Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

AGRIINGKAYO! NOBIEMBRE 2011

 Agimtuod Dagiti Agtutubo

Pangbirokak iti Nasayaat a Paglinglingayan?

Pangbirokak iti Nasayaat a Paglinglingayan?

No maysaka a Kristiano, napilika la ketdi iti paglinglingayam. Saanmo la a basta suroten ti ibaga ti sabali a masapul a buyaem, basaem, wenno denggem. Apay? Kaaduan ngamin a paglinglingayan ita ket mangitamtampok iti seksual nga imoralidad, kinaranggas, ken espiritismo—bambanag a rumbeng a liklikam. Nupay kasta, adda latta nasayaat a paglinglingayan. Usigentayo no kasano a masarakam dagita. *

PELIKULA

Tsekam ti paboritom a klase ti pelikula.

  • Comedy
  • Drama
  • Action/Adventure
  • Science fiction
  • Dadduma pay

Ammom kadi . . . ? Masansan a nasurok a 1,000 a pelikula kada tawen ti maar-aramid idiay India—ad-adu nga amang ngem iti aniaman a pagilian.

No ania ti liklikam. Adu a pelikula ti mangitantandudo kadagiti prinsipio a maikontra kadagiti pagalagadan ti Biblia. Itamtampok ti dadduma ti kinaranggas ken napanayag a seksual nga aramid, idinto ta maipapan met iti karkarna a pannakabalin wenno mahika ti dadduma. Ngem kuna ti Biblia: “Iwaksiyo amin dagita manipud kadakayo, pungtot, unget, kinadakes, nabassawang a sasao, ken naalas a sasao manipud iti ngiwatyo.” (Colosas 3:8) Kagura met ti Dios ti aniaman nga aramid a nainaig iti espiritismo.—Deuteronomio 18:10-13.

No kasano ti agbalin a napili. “No kasla di nasayaat ti patalastas ti pelikula, diakon buyaen dayta.”—Jerrine. *

“Diak patien lattan ti singasing ti sabali malaksid no siguradoak nga agpadakami iti prinsipio.”—Caitlyn.

“No agbuybuyaak iti sine ket saankon a mairusok ti eksena, pumanawakon.”—Marina.

“Tapno ad-adu ti maammuak maipapan iti linaon ti tunggal pelikula, lukatak ti maysa nga Internet site a mangibagbaga iti kakaro ti kinaranggas, dakes a sasao, ken seksual nga eksena dayta.”—Natasha.

Singasing: Agbirokka kadagiti pelikula a posible a di aglaon iti kuestionable nga eksena. “Magusgustuak a buyaen dagiti pelikula a maipapan iti biag idi un-unana a naibatay iti classic literature,” kuna ti agtutubo a ni Masami.

Isaludsodmo iti bagim,

‘Dagiti kadi pelikula a buybuyaek ad-adda a tulongandak nga agtulnog iti bilbilin ti Dios maipapan iti seks, kinaranggas, ken espiritismo? Wenno ad-adda laeng a marigatanak?’

 LIBRO

Tsekam ti paboritom a klase ti babasaen.

  • Fiction
  • Nonfiction
  • Classic literature
  • Dadduma pay

Ammom kadi . . . ? Nasurok a 1,000 a libro ti linawas a mayim-imprenta idiay Estados Unidos laeng.

Saan a malugi dagiti adda iti industria ti paglinglingayan—adu pay ketdi ti maganansiada—no kontraem ti sinanay-Biblia a konsiensiam, ket buyaem, basaem, wenno denggem lattan ti aniaman a kayat ti kaaduan.

No ania ti liklikam. Kas kadagiti pelikula, adu a libro ti mangitamtampok kadagiti prinsipio a maikontra kadagiti pagalagadan ti Biblia. Kas pagarigan, detalyado unay ti dadduma no maipapan iti seksual nga ar-aramid, wenno espiritismo met ti kangrunaan a tema ti sabsabali. Ngem kuna ti Biblia: “Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo.” (Efeso 5:3) Dakamatenna pay a ti espiritistiko nga ar-aramid ket “dakes kadagiti mata ni Jehova.”—2 Ar-ari 17:17.

