Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! 2007-11

Mapagtalkan Kadi?

Mapagtalkan Kadi?

 Mapagtalkan Kadi?

“Saanka nga agtalek iti narukop a kayo,” insurat ti Ingles a dramatista a ni William Shakespeare. Kayatmo la ketdi a siguraduen a saan a narukop ti kayo a rangtay sakbay nga agtalaytayka iti dayta.

DAGITA a sasao ni Shakespeare ket maitunos iti kinuna ti masirib nga ari iti nagkauna nga Israel a ni Solomon, a nangisurat agarup 3,000 a tawenen ti napalabas: “Patien ti maag ti amin a mangngegna; annadan ti manakem ti pannagnana.” (Proverbio 14:15, Ti Baro a Naimbag a Damag Biblia) Wen, ti laeng maag ti sibubulsek a mamati iti aniaman a mangngegna, nga ibatayna dagiti pangngeddeng ken tignayna kadagiti mapagduaduaan a balakad wenno sursuro. Pakaisagmakantayo no di umiso ti pagtalkantayo, nga arigna a nagtalaytaytayo iti narukop a kayo. Mabalin a pampanunotem, ‘Adda kadi aniaman a mapagtalkantayo a giya?’

Minilion a tattao iti intero a lubong ti naan-anay nga agtalek iti maysa a nagkauna a libro—ti Nasantuan a Biblia. Agpapaiwanwanda iti daytoy a libro. Agdesisionda maitunos iti balakadna ken agtignayda maitunos kadagiti sursurona. Arigna kadi nga agbatbatay dagita nga indibidual kadagiti narukop a kayo? Ti sungbat iti dayta a saludsod ket agpannuray iti sungbat ti sumaganad a saludsod nga, Addada kadi naimbag a rason nga agtalektayo iti Biblia? Daytoy nga espesial a ruar ti Agriingkayo! usigenna dagiti pammaneknek.

Daytoy a ruar ti Agriingkayo! saanna nga ipilit nga awatenyo ti sumagmamano a narelihiosuan a patpatien wenno kapanunotan. Imbes ketdi, nairanta daytoy a mangidatag kadagiti natalged a pammaneknek a nangkombinsir iti minilion tapno agtalekda iti Biblia. Kalpasan a mabasayo dagiti sumaruno nga artikulo, maikeddengyonto no rumbeng nga agtalekkayo iti Biblia.

Saanyo la koma a basaen ti linaonna. No talaga a ti Biblia ket mapagtalkan a giya nga impaay ti Namarsua, pakagunggonaanyo ken kadagiti ay-ayatenyo no utobenyo dagiti linaonna.

Ngem usigentayo nga umuna ti dadduma kadagiti naisangsangayan a kinapudno maipapan iti Biblia. Awan duadua a naisangsangayan daytoy a libro.