Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  2008-09

Biag Kalpasan ti Ipapatay—Posible!

Biag Kalpasan ti Ipapatay—Posible!

 Biag Kalpasan ti Ipapatay—Posible!

ITI maysa a pelikula sumagmamano a tawen ti napalabasen, adda eksena a nangipakita iti maysa nga agtutubo a nakatakder iti abay ti tanem ti ing-ingungotenna. “Kanayon nga ibaga ni Nanang a ti ipapatay ket paset ti biag,” kinunana. Kalpasanna, bayat a naipokus ti kamera iti lapida, intuloy a kinuna ti agtutubo: “Nagsayaat koma no saan a kasta.”

Ti kasta a tarigagay iyanninawna ti rikna dagiti binilion a tattao a natayan iti ing-ingungoten. Anian a makarimon a kabusor ti ipapatay! Kaskasdi, inkari ti Dios: “Kas ti maudi a kabusor, ni patay mapukawto.” (1 Corinto 15:26) Ngem apay a matay ti tao idinto ta agparang nga adda kapasidadtayo nga agbiag nga agnanayon? Kasano a mapukaw ti ipapatay?

No Apay a Lumakay ken Mataytayo

No maipapan iti Namarsua kadatayo a ni Jehova a Dios, kuna ti Biblia: “Naan-anay ti aramidna.”  (Deuteronomio 32:4; Salmo 83:18) Naparsua a perpekto ti umuna a tao a ni Adan, ken mabalinna koma ti agbiag nga agnanayon idiay Eden, ti naindagaan a Paraiso a minuyongan a nangikabilan ti Dios kenkuana. (Genesis 2:7-9) Apay a napukaw ni Adan dayta a Paraiso a pagtaenganna ken nangrugi a lumakay ken matay?

Iti ababa a pannao: Sinukir ni Adan ti bilin a saan a mangan iti bunga ti maysa a kayo. Nalawag ti pakdaar ti Dios ken Adan maipapan iti dusa ti panangsukir iti dayta: “Mataykanto a di bumurong.” (Genesis 2:16, 17) Kas iti asawana a ni Eva, sinukir ni Adan dayta a bilin isu a pinapanaw ida ti Dios manipud Eden. Nainkalintegan ti insigida a panagtignay ti Dios, yantangay kuna ti Biblia: “Tapno [ni Adan] saanna a mayunnat ti imana ket pudno a mangala met iti bunga manipud iti kayo ti biag [iti hardin] ket mangan ket agbiag [iti agnanayon].”Genesis 3:1-6, 22.

Natay da Adan ken Eva gapu ta nagsukirda, ngem apay a lumakay ken matay ti amin a kaputotanda? Gapu ta tinawidda ti basol ni Adan, a nagresulta iti kinaimperpekto ken ipapatay ti tunggal kaputotanna. Kuna ti Biblia: “Babaen iti maysa a tao [a ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”Roma 5:12.

Posible ti Agbiag Manen

Kas nabasatayo itay, “ni patay mapukawto”—wen, mapukawto iti agnanayon! (1 Corinto 15:26) Kasano? Ilawlawag ti Biblia: “Babaen ti maysa nga aramid a panangpalinteg imbungana iti amin a kita ti tattao ti pannakaideklarada a nalinteg maipaay iti biag.” (Roma 5:18) Ania dayta nga aramid a mamagbalin a posible iti pananggun-od iti nalinteg a takder iti imatang ti Dios ken iti biag nga agnanayon?

Dayta ti probision nga inyurnos ti Dios tapno maikkat ti basol a natawid ti amin a tattao manipud ken Adan. Kuna ti Biblia: “Ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Kinuna ni Jesus maipapan iti daytoy a probision a mangideklara kadagiti tattao a nalinteg maipaay iti biag: “Ti Dios inayatna ti lubong [ti sangatauan] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”Juan 3:16.

Panunotenyo ti kadakkel ti panagayat ti Dios kadatayo, agraman ti Anakna a ni Jesu-Kristo, a nagsagaba iti nakaro maigapu kadatayo. Insurat ni apostol Pablo: ‘Ti Anak ti Dios inayatnak ken inyawatna ti bagina maipaay kaniak.’ (Galacia 2:20) Ngem apay a ni Jesus ti kakaisuna a tao a ‘makaited iti kararuana kas subbot’ agpaay kadatayo tapno maispaltayo manipud kadagiti makapapatay a resulta ti basol?Mateo 20:28.

