Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

AGRIINGKAYO! SEPTIEMBRE 2011

 Agimtuod Dagiti Agtutubo

Siasino ti Pudno a Gagayyemko?

Siasino ti Pudno a Gagayyemko?

“Adu ti nasursurok ken Cori. No agkaduakami, adu ti maam-ammok, mapadasak, ken makaparagsak ti aniaman nga aramidenmi. Talaga a nagbalbaliw ti biagko gapu iti panaggayyemmi!”—Tara. *

Kasla imposible kadi ti maaddaan iti kasta a panaggayyem? No wen, dika maupay. Adda la iti aglawlawmo dagiti posible a magayyemmo. Tulongannaka daytoy nga artikulo a mangammo no siasinoda.

‘NAGADU ti am-ammok ngem awan gayyemko.’ Kasta ti panangdeskribir ti 21 anyos a ni Shayna iti kaadu ti pakilanglangenanna ngem awan met ti kapasiganna. Nalabit kasta met ti marikrikna ti adu a miembro dagiti social network. Kinuna ti 22 anyos a ni Serena, “Mabalin a nakaat-atiddog ti ‘friends list-mo’ sa kasla nakalatlatakka. Ngem kinaagpaysuanna, listaan laeng dayta.” *

Ania ti kaykayatmo—ginasut a nagan iti ‘friends list-mo’ wenno sumagmamano a pudno a gagayyem? Nupay agpada nga adda pagimbaganda, ti pudno a gayyem tulongannaka no adda problemam ken paregtaennaka pay nga agbalin a nasaysayaat a tao. (1 Corinto 16:17, 18) Usarem dagiti sumaganad a galad tapno maammuam no siasino kadagiti am-ammom ti nalabit mangipakpakitan kadagiti galad ti pudno a gayyem.

TI PUDNO A GAYYEM KET MAPAGTALKAN

“Ibagbaga idi kaniak ti gayyemko dagiti sekretona isu nga impagarupko no mapagpiarak kadagiti palimedko. Naminsan, imbagak a kursonadak ti maysa a baro. Anian a babawik ta inwarasna ketdin dayta!”—Beverly.

“Mabalinko nga ibaga iti gayyemko a ni Alan ti uray ania, ket ammok a dina iyes-estoria dayta.”—Calvin.

Siasino kadagita nga agtutubo ti addaan iti pudno a gayyem? Siasino kadagiti gagayyemmo ti mapagtalkam a pangibagaan iti riknam? * Kuna ti Biblia a “ti pudno a kadua agayat iti isuamin a tiempo.”—Proverbio 17:17.

 Isuratmo iti baba ti nagan ti gagayyemmo a napaneknekam a mapagtalkan.

  1. ․․․․․
  2. ․․․․․

TI PUDNO A GAYYEM KET MANAGSAKRIPISIO

“Iti siasinoman nga aggayyem, adda tiempo a nakapkapuy ti maysa. Ammo ti pudno a gayyem no kaano a problemadoka isu a sisasagana a tumulong kenka. Siempre, namnamaenna a kasta met ti aramidem kenkuana inton isu ti agkasapulan.”—Kellie.

“Adda nabiit pay a gayyemko idi natay ni nanangko. Dikam pay idi a nasinged ngem implanomi ti agkadua a dumar-ay iti kasar. Nairana metten ti pumpon ni Nanang iti kasar a tabunuanmi koma. Diak ninamnama ngem immay nakipumpon ti gayyemko imbes a napan iti kasar. Napaneknekak iti dayta a kanito nga isu ket pudno a gayyem!”—Lena.

Siasino kadagiti gagayyemmo ti managsakripisio? Ti pudno a gayyem ‘itultuloyna a sapulen, saan a ti bukodna a pagsayaatan, no di ket ti pagsayaatan ti sabali a tao.’—1 Corinto 10:24.

Isuratmo iti baba ti nagan ti dua a gayyemmo a managsakripisio.

  1. ․․․․․
  2. ․․․․․

TI PUDNO A GAYYEM TULONGANNAKA NGA AGBALIN A NASAYSAYAAT A TAO

“Ekspektaren ti dadduma nga agbalinak a matalek kadakuada wenno mayatak lattan iti kayatda uray no maikontra kadagiti prinsipiok wenno konsiensiak. Saanda a pudno a gagayyem.”—Nadeine.

