Mapan iti linaonna

Mapan iti listaan dagiti linaonna

 Agimtuod Dagiti Agtutubo

Apay a Kasdiay ti Naibagak?

Apay a Kasdiay ti Naibagak?

Tulongannaka daytoy nga artikulo a mangammo no

APAY a pasaray mailaw-anka a makasao iti di umiso

ANIA ti aramidem no maikaglis ti dilam

KASANO a makontrolmo ti dilam

“Kabaelak met ketdi a kontrolen ti dilak, ngem no dadduma, mailaw-anak isu a napalalo ti bainko kalpasanna!”​—Chase

“Pasaray makaisawangak kadagiti banag a nalabit pampanunoten ti amin ngem saan a rumbeng a mayebkas . . . Oops!”​—Allie

APAY A MAPASPASAMAK DAYTA?

Napateg a teksto: “No ti asinoman saan a maitibkol iti sao, daytoy ket perpekto a tao.” (Santiago 3:2) Kayatna a sawen, awan ti asinoman a naan-anay a makakontrol iti dilana. Adu ti makatarus ken Annette * a nagkuna iti: “Masansan a makaisawangak iti diak man la napagpanunotan a naimbag.”

Pudno a kapadasan: “Imbaga ti maysa a gayyemko a kayatna ti dadduma a bado nga ibasurak koman. Dagus nga imbagak a saanda nga umanay kenkuana. ‘Apay? Panagkunam nalukmegak?’, kunana metten.”​—Corrine.

Tapno maawatam no apay a dimo makontrol no dadduma ti panagsasaom, padasem dagiti sumaganad.

● Ammuem dagiti pagkapuyam.

․․․․․ Makapagsaoak gapu iti pungtot

․․․․․ Makapagsaoak a diak agpanunot nga umuna

․․․․․ Makapagsaoak a diak dumngeg nga umuna

․․․․․ Dadduma pay ․․․․․

Kas pagarigan: “Ti problemak ket naangawak unay. No dadduma, di umiso ti panagsaad dayta iti sabali.”​—Alexis.

Ammuem no siasino dagiti gagangay a pakailaw-anam nga agsao.

․․․․․ Nagannak

․․․․․ Kabsat

․․․․․ Gayyem

․․․․․ Dadduma pay ․․․․․

Kas pagarigan: “Nakalkaldaang ta no siasino pay dagiti ay-ayatek, isuda ketdin ti masansan a mapasaktak,” kuna ti 20 anyos a ni Christine. “Siguro, napasigak unay kadakuada isu a masobraak ti agsao.”

 ANIA TI ARAMIDEM NO MAIKAGLIS TI DILAM?

Napateg a teksto: “Surotentayo koma ti bambanag a mamataud iti talna.” (Roma 14:19) Ti maysa a pamay-an a masurottayo dayta a balakad ket ti panagpadispensar.

Pudno a kapadasan: “Natay ni Nanang idi 10 a bulanak pay laeng. Binaybay-annak ni Tatang isu a da antik ken angkelko ti nangpadakkel kaniak. Naminsan, idi nalabit 10 wenno 11 ti tawenko, malmaldayak unay ken makapungtotak iti ipapatay ni Nanang. Kasla kayatko ti agpabasol. Isu nga idi agpatulong ni anti iti ar-aramidenna, nabugkawak sa naibagak ti ‘Kagurguraka!’ ken ‘Saan a sika ti agpayso a nanangko!’ Naklaat ni anti, napan iti kuartona, sana inrikep ti ridaw. Nangngegko ti panaganug-ogna ket nakonsiensiaak. Isu ti mangay-aywan kaniak ken ar-aramidenna ti amin a pagimbagak ngem nagdakes metten ti panangtratok kenkuana. Kinasaritanak ni angkelko maipapan iti napasamak ket impabasana kaniak dagiti teksto no kasano a kontrolen ti dila. Kalpasan dayta, naimpusuan a nagpadispensarak ken ni antik. Naamirisko a nagkamaliak.”​—Karen.

Iti baba, isuratmo ti makagapu a marigatanka nga agpadispensar.

․․․․․

Apay a mabalin a sumayaat ti riknam no agpadispensarka?

․․․․․

Pamalatpatan: Usigem dagiti prinsipio a mabasa iti Proverbio 11:2 ken Mateo 5:23, 24.

Siempre, nasaysayaat a liklikan ti maysa a kasasaad tapno dimon kasapulan ti agpadispensar. Kasano a maaramidam dayta?

 KASANO A MAKONTROLMO TI DILAM?

Napateg a teksto: Agbalinka “a nasiglat no iti panagdengngeg, nainayad no iti panagsao, nabannayat no iti panagpungtot.” (Santiago 1:19) Adtoy ti sumagmamano a singasing a makatulong kenka tapno mayaplikarmo dayta a balakad.

Basaem dagiti sumaganad a teksto, ken iparismo ti tunggal maysa iti kada singasing.

Proverbio 12:16

Proverbio 17:14

Proverbio 26:20

Eclesiastes 7:9

Filipos 2:3

1 “Saan koma a nangato unay ti panangmatmatmo iti bagim tapno dika nalaka a mapabpabainan.”​—Danette.

2 “Innak biit agpagnapagna tapno adda gundawayko a makapagmaymaysa ken agpalamiis iti ulo.”​—Brielle.

3 “Idi ubingak pay, diak kayat ti agpaabak isu nga ibagak ti amin a diak magustuan. Ngem nasaysayaat gayam no palabsek laengen dagiti babassit a bambanag.”​—Celia.

4 “No adda mangbugkaw kenka ngem dimo sungsungbatan, maumanto met laeng gapu ta dimo pampansinen. Agteppelka. Dimo rubroban ti pungtotna.”​—Kerrin.

5 “Adda dagiti gundaway a masuronak iti maysa a tao. Nagadu ti pampanunotek nga ibaga koma kenkuana. Ngem no palabsek dayta, maamirisko nga awan gayam serserbi dagiti kayatko koma nga ibaga. Nasursurok ti saan a dagus a sumungbat.”​—Charles.

Ad-adu pay nga artikulo ti masarakan iti serye a “Young People Ask” iti Web site a www.watchtower.org/ype

[Footnote]

^ par. 10 Nabaliwan ti dadduma a nagan iti daytoy nga artikulo.

[Kahon/Dagiti Ladawan iti panid 22]

Allie​—Sakbay nga agsaoak, isaludsodko nga umuna iti bagik: ‘Pasayaaten kadi dayta ti situasion? Ania ngata ti epekto dayta iti kasarsaritak?’ No pagduaduaam ti kayatmo nga ibaga, nalabit nasaysayaat no dimon ibaga dayta.

Chase​—No adda kayatko nga ibaga, panunotek pay ti epektona iti sabsabali. Panagkunak, bayat a tumataenganak, lumalaingakon a mangkontrol iti dilak. Talaga a makasursuroka manipud iti kapadasam.

[Kahon iti panid 23]

DAMAGEM ITI NAGANNAKMO

Yantangay awan ti perpekto​—kas insurat ni Santiago a “maitibkoltayo amin iti adu a daras”​—damagem iti nagannakmo no kasanoda idi nga inkagumaan a kontrolen ti dilada.​—Santiago 3:2.

[Ladawan iti panid 22]

“Apaman a naparuarmo ti toothpaste, dimon maisubli dayta iti pagkargaanna. Kasta met laeng iti panagsaotayo. No nakaisawangtayo iti makapasakit, ditay maibabawin dayta.”​—James.