Gapu ta ni laeng Jesus ti kakaisuna a tao a saan a nagtawid iti basol ni Adan. Kasano? Manipud langit, simimilagro a nayakar ti biag ni Jesus iti aanakan ni Maria, a maysa a birhen. Gapuna, kas kinuna ti anghel ken Maria, ti anakna ket “nasantuan, Anak ti Dios.” (Lucas 1:34, 35) Dayta ti makagapu a naawagan ni Jesus kas “ti maudi nga Adan” ken no apay a saanna a natawid ti basol “ti umuna a tao a ni Adan.” (1 Corinto 15:45) Kas maysa a tao nga  awanan iti basol, mabalin ngarud nga ited ni Jesus ti bagina kas “katupag a subbot”—ti biagna kas katupag ti sigud a perpekto, awan basolna nga umuna a tao.1 Timoteo 2:6.

Babaen ti probision a subbot, pinagbalin ti Dios a posible a magun-odtayo ti napukaw ti umuna nga Adan, ti biag nga agnanayon iti paraiso a daga. Ngem masapul nga agungar ti kaaduan iti sangatauan tapno matagiragsakda dayta a bendision. Anian a nagdayag a namnama! Ngem arapaap laeng kadi dayta?

No Apay a Nakappapati

Narigat kadi a patien a ni Jehova a Dios, ti gubuayan ti biag, kabaelanna a parsuaen manen ti tao a natayen? Usigenyo ti panaginaw—wenno panagsikog—a pinagbalin a posible ti Dios para iti umuna a babai. “Ni Adan nakidenna ken Eva,” ket kalpasan ti siam a bulan, maysa a maladaga a kaaspingda ti naipasngay iti daytoy a lubong. (Genesis 4:1) Agingga ita, ti pannakabukel ti sikog iti aanakan ni Eva ket maibilang a maysa a milagro, a saan a naan-anay a maawatan ti tao!Salmo 139:13-16.

Kaaduan a tattao ti di mangibilang a milagro ti panaganak yantangay gagangay a mapaspasamak dayta iti kada aldaw. Ngem no maipapan iti panangpagungar iti maysa a natayen, ibilang ti adu nga imposible dayta. Idi imbaga ni Jesus kadagiti agledleddaang nga isardengdan a sangitan ti natay a balasang, “rinugianda a katawaan a silalais” gapu ta ammoda a maysa daytoyen a bangkay. Ngem kinuna ni Jesus iti natay a balasang: “‘Bumangonka!’ Ket dagus a timmakder ti balasang ket nangrugi a nagna.” Mabasatayo: “Ket dagus a [dagidiay siiimatang] saanda a natngelan ti riknada buyogen ti dakkel a panagsiddaaw.”Marcos 5:39-43; Lucas 8:51-56.

Idi kiniddaw ni Jesus a maluktan ti tanem ti dungdungnguenna a gayyem a ni Lazaro, nagkedked ti kabsatna a ni Marta: “Itan nabuyoken, ta uppat nga aldawen.” Ngem anian a ragsakda idi a ni Jesus pinagungarna ni Lazaro! (Juan 11:38-44) Adu ti nakadamag kadagiti milagro nga inaramid ni Jesus. Bayat ti pannakaibalud ni Juan a Mammautisar, impadamag kenkuana dagiti adalanna ti maipapan kadagiti aramid ni Jesus, a kunkunada: “Dagiti natay maibangbangonda.”Lucas 7:22.

Agbiagto Manen Babaen ti Panagungar

Apay nga inaramid ni Jesus dagiti kasta a milagro, idinto ta nagsakit ken natay met laeng dagidi a pinagungarna? Inaramidna dayta kas pammaneknek a mabalin ken sigurado a maisubli ti napukaw ti umuna nga Adanti biag nga agnanayon iti paraiso a daga. Dagiti panangpagungar ni Jesus ipakitada no kasano a ti minilion a tattao “tagikuaendanto ti daga” ken “agtaengdanto nga agnanayon iti dayta.”Salmo 37:29.

Makaparagsak ta mabalin a maysatayto kadagidiay addaan iti nadayag a namnama nga agbiag nga agnanayon no alagadentayo ti “nadiosan a debosion.” Sigun iti Biblia, ti kasta a debosion ket “addaan iti kari a biag itan ken daydiay nga umay.” Dayta a ‘biag nga umay’ ket maaw-awagan met kas “ti napaypayso a biag” ken “ti pudpudno a biag.”1 Timoteo 4:8; 6:19; Ti Baro a Naimbag a Damag Biblia.

Usigentayo no ania daytoy a pudpudno a biag, ti biag iti umad-adani a nalinteg a baro a lubong.

[Ladawan iti panid 6]

“Saanda a natngelan ti riknada buyogen ti dakkel a panagsiddaaw”