Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  2010-08

Ti Kinuna ti Sabsabali

Ti Kinuna ti Sabsabali

 Ti Kinuna ti Sabsabali

Francia “Dagiti Saksi ni Jehova ket umili a mangraraem kadagiti linteg ti Republika. . . . Saanda a pangta iti urnos ti komunidad. Agtartrabahoda, agbaybayadda iti buis, tumultulongda iti idudur-as ti ekonomia ti pagiliantayo ken agdondonarda kadagiti organisasion a mangsarsaranay kadagiti marigrigat. Makaay-ayo a buyaen ti natalna a panagtataripnong dagitoy a tattao a nagduduma ti puli ken naggapuanda. . . . No amin koma ket Saksi ni Jehova, saanen a kasapulan dagiti polis a kas kadakami.”—Pannakangiwat ti Police Action Union iti Francia.

Ukraine “Ipaspasagepsep dagiti Saksi ni Jehova kadagiti annakda dagiti nagsayaat a prinsipio manipud iti Biblia. Isursuroda ida a mangliklik kadagiti ugali, aramid, ken kababalin a makadangran kadakuada a mismo ken iti sabsabali, nupay dagita ket ibilang ita ti kaaduan kas gagangay. Pakpakdaaranda ida kadagiti peggad ti panagdroga, panagsigarilio, ken nalabes a panaginum. Napateg kadakuada ti kinamapagpiaran ken kinagaget. . . . Isursuro dagiti Saksi ni Jehova kadagiti annakda dagiti agkakaimbag a galad, nga agtulnogda kadagiti linteg, ken raemenda dagiti addaan autoridad agraman ti dadduma a tattao ken sansanikuada.”—The History of Religion in Ukraine, inedit ni Propesor Petro Yarotskyi.

Italia “Nakataltalna ti 30,000 a nagtataripnong iti Olympic Stadium . . . Awan ti wara, awan ti tumanagari, ken awan ti agpipinnukkaw. Kasta ti kasasaad idi kalman iti Olympic Stadium . . . Awan ti naalas ti panagtigtignayna, awan ti agsigsigarilio, awan ti agiwarwara iti naginumanna. Ti la makitam ket dagiti nakaukrad a Biblia, tattao nga aginotnotar, ken ubbing a nakatugaw a siuulimek.”—Impadamag ti L’Unità maipapan iti kombension dagiti Saksi ni Jehova idiay Roma.

Britania “Sigun iti Archdeacon ti Cheltenham, agkasapulan ti Church of England iti adu a grupo dagiti napasnek a tattao a mangaskasaba  iti binalaybalay a kas kadagiti Saksi ni Jehova.”—The Gazette, Gloucester Diocese.

Netherlands Kastoy ti insurat dagiti kaarruba ti Kingdom Hall (awag iti paggigimongan dagiti Saksi) iti Leeuwarden City kadagiti Saksi sadiay: “Agyamankami iti nagsayaat a maar-aramidanyo iti buya ti Noorderweg [Kalsada ti Noorder]. Kanayon a nakadisente ken nagsayaat ti kababalin dagiti miembroyo. Nakasingsingpet dagiti ubbingyo, kanayon nga umiso ti panangiparadayo kadagiti luganyo, dikay agiwarwara iti kalsada, ken kanayon a nadalus ken naurnos ti aglawlaw ti Kingdom Hall-yo. Agkakaarrubatayo latta koma ta magusgustuandakayo unay.”

Mexico Sigun ken Elio Masferrer a propesor ken managsirarak iti National School of Anthropology and History, nakatulongen dagiti Saksi kadagidiay “addaan kadagiti nakaro a problema iti pamilia a kas iti panagdroga, nalabes a panaginum, panangabuso dagiti kapamilia, ken panangrames.” Kinunana a ti pannursuro dagiti Saksi ni Jehova ti “mangipapaay iti dignidad kadagidiay mangtagtagibassit iti bagida” ken tultulonganda ida nga “agbiag nga awanan kadagiti nakaro a problema babaen ti panagaramidda kadagiti makaay-ayo iti Dios.”—Periodiko nga Excélsior.

Brazil Kuna ti maysa a diario: “Talaga a nakasaysayaat ti organisasion dagiti Saksi ni Jehova. Kanayon a nadalus dagiti pagtataripnonganda. Nakaur-urnos ti amin . . . No nalpasen ti programada, panawanda ti nagtataripnonganda a nadaldalus ngem idi sinangpetanda. Nakaul-ulimek ti tallaong kabayatan dagiti palawag. Awan ti agdidinnuron. Nakasaysayaat ti kababalinda. . . . Pudno a nakaur-urnos dayta a relihion. Ammoda ti kaipapanan ti panagdaydayaw iti Dios.”—Comércio da Franca.

Natibker ti pammati dagiti Saksi ni Jehova nga awanen ti nalalaing ngem iti Namarsua no maipapan kadagiti prinsipio a rumbeng a suroten dagiti tattao a pinarsuana. (Isaias 48:17, 18) Gapuna, dagiti Saksi ni Jehova ipaayda Kenkuana ti aniaman a magun-odda a pammadayaw ti sabsabali gapu iti nasayaat a kababalinda. Kinuna ni Jesus: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.”—Mateo 5:16.

[Blurb iti panid 4]

“Isursuro dagiti Saksi ni Jehova kadagiti annakda dagiti agkakaimbag a galad, nga agtulnogda kadagiti linteg”

[Blurb iti panid 5]

“. . . Makaay-ayo a buyaen ti natalna a panagtataripnong dagitoy a tattao a nagduduma ti puli ken naggapuanda . . .”