Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

AGRIINGKAYO! 2011-06

 Agimtuod Dagiti Agtutubo

Kasano a Makaipakitaak iti Nasayaat nga Umuna nga Impresion?

Kasano a Makaipakitaak iti Nasayaat nga Umuna nga Impresion?

“Nasayaat la ketdi ti pagbanagan daytoy nga interbiu! Sigurado a madlaw ti agbalinto a boss-ko nga awan pulos dadanagak; kaskastrekko pay la iti ridaw, aw-awagakon iti mismo a naganna. Siguradon a makapasaak!”

“Daytoy met la kadi a baro ti nangipatulod iti daytoy nakapimpintas a bio-data? Awan pulos panggapuak a mangala kenkuana! No kastoy ti tigtignaynan ita ta agap-aplay pay laeng, anianto la ketdin inton nakastreken?”

Kitaem ti ladawan ken basaem ti adda iti ngato. Ania ti tallo a rason a di makapasa daytoy nga aplikante?

  1. ․․․․․
  2. ․․․․․
  3. ․․․․․

Adda iti baba dagiti sungbat

1. Di maibagay ti kawesna para iti interbiu. 2. Presko ti panagsasaona (awan daydayawna ta inusarna lattan ti nagan ti mangin-interbiu). 3. Awan panagraem ti tigtignayna.

 IPAPANMON a damdamom ti makaraman iti maysa a kita ti taraon. Kasano kabayag sakbay a maikunam a kayatmo? Nalabit umanayen ti sangakittab tapno maikeddengmo no kayatmonto pay a kanen dayta wenno kayatmo nga ibusen ti naidasar kenka.

Kasta met laeng ti mapasamak no adda maam-amom iti damo a gundaway. Dagus a makabukelka iti impresion maipapan iti dayta a tao. Ket daytoy ti laglagipem: Bayat nga ar-aramidem dayta, nakabukel metten dayta a tao iti impresionna kenka.

Agbirbirokka kadi iti trabaho? gayyem? asawa? Ti balligim ket agpannuray iti ipakitam nga umuna nga impresion. Kitaentayo ti tallo a mabalin a nasken a parang-ayem iti pannakilangenmo tapno nasayaat ti impresion kenka ti sabsabali.

1. Ti Itsuram

Nainkalintegan man wenno saan, ti umuna nga impresion a mabukel ti tattao maipapan kenka ket maibatay iti umuna a makitada, ti itsuram. Masansan a di maikabkabilangan daytoy nga aspeto iti panangipakita iti makaay-ayo nga umuna nga impresion. Kuna ti balasang nga agnagan Clarissa: * “No mapanka ita iti restawran, dimon ammo no dagiti sumrek ket naka-gown wenno naka-pajama!”

Siempre, ti kawesmo ket rumbeng a maibagay iti okasion. Kas pagarigan, no agpainterbiuka iti trabaho, dimo pagbado ti kawes nga us-usarem no mapanka iti igid ti baybay! Ngem kasanon no dimo ammo no ania ti mayanatup a pagbado? Ti napateg ket maipakitam a manakemka babaen ti dimo panaglablabes. No dika sigurado, nasaysayaat no medio disente ti piliem a pagbado.

TANDAANAM! Ti langam ken panagbadbadom ket kasla iti ladawan iti X-ray, ipakitada ti pudno a kinasiasinom.

“No iti maysa a pasken makakitaak kadagiti karkarna ti panagbadbadona, liklikak ida. Iti dayta a kanito, ti la ammok maipapan kadakuada ket ti itsurada, ngem nagalasen ti impresionko kadakuada gapu iti kawesda.”—Diane.

Irekrekomenda ti Biblia ti “naimbag-pannakaurnosna a kawes” a mangipasimudaag a ‘naemmaka ken nasimbeng ti panunotmo.’—1 Timoteo 2:9.

Isaludsodmo iti bagim: ‘Nasayaat kadi ti pannakaurnos ti badok wenno saan? Gapu iti panagbadbadok, ipapanto kadi ti agbalin a boss-ko, gayyemko, wenno asawak a saan a ‘nasimbeng ti panagpampanunotko?’

Singasing: Agpabalakadka iti maysa a raraemem a nalaing nga agpili iti badona.

