Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Oktubre 2012

 Ti Panangmatmat ti Biblia

Ap-apektaran Kadi Dagiti Bituen ti Biagmo?

Ap-apektaran Kadi Dagiti Bituen ti Biagmo?

Ay-ayatennak ngata?

Rumbeng ngata nga agbiaheak ita?

Makastrekak ngata iti dayta a trabaho?

TAPNO masungbatan dagita a saludsod, adu ti agkonsulta iti astrolohia. * Ngem talaga kadi nga ap-apektaran dagiti bituen ti biagmo? Matulongandaka kadi dagita a mangammo maipapan iti masakbayam, wenno maipapan iti bagim? Ania ti kuna ti Biblia?

Maimpluensiaan Kadi Dagiti Bituen ti Masakbayantayo?

Patien ti dadduma a ditay mabalinen a liklikan ti naikeddeng a gasattayo. Kunada a naisuraten ti masakbayantayo ken kabaelan dayta nga ipalgak dagiti bituen. Ngem naiduma ti ibagbaga ti Biblia. Kunana a ti Dios impaayanna dagiti tattao iti wayawaya nga agpili. Kaipapanan dayta nga adda maaramidanda a mangkontrol iti mapasamak kadakuada. Kas pagarigan, kinuna ti Dios kadagiti Israelita: “Inkabilko ti biag ken patay iti sangom, ti bendision ken ti lunod; ket masapul a piliem ti biag tapno makapagtalinaedka a sibibiag, sika ken ti putotmo.”—Deuteronomio 30:19.

Babaen kadagita a sasao, imbatad ni Jehova a Dios iti ilina a dakkel ti maaramidanda a mangkontrol iti masakbayanda. No tungpalenda dagiti  bilinna, masagrapda dagiti bendision. No sumukirda, agsagabada.

Usigem: No naisuraten kadagiti bituen ti masakbayan ti tunggal Israelita, adda kadi pay serbina ti panangibaga kadakuada ti Dios a pilienda ti biag? Nainkalintegan kadi a panungsungbatenna ida kadagiti aramid a saanda met a kontrolado?

Nalawag ti isursuro ti Biblia: Ti pagbanagan ti biagtayo ket agpannuray kadagiti desisiontayo—saan a kadagiti bituen.—Galacia 6:7.

Maimpluensiaan Kadi Dagiti Bituen ti Personalidadtayo?

Kaaduan nga astrologo ti saan nga interamente a mamati iti pannursuro ti predestinasion wenno naikeddeng a pagtungpalan. “Datayo met laeng ti mangiturturong iti gasattayo,” kinuna ti maysa kadakuada, ngem intuloyna: “Nupay kasta, ti aldaw ti pannakayanaktayo apektaranna ti pakabuklan ti personalidadtayo.” Kasta met la ti patien ti adu a tattao. Patienda a gapu ta dagiti bituen ken planeta ket adda makita nga epektoda iti dagatayo, adda la ketdi datdatlag nga epekto dagita kadatayo. Ngem ania ti isursuro ti Biblia?

Ti Biblia ket saan a libro ti siensia a mangidetalye iti amin maipapan iti bagi ti tao ken iti uniberso. Ngem mailawlawagna no apay a pinarsua ni Jehova dagiti bambanag iti law-ang. Mabasa iti Genesis 1:14, 15: “Imbilin ti Dios, ‘Agparang dagiti silaw iti tangatang tapno paglasinenda ti aldaw ken ti rabii, ken tapno ipakitada ti pangrugian dagiti tiempo, aldaw ken tawen . . . tapno lawaganda ti daga.’”—Ti Baro a Naimbag a Damag Biblia.

Usigem: No inranta a pinarsua ti Dios dagiti bituen tapno impluensiaanda ti personalidadtayo, saan kadi a rumbeng koma nga imbaga ti Dios dayta kadatayo?

Ania ti konklusiontayo? Dagiti bituen ket karaman kadagiti pinarsua ti Dios ngem dida impluensiaan ti personalidadtayo.

Mapagtalkan a Pagpaiwanwanan

No kayattayo a maammuan ti maipapan iti masakbayantayo wenno maawatan ti bagitayo, nasayaat dayta. Ngem adda mapagtalkan a pagpaiwanwanan imbes a dagiti bituen.

Iti Biblia, nailadawan ni Jehova a Dios kas “Daydiay a manipud punganay ibagbagana ti pagnguduan.” (Isaias 46:10) Adda panggepna a sigurado nga itungpalna. (Isaias 55:10, 11) Maammuantayo ti panggep ti Dios no basaentayo ti Biblia. Dayta a nagkauna a sagrado a libro ilawlawagna met no apay nga agsagsagabatayo ken no kasano a pagpatinggaento ti Dios dagiti mismo a kasasaad a mangparparigat iti sangatauan. *2 Pedro 3:13; Apocalipsis 21:1-4.

Tapno maammuantayo ti maipapan iti bagitayo ken no kasano a mapasayaattayo dayta, ti Biblia ti kasayaatan a pagpaiwanwanan. Apay? Agsipud ta ti panangbasa iti dayta ti tumulong kadatayo a sipapasnek a mangsukimat iti kinataotayo. Kas pagarigan, kuna ti Biblia a ni Jehova a Dios ket “naasi,” “nabannayat nga agunget,” ken “sisasagana a mamakawan.” (Exodo 34:6; Salmo 86:5) Ngem kastatay met kadi? Maibutaktak ti Biblia dagiti di umiso a panagpampanunottayo ken matulongannatayo a mangamiris no ania dagiti nasken a parang-ayentayo.

No kasta, ditay kasapulan ti agpaiwanwan kadagiti bituen tapno maammuantayo ti masakbayan wenno ti maipapan iti kinataotayo. Tapno magun-odantayo ti mapagtalkan a panangiwanwan, nasken nga agpannuraytayo iti Biblia nga “impaltiing ti Dios ken makagunggona iti panangisuro, iti panangtubngar, iti panangpalinteg iti bambanag.”—2 Timoteo 3:16, 17.

^ par. 6 Ti astrolohia ket ti panagadal maipapan iti init, bulan, planeta, ken bitbituen a napakuyogan iti panamati a maimpluensiaandatayo dagita ken matulongandatayo a mangtarus iti bagitayo.

^ par. 19 Para iti ad-adu pay nga impormasion maipapan iti panggep ti Dios, kitaem ti kapitulo 3 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

PROGRAMA A PANAGADAL ITI BIBLIA

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?

NAIMBAG A DAMAG MANIPUD ITI DIOS

Kasanotayo a Magunggonaan Kadagiti Prinsipio ti Biblia?

Inlawlawag ni Jesus no apay a kasapulantayo ti panangiwanwan ken no ania ti dua a prinsipio ti Biblia a kapatgan.

SUNGBAT DAGITI SALUDSOD MAIPAPAN ITI BIBLIA

Naikeddeng Kadin ti Ipapataytayo?

Apay nga ibaga ti Biblia nga adda “tiempo ti ipapatay”?