Mapan iti linaonna

Mapan iti segundario a pagpilian

Dagiti Saksi ni Jehova

Iloko

AGRIINGKAYO! 2008-11

 Agimtuod Dagiti Agtutubo

Kasano a Mapasayaatko Dagiti Kararagko?

Kasano a Mapasayaatko Dagiti Kararagko?

“No marigrigatanka a mangitungpal kadagiti responsabilidadmo iti eskuelaan, pagtrabahuan, wenno kadagiti gagayyemmo ken iti pamiliam, no dadduma malipatam no siasino ti kapatgan—ti Dios.”—Faviola, 15, Estados Unidos.

“AGKARARAGKAYO a di agressat.” (1 Tesalonica 5:17) “Reggetanyo ti agkararag.” (Roma 12:12) “Maipakaammo koma dagiti dawatyo iti Dios.” (Filipos 4:6) No maysaka a Kristiano, nalabit a pamiliarka unay kadagita a teksto. Mabalin a bigbigem met a ti kararag ti kasayaatan a kita ti komunikasion. Agasem, iti aniaman nga oras ti aldaw wenno rabii, mabalinmo ti makisarita iti Mannakabalin-amin a Dios! Ket kuna ti Biblia: “Denggennatayo.” *1 Juan 5:14.

Kaskasdi, kas ken Faviola a nadakamat iti rugrugi, nalabit marigatanka nga agkararag. Ti situasion nga umasping iti dayta ket mabalin a mayasping iti nakatulbek a ridaw. No kasta ti panagriknam, ania ti maaramidam maipapan iti dayta? Tulongannaka daytoy nga artikulo a (1) mangammo iti makagapu, (2) mangaramid iti kalat a mainaig kadagiti kararagmo, ken (3) manglukat iti “ridaw” tapno maragpatmo ti kalatmo.

Umuna, ammuentayo ti makagapu. Ania a partikular nga aspeto ti kararag ti karirigatan kenka? Isuratmo ti sungbatmo iti baba.

․․․․․

Sumaganad, mangaramidka iti kalat. Iti baba, kur-itam ti kalat a kayatmo a maragpat, wenno mangisuratka iti sabali pay a kalat iti espasio kalpasan ti “Dadduma pay.”

  • Kayatko a mas regular ti panagkararagko.
  • Kayatko a di ulit-uliten ti isu met la a bambanag kadagiti kararagko.
  • Kayatko nga ad-adda a naimpusuan dagiti kararagko.
  • Dadduma pay

Pananglukat iti “Ridaw”

No mariknam a ti panagkararag ket kas iti nakatulbek a ridaw, usarem dagiti tulbek a naipaay babaen iti Biblia a Sao ti Dios

Ti kararag ket umasping iti nakaserra a ridaw a mabalinmo a lukatan babaen iti tulbek iti aniaman nga oras. Nupay kasta, adu nga agtutubo ti mangibaga a manmanoda a lukatan dayta nupay rumbeng koma a masansan nga aramidenda dayta. No kastaka met, dika maupay! Naammuamon ti makagapu ken nangaramidkan iti kalat. Ita, ti laengen kasapulam ket ti tulbek tapno malukatam  ti ridaw. Usigem ti sumagmamano a kasla seradora a lapped a mabalin a pakaipasanguam, agraman dagiti singasing no kasanom a malukatan wenno marisut dagita.

Ti Seradora: KINALIWAY.

“No dadduma, maliwayak ti agkararag gapu iti kaadu dagiti aramidek.”—Preeti, 20, Britania.

Ti Tulbek: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.”Efeso 5:15, 16.

Singasing: Nasaksakbay a piliem ti nasayaat nga oras ti panagkararagmo iti tunggal aldaw. Mabalin pay ketdi nga isuratmo dayta iti papel, a kas iti ar-aramidem no adda kayatmo a laglagipen nga aramidem. “No saanak a mangituding iti espesipiko nga oras ti panagkararag, naglakaak a makumikom iti dadduma a bambanag,” kinuna ti 18 anyos a ni Yoshiko a taga-Japan.

Ti Seradora: PAKASINGAAN.

“Diak maipamaysa ti agkararag, ken sabali a banag ti mapampanunotko imbes a ti ibagbagak.”—Pamela, 17, Mexico.

Ti Tulbek: “Ti naruay iti puso sawen ti ngiwat.”Mateo 12:34.

Singasing: No agalla-alla ti panunotmo bayat nga agkarkararagka, padasem a paababaen ti kararagmo—agingga a kabaelamon nga ipamaysa dayta. Adtoy ti maysa pay a singasing: Ikararagmo dagiti pakaseknam unay. Kastoy ti kinuna ti 14 anyos a ni Marina a taga-Russia: “Idi tin-edyerakon, inut–utobko a ti panagkararag ket aktual a pannakikomunikar iti Dios. Dayta ti nanggutugot kaniak nga agkararag iti naimpusuan.”

Ti Seradora: RUTINA.

“No agkararagak, madlawko nga isu la nga isu ti ibagbagak.”—Dupe, 17, Benin.

Ti Tulbek: “Pudno unay a mennamennaekto ti isuamin nga aramidmo, ket kadagiti pannakilangenmo maseknanakto.”Salmo 77:12.