No kasano ti agbalin a napili. “No agsapsapulak iti nasayaat a libro, basaek ti makinlikud nga akkubna ken padalanak dagiti kapitulona. No adda makitak a madi, diak gatangen dayta.”—Marie.

“Bayat a dumakdakkelak ken siakon ti agdesdesision para iti bagik, naamirisko ti kinapateg ti panangsurotko iti konsiensiak. No tagialasek ti maysa a libro, isardengko a basaen. Ammok ngamin a di maitunos dayta iti panangmatmat ti Dios.”—Corinne.

Singasing: Agbasaka iti nadumaduma a klase. “Kaykayatko ti classic literature ngem iti modern fiction,” kuna ti 17 anyos a ni Lara. “Talaga a nakapimpintas dagiti sasao, panagbalbaliw ti karakter, ken taray ti estoria!”

Isaludsodmo iti bagim,

‘Dagiti kadi libro a kaay-ayok a basaen itamtampokda dagiti aramid a kagura ti Dios?’

 MUSIKA

Tsekam ti paboritom a klase ti musika.

  • Rock
  • Classical
  • Jazz
  • R&B
  • Hip-hop
  • Dadduma pay

Ammom kadi . . . ? Kada tawen, ti uppat a kangrunaan a kompania ti musika ket makairuar iti agarup 30,000 nga album.

No ania ti liklikam. Kas met laeng kadagiti pelikula ken libro, imoral ti kaaduan ita a musika. Gapu kadagiti narasaw a liriko ken makaparasuk nga eksena kadagiti music video, ad-adda a marigatanka a mangkontrol iti seksual a tarigagaymo. (1 Corinto 6:18) Kuna ti 21 anyos a ni Leigh: “Kaaduan a musika ita ket mangitamtampok iti kababalin a maikontra kadagiti pagalagadan ti Biblia,” ken mang-engganio kadagiti tattao nga agsala iti makapagargari.

No kasano ti agbalin a napili. “Isaludsodko iti bagik, ‘No ipakitak kadagiti nataengan a Kristiano ti listaan ti musika a dengdenggek, mabainak kadi iti maduktalanda?’ Dayta ti makatulong kaniak a mangikeddeng no ania a kita ti musika ti denggek.”—Leanne.

Singasing. Dumngegka iti nadumaduma a klase. “Magustuan ni tatangko ti classical music isu a nangnangngegko dayta bayat a dumakdakkelak,” kuna ti agtutubo a ni Roberto. “Gapu iti panagadalko iti classical music—bayat nga agad-adalak met nga agpiano—immadu ti naammuak!”

Isaludsodmo iti bagim,

‘Ti kadi musika a dengdenggek ad-adda a tulongannak a mangkontrol kadagiti seksual a tarigagayko? Wenno ad-adda laeng a marigatanak?’

AGBASAKA PAY ITI AD-ADU MAIPAPAN ITI DAYTA!

Kitaem ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2, Kapitulo 31 ken 32, nga impablaak dagiti Saksi ni Jehova.

^ par. 3 Awan ti aniaman a mailaklako a pelikula, libro, wenno kanta nga iyendorso wenno kondenaren ti Agriingkayo! Ti panggep daytoy nga artikulo ket tumulong kenka a mangpatanor ken mangsurot iti sinanay-Biblia a konsiensia a kanayon a mangikabkabilangan kadagiti pagalagadan ti Dios.—Salmo 119:104; Roma 12:9.

^ par. 13 Nabaliwan ti dadduma a nagan iti daytoy nga artikulo.

Ammuem ti Ad-adu Pay

Malabanam ti Sulisog!

Tallo a pamay-an a makatulong tapno maaddaanka iti determinasion.

Saludsod nga Iyimtuod ti Agtutubo, Tomo 2

Ti dadduma kadagiti topiko a nailawlawag ket maipapan iti eskuelaan, panaglinglingay, kapatada, nagannak, panagbalbaliw iti biag, ti riknam, ken ti saanmo a kasekso.