritaantayo no apay a nasken a namnamaem dagiti dimo ekspektaren.

Tsekam ti kahon a napilim sa numeruam dagiti tsinekam sigun iti kapategda kenka.

Ekspektarek a ti agbalinto nga asawak ket . . .

  • guapo wenno napintas
  • mapapigsana ti kompiansak iti bagik
  • agpadakami kadagiti plano
  • agparehokami kadagiti magusgustuan a paglinglingayan

 No agsapsapulka iti agbalin nga asawam, awan pagdaksanna no kasta dagiti ekspektarem. Nalabit addanto pay ketdi maam-ammom nga addaan iti amin kadagita. Ngem kinaagpaysuanna, agbalbaliw dagiti tattao ken uray dagiti kasasaad bayat ti panaglabas dagiti tawen.

Laglagipem: Tapno agballigi ti panagasawam, masapul a namnamaem dagiti dimo ekspektaren.

Ti nasayaat a damag. Ti dadduma a di ninamnama nga aspeto ti panagasawa ket mabalin a dumteng kas makaay-ayo a sorpresa.

“Ita ta agassawakamin, mas maapresiarkon ti kinaangaw ni Maria * ngem idi nobiak pay laeng. Gapu ta mas balansen ti panangmatmatmi iti bagimi, kasla saan unayen a nadagsen dagiti problema a pakaipaspasanguanmi.”—Mark.

Ti saan unay a nasayaat a damag. Mabalin a di makaay-ayo ti dadduma a di ninamnama nga aspeto ti panagasawa. Usigem daytoy a pagarigan.

Ipapantayon a panggepyo iti agbalinto nga asawam ti agmisionero iti sabali a pagilian. Ngem kasanon no kalpasan ti kasar ket nagsakit iti grabe ti asawam isu nga imposiblen a matungpal ti panggepyo? Kinaagpaysuanna, posible a mapasamak dayta ta kuna ti Biblia a “ti di mapakpakadaan a pasamak mapagteng kadakuada amin!” (Eclesiastes 9:11) Sigurado a madanaganka iti kasasaad ti asawam—ken madismayaka ta saanen a matungpal ti planoyo. Ngem no rumsua ti kasta a di ninamnama a kasasaad, masapul nga akseptarem laengen dayta ken makibagayka. Total, ti nakiasawaam ket maysa a tao, saan a maysa a panggep.

Laglagipem: Kas kuna ti Biblia, dagidiay makiasawa ket makapasar iti “rigat.” (1 Corinto 7:28) No dadduma, agtaud dayta kadagiti di ninamnama a kasasaad.

Kasanom a masaganaan ti dimo ninamnama? No agasawaka, kasapulam ti dua a banag.

1. REALISTIKO A PANANGMATMAT

Uray agkatunosankayo iti agbalinto nga asawam, rumbeng a namnamaem a

  •   saanto a kanayon nga agpadakayo nga umanamong iti amin a banag.
  • saanto a kanayon nga agpada dagiti prioridadyo.
  • saanto a kanayon nga agpareho dagiti magusgustuanyo nga aktibidad.
  • saanto a kanayon a nakaromromantiko ti ayan-ayatyo.

Gagangay dagiti situasion a kas kadagita a nadakamat. Ngem dida madadael ti panagasawam no dimo ipalubos! Laglagipem ti kuna ti Biblia a ti ayat “ibturanna ti amin a bambanag” ken “saan a pulos aggibus.”—1 Corinto 13:4, 7, 8.

Realidad: Inton agangay, ti mamagballigi wenno mangdadael iti panagasawayo ket saan a dagiti pakaipasanguanyo a problema no di ket no kasanoyo a solbaren dagita.Colosas 3:13.

2. AGBALINKA A MATALEK ITI ASAWAM

No determinadokayo nga agassawa a dikay agsina, uray aniaman ti mapasamak, mas kabaelanyo a solbaren dagiti diyo ninamnama a problema.—Mateo 19:6.

Kuna ti dadduma a ti panagbalin a matalek iti asawa ket makapadagsen laeng iti panagasawa. Ngem kinaagpaysuanna, dayta ti mangpatibker iti relasionyo! No dumteng dagiti di ninamnama a problema, agtinnulongkayo a mangbirok kadagiti solusion, imbes nga ipamuspusanyo ti agsina.

Tapno agtalinaedka a matalek iti asawam, masapul a panunotem nga addanto la nga adda ti rumsua a problema iti panagasawayo imbes nga ibilangmo nga awanto pulos ti parikut a mapasaranyo. Kas panangyilustrar, padasem daytoy.

1. Ipapanmo nga adda libre a tiketmo iti eroplano tapno makapanka iti sadinoman a lugar iti lubong. Sadino ti kayatmo a papanan, ken apay?

Lugar:

Rason:

  • aglawlaw
  • kultura
  • klima
  • paglinglingayan
  • dadduma pay

2. Panunotem a ti tiketmo iti eroplano ket agpapan laeng ken permanenten nga agnaedka iti papanam.

Ita, ania a lugar ti piliem a papanan—no adda man?

  • Lugar:
  • wenno agtalinaedak lattan iti ayanko.

Iti nadakamat nga ilustrasion, nalabit agduma ti dua a lugar a pinilim. Uray no agpadada, posible a naiduman ti kapanunotam maipapan iti maikadua a pinilim. Imbes nga ibilangmo ti bagim kas maysa a bakasionista nga agrelrelaks iti igid ti baybay wenno umul-uli iti bantay, masapul a panunotem a kaska la iti maysa a residente nga inaldaw a makapaspasar kadagiti pagimbagan ken problema iti biag.

Kasta ti masapul a panunotem maipapan iti panagasawa. Ngamin, mabalin nga agbalbaliw dagiti kasasaad iti panaglabas ti tiempo. Sigurado a mapadasanyonto met dayta nga agassawa. Kaaduan iti balligim ket agpannuray iti abilidadmo nga agsagana kadagiti kasasaad a dimo ninamnama ken mangaramid iti umiso no rumsua dagita.

Panunotem daytoy: Ita ta awan pay asawam, kasano kaballigi ti panangsangom kadagiti di ninamnama a situasion iti biag?

^ par. 15 Nabaliwan ti dadduma a nagan iti daytoy nga artikulo.

DAMAGEM KADAGITI NAGANNAKMO

Ania dagiti di ninamnama a bendision nga inawatyo ken problema a nakaipasanguanyo idi kakaskasaryo? Kasano a masaganaak dagiti di ninamnama a situasion inton addan asawak?