“Ni manangko ti kasingedan a gayyemko. Parparegtaennak a mangaramid iti amin a kabaelak ken tultulongannak nga agbalin nga ad-adda a mannakigayyem. Ibagana kaniak ti agpayso uray no saan a dayta ti kayatko a mangngeg.”—Amy.

“Idi problemadoak, didak linamlamiong dagiti kasingedan a gagayyemko no di ket sipaprangka a binagbagaandak. Ti met dadduma inurayda lattan a nasolbarko a bukbukod ti problemak wenno kayatda nga iyaw-awanko laengen dayta iti panunotko. Dida maseknan iti problemak.”—Miki.

“Awan ti umartap iti gayyemko iti panangbigbigna iti kabaelak nga aramiden, ket parparegtaennak a mangragpat kadagiti kalatko. Nakaprangprangka kaniak no kasapulan—magustuak dayta!”—Elaine.

Tultulongandaka kadi dagiti gagayyemmo a mangparang-ay iti abilidadmo, wenno nasken nga ibabbabam ti standard-mo tapno laeng akseptarendaka? Kuna ti Proverbio 13:20: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.”

Isuratmo iti baba ti nagan ti dua a gayyemmo a nakatulong kenka nga agbalin a nasaysayaat a tao.

  1. ․․․․․
  2. ․․․․․

Kitaem dagiti nagan nga insuratmo iti tallo a seksion iti ngato. No namitlo nga insuratmo ti  nagan ti maysa, dayta ti pudno a gayyem! Ngem no awan man la ti mapanunotmo nga addaan kadagiti nadakamat a galad, dika maupay. Mabalin nga adda la iti aglawlawmo ti agbalinto a pudno a gagayyemmo. Nalabit kasapulan laeng ti tiempo tapno mabirokam ida. * Kabayatanna, ikagumaam ti agbalin a nasayaat a gayyem. Kinuna ti 20 anyos a ni Elena: “Kanayon nga ikagkagumaak ti sumaranay kadagiti gagayyemko. No adda kayatda nga aramiden, tumulongak. No kasapulanda ti katungtong, dumngegak. No kayatda ti agsangit, liwliwaek ida.”

Nalabit adu ti am-ammom, ket nasaysayaat dayta ngem ti pannakigayyem laeng iti sumagmamano. (2 Corinto 6:13) Ngem nasayaat met ti maaddaan iti sumagmamano a pudno a gagayyem a “mayanak [wenno, sumaranay] no adda rigat,” di ngamin? (Proverbio 17:17) “Nagsayaat ti adu ti am-ammona. Ngem kayarigan dayta ti sangaaparador a badom a nagpintas a kitaen a naka-hanger ngem saan met nga amin ket umanay kenka. Kanayonto a ti sumagmamano a komportable ken nasayaat ti plastarna kenka ti isuotmo. Kasta met laeng no maipapan kadagiti nasinged a gagayyem.”

^ par. 3 Nabaliwan ti dadduma a nagan iti daytoy nga artikulo.

^ par. 5 Para iti ad-adu pay nga impormasion maipapan iti social networking, kitaem dagiti artikulo ti “Agimtuod Dagiti Agtutubo” iti Hulio ken Agosto 2011 a ruar ti Agriingkayo!

^ par. 10 No dadduma, saan a nainsiriban ti panangilimed iti maysa a banag—kas pagarigan, no ti gayyemmo ket nakaaramid iti nadagsen a basol, no kayatnan ti agpakamatay, wenno no adda ar-aramidenna a pakadangrananna. Para iti kanayonan nga impormasion, kitaem ti Agriingkayo! a Disiembre 2008, panid 19-21, ken Mayo 2008, panid 26-29.

^ par. 30 Para iti kanayonan nga impormasion, kitaem ti artikulo nga “Agimtuod Dagiti Agtutubo . . . Kasapulak Kadi Dagiti Nasaysayaat a Gagayyem?” iti Marso 2009 nga Agriingkayo!