Mapan iti linaonna

Mapan iti listaan dagiti linaonna

 Ti Panangmatmat ti Biblia

Apay a Komendaram ti Sabsabali?

Apay a Komendaram ti Sabsabali?

ADU ti mangipagarup a di madmadlaw ti sabsabali dagiti panagreggetda. Kas pagarigan, masansan a marikna dagiti empleado a saan ida nga ap-apresiaren dagiti employerda. Adu a naasawaan ti mamati a saanda a napateg iti asawada. Pampanunoten ti dadduma nga annak a didanto pulos matungpal ti in-inanamaen dagiti nagannakda. Sigurado a maksayan dagiti kasta a rikna no kanayon a sidadaantayo amin a mangkomendar wenno mangapresiar iti maysa ken maysa.

Ita a tiempo, manmanon a makangngegtayo iti naimpusuan a komendasion. Di pakasdaawan daytoy ta impakpakauna ti Biblia: “Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, . . . saan a managyaman, saan a nasungdo.”​—2 Timoteo 3:1, 2.

Adda kadin naimpusuan a nangkomendar kenka? Ammom ngarud no kasano a makaparagsak ken makaparegta unay dayta. Kuna ti Biblia: “Ti sao iti umiso a tiempona O anian a nagsayaat!” (Proverbio 15:23) Makatulong ti Biblia tapno nasayaat ti pannakilangentayo iti maysa ken maysa.

Kitaem Dagiti Nasayaat a Galad ti Sabali

Gapu ta maseknan unay kadatayo ti Dios, kitkitaen ken ap-apresiarenna dagiti nasayaat a galad ken aramidtayo. Kastoy ti pammatalged kadatayo ti Biblia: “Mapan nga agsublisubli dagiti mata [ti Dios] iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9) No ipakitatayo ti ayattayo iti Dios babaen ti panagtulnogtayo kadagiti lintegna, sigurado a makitana dayta.

Saan a dagiti bidduttayo ti sipsiputan ni Jehova a Dios. Ta no kasta, awan siasinoman kadatayo ti makapagtakder iti sanguananna. (Salmo 130:3) Imbes ketdi, ni Jehova ket kasla minero a siaanus a mangyakyakayak iti binunton a batbato tapno makabirok kadagiti agkakapateg a saniata. Maragsakan la ketdi ti minero no makabirok iti maysa a saniata. Mabalin a kasla awan balor ti di pay natabas a bato, ngem makita ti minero ti potensial a pateg dayta. Umasping iti dayta, no sukimaten ti Dios ti pusotayo, sapulenna dagiti agkakasayaat a galad saan ket a dagiti pagkapuyantayo. Maragsakan no masarakanna dagita. Ammona a no itultuloytayo a tabasen ken pasilengen dagita a galad, agbalintayo a pudno a nakapatpateg​—maysa a matalek ken napasnek nga agdaydayaw ken Jehova.

Makasursurotayo iti ulidan ti Dios. No kitaentayo ti sabsabali, mabalin nga agannayastayo a mangipamaysa iti atensiontayo kadagiti pagkuranganda. Ngem no kitaentayo dagiti tattao kas iti panangkita ni Jehova, sapulentayo dagiti nasayaat a galadda. (Salmo 103:8-11, 17, 18) No makitatayo dagiti agkakaimbag a sagudayda, komendarantayo ida. Ti resulta? Mabang-aranda la ketdi kadagiti sasaotayo ken nalabit ad-adda pay nga ikagumaanda ti agaramid iti umiso! Maragsakantayo met gapu ta adda naitedtayo iti sabsabali.​—Aramid 20:35.

Apresiarem Dagiti Nasayaat a Maar-aramidan ti Sabali

Masansan idi a nadlaw ken inapresiar ni Jesus dagiti nasayaat nga inaramid ti sabsabali. Naminsan, adda madandanagan ken masakit a babai. Gapu ta kayatna ti umimbag, dina impadlaw a sinagid ti makinruar a pagan-anay ni Jesus. Kinomendaran ni Jesus a kinunana: “Anak, ti pammatim pinaimbagnaka.”​—Marcos 5:34.

Iti sabali a tiempo, bayat a mangisursuro ni Jesus idiay templo ti Jerusalem, nakitana ti adu a babaknang a mangipispisok iti kuarta kadagiti baul ti gameng. Kalpasanna, nakitana ti maysa a marigrigat a balo a babai a nangipisok iti “dua a babassit a sinsilio a bassit unay ti pategna.” Ad-adu ti indonar ti dadduma ngem ti balo. Kaskasdi, ni Jesus kinomendaranna iti publiko ti naimpusuan a panangted  ti balo. Kinunana: “Ibagak kadakayo a sipupudno, Daytoy a balo, nupay napanglaw, nangipisok iti ad-adu ngem iti impisokda amin. Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.”​—Lucas 21:1-4.

Kasanotay a matulad ni Jesus? Kuna ti Biblia: “Saanmo a medmedan ti naimbag kadagidiay addaan karbengan iti dayta, no adda iti pannakabalin ta imam ti panangaramid iti dayta.”​—Proverbio 3:27.

Nabileg ti Komendasion

Ita ta kaaduan iti lubong ket di managyaman, kasapulantayo amin ti maapresiar ken maipateg. No naimpusuan a komendarantayo ti sabsabali, mapabileg ken maparegtatayo ida. Ti napaypayso a pammadayawtayo ti manggutugot kadakuada a mangaramid iti amin a kabaelanda.​—Proverbio 31:28, 29.

Idagadag ti Biblia iti amin a Kristiano: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid.” (Hebreo 10:24) Nagsayaat koma a pagnaedan ti lubong no amin ket maseknan iti sabsabali, mangsapul kadagiti nasayaat a galad, ken mangapresiar iti naimbag nga ar-aramidda. Wen, nagbileg ti komendasion!

NAPANUNOTMO KADIN?

● Apay a rumbeng a komendarantayo ti sabsabali gapu iti naimbag nga ar-aramidda?​—Proverbio 15:23.

● No sukimatennatayo ni Jehova, ania ti birokenna?​—2 Cronicas 16:9.

● Kaano a rumbeng a komendarantayo ti sabsabali?​—Proverbio 3:27.

[Ladawan iti panid 29]

Kitkitaem ken komkomendaram kadi ti naimbag nga ar-aramid ti sabsabali?