Singasing: No kasla maulit-ulit dagiti ibagbagam iti kararagmo, inaldaw a mangisuratka iti espesipiko a bendision nga inawatmo ken Jehova. Kalpasanna, agyamanka ken Jehova gapu iti dayta a bendision. Aramidem dayta iti makalawas, ket agarup pito a baro a banag ti maikararagmonto a di maulit-ulit. Kasta met laeng ti aramidem kadagiti inaldaw a mapaspasamak kenka. Kinuna ti 21 anyos a ni Bruno a taga-Brazil: “No agkararagak, ikagumaak a dakamaten dagiti napasamak iti dayta nga aldaw.” Kasta met laeng ti ar-aramiden ti 18 anyos a ni Samantha a taga-Estados Unidos. Kinunana: “Ikagkagumaak a lagipen ti amin a banag ita nga aldaw a naiduma kadagiti naglabas nga aldaw, ket dagita ti ikararagko. Dayta ti makatulong tapno saan a maulit-ulit dagiti ikarkararagko.” *

Ti Seradora: PANAGDUADUA.

“Naminsan, inkararagko ti maysa a parikutko idiay eskuelaan ngem saan a narisut dayta. Kinapudnona, ad-adu pay a problema ti rimsua. Napanunotko: ‘Apay koma nga agkararagak pay laeng? Dinak met dengdenggen ni Jehova!’”—Minori, 15, Japan.

Ti Tulbek: ‘Maigiddan iti pannakasulisog, aramidento met ni Jehova a Dios ti dalan a pagruaranyo tapno mabalinanyo nga ibturan dayta.’1 Corinto 10:13.

Singasing: Maysa a banag ti sigurado: Ni Jehova ket “Managdengngeg iti kararag.” (Salmo 65:2) Isu a kalpasan nga inkararagmo ti maipapan iti maysa a banag, padasem nga usigen a naan-anay dayta. Imbes nga urayem ti ekspektarem a sungbat, paliiwem ti mabalin a naipaayen a sungbat. Ti laengen panagib-ibturmo kas maysa a Kristiano ket mangipakitan a mabalin a sinungbatanen ni Jehova ti kararagmo—saan a babaen ti panangikkatna iti parikutmo no di ket babaen ti panangpabilegna kenka a mangibtur iti dayta.Filipos 4:13.

Ti Seradora: BAIN.

“No panunotek ti mabalin nga ibaga dagiti kaeskuelaak no makitadak nga agkarkararag sakbay ti pangngaldaw, mabainak.”—Hikaru, 17, Japan.

 Ti Tulbek: “Adda . . . umiso a tiempo iti tunggal kayattayo nga aramiden.”Eclesiastes 3:1, Beck.

Singasing: Nupay mabalin a panunoten dagiti tattao a nasayaat ti ar-aramidem no agkarkararagka, saan a masapul nga ipadlawmo ti panagkararagmo. Kas pagarigan, ti ababa a panagkararag ni Nehemias bayat a makisarsarita ken Ari Artaxerxes ket nabatad a naulimek ken awan ti pamalatpatan a nadlaw ti ari nga agkarkararag ni Nehemias. (Nehemias 2:1-5) Mabalin met nga agkararagka a siuulimek ken Jehova a di madmadlaw dagiti tattao.Filipos 4:5.

Ti Seradora: MARIKNAM A DIKA MAIKARI.

“Ammon ni Jehova dagiti parikutko. Ket no diakon maanusan dagita, mariknak a nalabit dinak metten maanusan ni Jehova, isu a no dadduma, mariknak a saanak a maikari nga agkararag kenkuana.”—Elizabeth, 20, Ireland.

Ti Tulbek: “Iyallatiwyo kenkuana [iti Dios] ti isuamin a pakaringgoranyo, agsipud ta isu maseknan kadakayo.”1 Pedro 5:7.

Singasing: Kas proyekto iti personal a panagadalmo, agsirarakka ken utobem dagiti sumaganad a teksto: Lucas 12:6, 7; Juan 6:44; Hebreo 4:16; 6:10; 2 Pedro 3:9. Dagita ti makatulong kenka a mangamiris a kayat ni Jehova a denggen ti kararagmo ken di kasapulan nga agbalinka a naisangsangayan unay a Kristiano tapno denggennaka. Nagtalek ni salmista a David—a nakapasar iti danag ken rigat iti unos ti panagbiagna—a “ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” *Salmo 34:18.

Ti laengen kinapudno a ni Jehova a mismo ti dumdumngeg kadagiti kararagmo ket pammaneknek nga isu ket maseknan kenka. Kinuna ti 17 anyos a ni Nicole a taga-Italia: “Saan a dagiti anghel ti tinudingan ni Jehova a dumngeg kadagiti kararag. Napateg la ketdi kenkuana dagiti kararagtayo yantangay isu a mismo ti dumdumngeg kadagita.”

^ par. 4 Yantangay ti panagdengngeg ti Namarsua ket saan nga agpannuray kadagiti sound wave, kabaelanna a “denggen” dagiti di naisawang a linaon ti puso.Salmo 19:14.

^ par. 23 Kitaem “Ti Panangmatmat ti Biblia: Ania ti Panangmatmat ti Dios Kadagiti Banag a Maus-usar iti Panagdayaw?” iti panid 18.

^ par. 32 No mariknam a kasla saan a dengdenggen ti Dios dagiti kararagmo gapu ta nakaaramidka iti nadagsen a basol, rumbeng a makisaritaka kadagiti nagannakmo. Kasta met nga ‘ayabam dagiti lallakay iti kongregasion’ tapno tulongandaka. (Santiago 5:14) Matulongandaka dagiti panglakayen tapno suminged manen ti relasionmo ken Jehova.

UTOBEM DAGITOY

  • Ania a dadduma a banag a napateg ken Jehova ti mabalinmo nga ikararag?
  • Ania a bambanag maipapan iti sabsabali ti mabalinmo nga ikararag ken Jehova?