Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! OKTUBRE 2012

Agbalinka nga Organisado

Agbalinka nga Organisado

Uray bassit la a panagregget ti aramidem tapno agbalinka nga organisado, adun ti magunggonam—ad-adu a tiempo, nangatngato a grado, ken dika unay mabannog.

IPAPANTAYON a napanka iti maysa a tiendaan ta adda gatangem. Ngem agkaiwara amin a tagilako. Kasano kabayag ngata a masarakam ti birbirokem? Saan kadi a nabibiit koma no naurnos dagiti tagilako ken nalawag a namarkaan dagiti nakaikabilanda? Mabalinmo met nga aramiden dayta iti panageskuelam. Kasano?

Mangaramidka iti eskediul.

“Naminsan, nalipatak nga aramiden ti homework-ko—ken dagiti trabahok iti balay—gapu ta addaak iti balay ti gayyemko iti intero a ngudo ti lawas,” kinuna ti 18 anyos a ni Zachary a taga-United States. “Iti kalunesanna, kapilitan nga impakaasik kadagiti mannursurok nga awatenda latta koma ti homework-ko uray no naladaw ti panangitedko. Ita, isursuratkon dagiti aramidek tapno diak malipatan dagiti masapul nga iringpasko.”

Kasta met ti nakatulong iti agtutubo a ni Celestine a taga-Papua New Guinea. Iti pananglagipna iti panageskuelana, kinunana: “Nakaeskediul ti amin nga aramidek, agraman dagiti homework, eksamen, ken panagaliwaksay. Gapu iti dayta, ammok dagiti ipangpangrunak ken nasapa a mairingpasko dagita.”

Balakad: Isuratmo dagiti nasken nga aramidem iti bassit a kuaderno, wenno irekordmo dagita iti selponmo wenno dadduma pay a gadyet.

Dimo itantantan.

Nalaka nga ibaga ti, “Intono kuan.” Nasaysayaat nga aramidem a dagus dagiti bambanag no posible—nangruna dagiti homework-mo.

Balakad: Dagus nga asikasuem ti homework-mo no nakaawidkan, sakbay nga agbuyaka iti TV wenno aglinglingay.

Urnosem dagiti kasapulam iti eskuelaan.

Napadasam kadin ti simrek iti klase nga awan kuadernom, ballpen, wenno librom gapu ta nalipatam? Mabalin a maliklikam dayta! Kasano? “Kanayon a nasaksakbay nga urnosek ti bagko,” kuna ni Aung Myo Myat nga agtutubo idiay Myanmar.

Balakad: Pagtalinaedem a naurnos ken nadalimanek ti bagmo tapno al-alisto a makitam ti alaem.

Laglagipem: No organisadoka, maliklikam ti mataranta gapu iti pannakalipat, pannakaladaw, ken kaawan iti umdas a tiempo para iti dadduma a napapateg nga aktibidad.

Apay a dimo rugian itan? Mangpanunotka iti maysa a kasasaad a kasapulam ti agbalin nga organisado. Kalpasanna, kaduam ti nagannak wenno gayyemmo a mangpanunot iti sumagmamano a pamay-an a makatulong kenka nga agbalbaliw.

Ammuem ti Ad-adu Pay

Kasano a Maisardengmo ti Panangitungtungkua?

Ammuem no kasano a maisardengmo ti panangitungtungkua!

Kasanok a Mairingpas Amin Dagitoy nga Asaynmentko?

Nagabsuonanka kadi? Ania ti makatulong?

No Kasano ti Kasayaatan a Panangusarmo iti Tiempom?

Ti maysa a pamay-an a mausarmo a naimbag ti tiempom ket ti panangtingitingmo iti biagmo babaen iti dua a panirigan. Ania dagita?