Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! SEPTIEMBRE 2012

Dagiti Medikal nga Alternatibo ti Panangyalison iti Dara

Dagiti Medikal nga Alternatibo ti Panangyalison iti Dara

DAGITI agdindinamag nga eksperto manipud iti nasurok nga 40 a pagilian ket nagtataripnong idiay Moscow para iti 60th Jubilee International Congress of the European Society for Cardiovascular and Endovascular Surgery idi Mayo 20-22, 2011. “Para kadagiti doktor, ti komperensia a kas iti daytoy ket kas iti kapateg ti Olympics para kadagiti atleta,” kinuna ti maysa a reporter ti TV iti Russia.

Iti uneg ti tallo nga aldaw a komperensia, adu ti napan iti maysa a booth wenno puesto a mangipaay iti impormasion maipapan kadagiti medikal nga alternatibo ti panangyalison iti dara. Dagiti kameng ti Hospital Information Services (HIS) dagiti Saksi ni Jehova ti nangasikaso iti dayta a booth. Sadiay ti sigagagar a nangalaan dagiti doktor iti ginasut a libro, DVD, artikulo maipapan iti medisina, ken folder a naglaon kadagiti impormasion mainaig iti daytoy a napateg a topiko. Nagadu ti nangala iti DVD a mangitampok iti video a napauluan iti Transfusion-Alternative Strategies—Simple, Safe, Effective. *

Dagiti kameng ti Hospital Information Services dagiti Saksi ni Jehova ti nangasikaso iti daytoy a puesto. Ditoy ti sigagagar a nangalaan dagiti doktor iti ginasut a libro, DVD, artikulo maipapan iti medisina, ken folder a naglaon kadagiti impormasion

 Adu a doktor a napan iti booth ti immanamong a nasken a malimitaran ti panagsayasay ti dara bayat ti panagopera. Adda taga-Italia a doktor nga agop-opera iti puso a nagdiskurso iti komperensia. Imbagana a pagaammona dagiti Saksi ni Jehova ken agarup 70 nga operasion iti puso ti sibaballigi a naaramidnan kadagiti Saksi a pasiente a dina inyalisonan iti dara. Kinunana pay a gagangayen a di mayalisonan iti dara dagiti maopera iti ayanna nga ospital. Maysa a propesor iti Deutsches Herzzentrum Berlin (German Heart Institute Berlin) ti nangala iti DVD para kenkuana ken iti maysa a katrabahuanna. Imbagana kadagiti nakikomperensia a nabiit pay nga inoperana ti maladaga a 2.5 la a kilo ti timbangna a dina inyalisonan iti dara; ken iti ayanna nga ospital, addan dagiti maladaga a nalaglag-an pay ngem iti dayta a naoperaandan iti puso.

Ti naballigi a panagopera a di agusar iti dara ket posible babaen kadagiti maitutop a pamay-an ti panamagdadanggay a panangusar kadagiti agas, aparato, ken teknik ti panangagas ken panagopera a manglimitar iti panagsayasay ti dara

Makabulan kalpasan ti komperensia idiay Moscow, dagiti doktor iti nadumaduma a pagilian ket immatender iti Fourth Belomorsk Symposium of Anesthesiologists and Intensive Care Physicians of the Northwest Region of Russia, iti siudad ti Arkhangel’sk. Nangipasdek ti HIS iti kasta met la a booth sadiay, ket nagadu manen ti naginteres iti dayta. Idi makitana dagiti magun-odan nga impormasion sadiay, kinuna ti maysa a doktor manipud St. Petersburg, “Daytoy a mismo ti kasapulanmi!” Imbagana a maladingitan gapu ta kas iti nakairuamandan, dadduma kadagiti padana a doktor ti mangyal-alison pay laeng iti dara kadagiti pasiente a biktima ti uram wenno pannakadilnak. “Makatulong unay dagiti impaayyo nga impormasion iti maipalplano idiay St. Petersburg a komperensia maipapan iti panangagas kadagiti pasiente a biktima ti uram wenno pannakadilnak,” siraragsak a kinunana.

Iti intero a lubong, umad-adu a doktor ti makaam-amiris kadagiti pagsayaatan ti panangagas ken panagopera a di agusar iti dara. Agbalinto ngata dagita a sangalubongan a pagannurotan iti panangagas? Panawen laeng ti makaibaga.

^ par. 3 Inaramid dagiti Saksi ni Jehova.