 2. Ti Ibagam

Ipakita ti panagsasaom no napakumbabaka wenno nalastogka, no naimbagka wenno dakeska. Laglagipem dayta no ikagkagumaam ti mangipakita iti nasayaat nga umuna nga impresion iti kasungani a sekso. “Masuronak no ti lalaki a kasarsaritak ket maipapan la a kanayon iti bagina ti ibagbagana,” kuna ti balasang a ni Valerie. “Iti kasumbangirna,” inayonna, “adda met lallaki a dagus a kayatda a maammuan ti amin a maipapan kenka. Makaparurod dayta nga uray la a kayaten ti babai nga itarayan.”

TANDAANAM! Ti panagsasaom ket kasla tawa a pangtan-awan ti sabsabali iti pudno a kinataom—isu a siguraduem a nasayaat ti buya a makitada kenka!

“No adda maam-ammok a baro, magustuak no natural ti tigtignayna. Napateg ti damo a panagkitami. No kasla inkabesana ti ibagbagana, nasaysayaat laengen no din agun-uni.”—Selena.

Kuna ti Biblia: “No saoka la sao, dakdakkel ti gundawaymo nga agbasol. No masiribka, agulimekka [wenno aluadam ti panagsasaom].”—Proverbio 10:19, Ti Naimbag a Damag Biblia.

Isaludsodmo iti bagim: ‘Kasano a maliklikak ti agbalin a nangiwat wenno naulimek unay? Adda kadi madi iti panagsasaok a mabalin a makakellaat wenno makapasakit iti sabsabali?’

Singasing: Paliiwem dagidiay nalaing a makisarita. Ania dagiti pamay-anda tapno agtultuloy latta ti taray ti saritaanda? Matuladmo kadi dayta?

3. Ti Tigtignaymo

Kuna ti maysa a pagsasao: Sao baybay-an, aramid pakakitaan. Kas pagarigan, no nasayaat ti tigtignaymo, kasla “ibagbagam” nga adda panagraemmo iti sabsabali. Maysa pay dayta a laglagipem no nakasaganakan a makiasawa. “Ti panangaramid iti babassit a banag a kas iti panangtengngel iti ridaw a silulukat para iti sabali ket mangipakita iti panagraem,” kuna ti balasang a ni Carrie. “Ti kaaduan kadagita ket simple a tignay a mangipakita iti panagraem.”

TANDAANAM! Ti tigtignaymo ket kasla dadakkel a karatula a mangipakita iti pudno a kinataom. (Proverbio 20:11) Ania ti “iyan-anunsio” ti tigtignaymo maipapan kenka?

“Para kaniak, napateg ti panagbalin a nasayaat a managimdeng. Nasayaat met ti saan a sumampitaw no adda agsasao, malaksid no kasapulan.”—Natalia.

Kuna ti Biblia a ti “kayatyo nga aramiden kadakayo dagiti tattao, isu met laeng ti aramidenyo kadakuada.”—Lucas 6:31.

Isaludsodmo iti bagim: ‘Nasayaat kadi ti kababalinko? Maseknanak kadi a talaga iti sabsabali? Mapangnamnamaanak kadi? Kanayon kadi nga addaak iti oras?’

Singasing: Iplanom ti makasangpet kadagiti appointment-mo iti di kumurang a 10 a minuto a nasaksakbay tapno dika maladaw uray no adda aberia. Dimo ipalubos a ti umuna nga impresionda kenka ket managladladawka!

Palagip: Saan a kasapulan nga agpammarangka tapno laeng makaipakitaka iti nasayaat nga impresion, ta panangallilaw dayta. (Salmo 26:4) Ammuem ketdi dagiti galad a kayatmo a pakabigbigam ket ikagumaam a parang-ayem dagita ken kanayon nga iyaplikarmo amin dagita. (Colosas 3:9, 10) Bayat nga ar-aramidem dayta, laglagipem a sika ti mangar-aramid iti bukodmo a reputasion. No kanayon a sipapanunotka iti itsuram, panagsasaom, ken tigtignaymo, makaipakitaka iti nasayaat nga umuna nga impresion a dinto pulos malipatan!

^ par. 15 Nabaliwan ti dadduma a nagan iti daytoy nga artikulo.