Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! HULIO 2011

Apay a Nakaad-adu ti Agsagsagaba?

Apay a Nakaad-adu ti Agsagsagaba?

DAGITI lider ti relihion nga agkunkuna nga ammoda ti sungbat ti saludsod a mabasa iti kannigid masansan nga isursuroda a ti panagsagaba ket pannusa ti Dios. Kas pagarigan, sumagmamano nga aldaw kalpasan ti ginggined idiay Haiti, maysa a padi iti kabesera ti nangibaga kadagiti parokiana a ti didigra ket mensahe ti Dios. Saan met unay a kasta kadirekta ti dadduma. Sigun iti maysa nga Americana a propesora iti relihion, kasla kastoy ti panangmatmat ti adu: “Maysa a misterio ken awan karbengantayo a mangkuestion no apay a pagayatan ti Dios dagiti kasta a didigra. Ti napateg ket addaantayo iti pammati.”

Talaga kadi a “pagayatan” ti Dios ti panagsagaba ti tattao? Ti sungbat ti Biblia ket nalawag a saan! Saan a paset ti panggep ni Jehova a Dios nga agsagaba ti sangatauan. Ngem ti umuna a pagassawaan ket nagrebelde iti turay ti Dios. Kinaykayatda nga isuda ti mangikeddeng iti bukodda a pagalagadan iti naimbag ken dakes. Simmukirda iti Dios isu a sinagabada dagiti resulta. Mapaspasarantayo ita dagiti epekto ti di umiso a pinilida. Ngem saan a pulos a nagtaud iti Dios ti panagsagaba ti tattao. Kuna ti Biblia: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13) Mabalin nga agsagaba ti uray siasino—uray dagidiay patpatgen ti Dios. Usigem ti sumaganad a pagarigan:

  • Ni propeta Eliseo ket natay gapu iti sakit.—2 Ar-ari 13:14.
  • Insurat ni apostol Pablo nga isu ket nagtultuloy a “mabisin ken kasta met a mawaw ken kurang ti pannakakawesna ken makabkabil ken awanan pagtaengan.”—1 Corinto 4:11.
  • Ti Kristiano a ni Epafrodito ket nagsakit ken nadepres wenno ‘nagleddaang.’—Filipos 2:25, 26.

Awan mabasatayo iti Biblia a dusdusaen idi ti Dios dagitoy tallo a lallaki gapu kadagiti basolda. Ipakaammo ketdi ti Biblia a saan a ti Dios ti makinggapuanan iti panagsagaba. Ibatadna met ti tallo a kangrunaan a makagapu a masansan nga agresulta iti panagsagaba.

 Personal a Desision

“Aniaman nga imulmula ti maysa a tao, daytoyto met ti apitenna.” (Galacia 6:7) Siempre, no inkeddeng ti maysa a tao ti agsigarilio, agbalin a kaskasero, wenno mangwaldas iti kuartana, isu a mismo ti manungsungbat iti aniaman a panagsagaba a mabalin nga ibunga ti desisionna.

Mabalin nga agsagabatayo met gapu kadagiti managimbubukodan a desision ti dadduma. Tattao ti makinggapuanan kadagiti kadaksan nga aramid, kas iti napalalo a kinaulpit dagiti Nazi ken pannakaabuso ti ubbing. Gapu iti di umiso a panangusar ti dadduma iti wayawayada nga agdesision, agsagaba ti sabsabali.

Di Mapakpakadaan a Paspasamak

Idi umuna a siglo C.E., 18 a tao ti natay idi narba ti dakkel a torre iti Jerusalem. Maipapan kadagiti natay, kinuna ni Jesus: “Ipagarupyo kadi a daytoy ti mangipaneknek a dakdakesda ngem dagiti amin a tattao nga agnaed idiay Jerusalem? Saan!” (Lucas 13:4, 5, Ti Baro a Naimbag a Damag Biblia) Ammo ni Jesus a dagiti natay ket saan a dinusa ti Dios. Ammona ti kinuna ti naisuraten a Sao ti Dios: “Ti tiempo ken ti di mapakpakadaan a pasamak mapagteng kadakuada amin.” (Eclesiastes 9:11) Mapasamak ti adu a trahedia gapu ta nairana ti biktima iti dina napakpakadaan a situasion wenno gapu iti panagkamali ti tao. Kas pagarigan, ipakita dagiti report a nakaad-adu ti agsagaba no di ikankano ti tattao dagiti pakdaar ken no dagiti pasdek ket saan a nabangon a makadaer iti nakaro a paniempo wenno napigsa a ginggined. Kadagita a kasasaad, ad-adu a tao ti maapektaran iti di mapakpakadaan a paspasamak nga agresulta iti ad-adu a panagsagaba.

“Ti Agturay iti Daytoy a Lubong”

Kuna ti Biblia: “Ti intero a lubong adda iti pannakabalin daydiay nadangkes.” (Juan 12:31; 1 Juan 5:19) Dayta a “nadangkes” ket ni Satanas a Diablo, a maysa a mannakabalin nga espiritu a parsua. Sigun iti Biblia, isu ti “agturay iti autoridad ti angin, ti espiritu nga agtigtignay ita iti annak ti kinasukir.” Adda ngarud autoridadna a mangkontrol iti panagpampanunot ti kaaduan a tao, ken im-impluensiaanna ida nga agsukir iti Dios. (Efeso 2:2) Nakaal-alingget ti dadduma a krimen kas iti panangabuso iti ubbing ken panangmasaker, a para iti adu, dagita ket di kabaelan nga aramiden ti tao.

Ngem kaipapanan kadi dayta a di maseknan ti Dios iti panagsagabatayo? Kabaelanna kadi a pagpatinggaen dayta ken aramidennanto kadi?

Ammuem ti Ad-adu Pay

Apay nga Ipalpalubos ti Dios ti Kinadakes ken Panagsagaba?

Kasano a nangrugi ti kinadakes, ken apay nga ipalpalubos dayta ti Dios? Agpatingganto ngata ti panagsagaba?