Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  Septiembre 2012

Panungpalan—Mabalin a Saan a Kas iti Ipagarupmo

Panungpalan—Mabalin a Saan a Kas iti Ipagarupmo

MALAKSID a negatibo unay dagita, adda tallo a nagpapadaan dagiti nadakamat a senario maipapan iti panungpalan. Umuna, naibasar dagita iti pagarup ti tattao, ket masansan nga agmintis dagiti ibagada a mapasamak iti masanguanan. Maikadua, no adda man tao a maisalakan, tsamba la no kuan dayta. Maikatlo, dagiti makalasat ket marigatan la ketdi nga agtalinaed a sibibiag.

Maisupadi iti dayta, mas rasonable ti ibagbaga ti Biblia maipapan iti masanguanan. Sigun iti dayta, sigurado nga addanto mapasamak a dakkel a panagbalbaliw. Ngem ipasiguradona nga amin a mangar-aramid iti pagayatan ti Dios ket maisalakan. Kanayonanna, saan nga ipadto ti Biblia a makset wenno agyelo ti intero a daga no di ket ibagana a mapagbalinto a paraiso dayta.

Ngem adu ti saan a mamati kadagiti kasta a padto ti Biblia. Ibilang dagiti managduadua nga arapaap laeng dagiti pannursuro ti Biblia maipapan iti dakkel a rigat, Armagedon, sangaribu a tawen, ken Paraiso. Dagita ket masansan a pagsasaritaan, pagdedebatean, ken ilawlawag dagiti teologo. Agduduma ken agsusupadi dagiti teoriada. Kinuna ti autor a ni Bruce A. Robinson maipapan iti panungpalan: “No idilig iti dadduma pay a patpatien ti Kakristianuan, posible nga ad-adun ti naisurat a di nalawag nga artikulo maipapan iti daytoy a topiko.” Ti resultana? Pannakariro.

Ngem saan a narigat a maawatan ti Biblia yantangay mensahe ti Dios dayta, ken dina kayat a marirotayo maipapan iti masanguanan. Usigem ti dadduma a saludsod a masansan a pampanunoten ti adu, a sarunuen dagiti sungbat a mismo ti Biblia. No kayatmo a maammuan ti ad-adu pay, agkiddawka iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

 Madadaelto kadi ti daga ken ti sangatauan?

“Dagiti nalinteg tagikuaendanto ti daga, ket agtaengdanto nga agnanayon iti dayta.” —Salmo 37:29.

Addanto kadi tattao a matay?

“Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”—Proverbio 2:21, 22.

Adda kadin tiempo a ti Dios dinadaelna dagiti nadangkes?

Ti Dios ket “saan a nagteppel a mangdusa iti kadaanan a lubong, ngem inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao; ket babaen ti panangpadapo kadagiti siudad ti Sodoma ken Gomorra kinondenarna ida, a nangipasdek iti pagtuladan maipaay kadagiti di nadiosan a tattao maipapan iti bambanag nga umay.”—2 Pedro 2:5, 6.

Mabalintayo kadi nga ammuen no kaano a mangukom ti Dios?

“Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama. Ta kas idi kaaldawan ni Noe, kastanto ti kaadda ti Anak ti tao. Ta kas kadakuada kadagidi nga aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.”—Mateo 24:36-39.

Adda kadi aniaman a pagilasinan nga asidegen ti panungpalan?

“Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta.”—2 Timoteo 3:1-5.

Ania ti masanguanan ti sangatauan ditoy daga?

Ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:4.

Ti Dios “punasennanto ti amin a lua kadagiti matada”

Nupay saan nga ibaga ti Biblia ti amin a mapasamak iti masanguanan, ipasiguradona kadatayo a saan a maikisap ti sangatauan. Ti masakbayantayo ket naranraniag ngem iti namnamaentayo. Makapagtalekka a talaga a pumaysonto dayta agsipud ta ti amin a kari ni Jehova a Dios ket kabaelanna met a tungpalen.

 

Ammuem ti Ad-adu Pay

NAIMBAG A DAMAG MANIPUD ITI DIOS

Ania ti Panggep ti Dios Para iti Daga?

Ilawlawag ti Biblia no apay a pinarsua ti Dios ti daga, no kaano nga agpatingga ti panagsagaba, ken no ania ti agur-uray iti masanguanan para iti daga ken dagiti agnaed iti dayta.