Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  2006-06

Talna Ditoy Daga Kamaudiananna!

Talna Ditoy Daga Kamaudiananna!

PATIEN ti dadduma a babaen laeng iti kinaranggas, magun-odanda ti napolitikaan a wayawaya ken naespirituan a kinadalus—a ti laeng mangdadael a puersa ti makaikkat kadagiti dakes nga agtuturay. Kasta met a dadduma a gobierno us-usarenda ti pammutbuteng tapno mataginayon ti urnos ken mapagtulnogda dagiti umili. Ngem no agpayso a ti terorismo ket maysa nga epektibo a pamay-an ti panangituray ken panagbalbaliw iti kagimongan, mangpataud koma ngarud iti talna, kinarang-ay ken kinatalged. Kalpasanna, awanto ngarud koman ti kinaranggas ken buteng. Ngem nakitatayo kadin dagita a resulta?

Kinapudnona, ti terorismo pukawenna ti panagraem iti biag ken agtungpal iti panangibukbok iti dara ken kinaulpit. Gapu iti sakit ti nakem dagiti biktima, masansan a bumalesda, nga agtungpal iti ad-adda a panangirurumen ken nakarkaro a panagbibinnales.

Ti Kinaranggas Dina Solbaren Dagiti Parikuttayo

Rinibu a tawenen nga ikagkagumaan a mismo dagiti tattao a risuten ti parparikutda a nainaig iti politika, relihion, ken kagimongan. Nupay kasta, napaay amin dagiti panangikagumaanda. Agpayso ti kuna ti Biblia: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Kinuna ni Jesus: “Ti kinasirib agtalinaed wenno mapaay babaen kadagiti resultana.” (Mateo 11:19, The New Testament in Modern English, ni J. B. Phillips) Iti nalawlawa pay a kaipapananna, ipasimudaag dagitoy a prinsipio ti Biblia a ti terorismo ket maysa a palso a namnama. Saan a wayawaya ken kinaragsak dagiti bunga ti terorismo no di ket ipapatay, panagrigat, ken pannakadadael. Simmaknap iti maika-20 a siglo daytoy dakes a bunga, ket nangrugin a nagraira iti maika-21. Adu ti agkuna nga imbes a solusion, ti terorismo ket maysa kadagiti parikut.

“Inaldaw a namnamaek nga awan koma ti matay kadagiti miembro ti pamiliak wenno kadagiti gagayyemko . . . Nalabit kasapulantayo ti maysa a milagro.” Kasta ti insurat ti maysa nga ubing a nauram ti nakayanakanna a lugar gapu iti kinaranggas dagiti terorista. Ti imbagana ti mangipaganetget iti pampanunoten ti kaaduan: Saan a kabaelan ti tattao a solbaren dagiti parikut ti sangatauan. Ti laeng Namarsua iti tao ti makasolbar kadagiti agdama a pakarigatan ti daga, agraman terorismo. Ngem apay a rumbeng nga agtalektayo iti Dios?

No Apay a Maikari ti Dios a Pagtalkantayo

Ti maysa a makagapu ket kas ti Namarsua, inikkannatayo ni Jehova iti biag ken kayatna a tagiragsakentayo dayta buyogen ti talna ken pannakapnek. Natignay ti mammadto ti Dios a ni Isaias a nangisurat: “Ita, O Jehova, sika ti Amami. Dakami ti pila, ket sika ti Managdamilimi; ket dakami amin aramidnakami ta imam.” (Isaias 64:8) Ni Jehova ti Ama ti sangatauan, ket napateg kenkuana dagiti tattao iti amin a nasion. Saanna a basol ti kinaawan hustisia ken gura a mangiturong iti terorismo. Adda idi tiempo a kinuna ni masirib nga Ari Solomon: “Ti pudno a Dios inaramidna a nalinteg ti sangatauan, ngem isuda nagsapulda iti adu a gakat.” (Eclesiastes 7:29) Ti kinadakes ti tao ken impluensia dagiti demonio ti ramut ti terorismo, saan a ti kinaliway ti Dios.—Efeso 6:11, 12.

Ti maysa pay a makagapu a makapagtalektayo ken Jehova ket gapu ta pinarsuana dagiti tattao, ad-adda a maawatanna ngem iti siasinoman ti makagapu kadagiti parikut ti sangatauan ken no kasano a risuten dagitoy. Daytoy a kinapudno ket nailanad iti Biblia idiay Proverbio 3:19: “Ni met laeng Jehova imbangonna ti daga. Buyogen ti panangilasin impasdekna a sititibker ti  langlangit.” Buyogen ti naan-anay a panagtalekna iti Dios, kastoy ti insurat ti maysa a lalaki idi un-unana: “Itangadkonto dagiti matak kadagiti bantay. Sadino ti paggapuanto ti tulongko? Ti tulongko aggapu ken Jehova, ti Nangaramid iti langit ken daga.”—Salmo 121:1, 2.

Adda maikatlo a rason no apay a rumbeng nga agtalektayo iti Dios: Adda pannakabalinna a mangpasardeng iti naranggas a panangibukbok iti dara. Idi panawen ni Noe, “ti daga napno iti kinaranggas.” (Genesis 6:11) Kellaat ken naan-anay ti panangukom ti Dios: “[Ti Dios] saan a nagteppel a mangdusa iti kadaanan a lubong . . . idi nangyeg iti layus iti lubong dagiti di nadiosan a tattao.”—2 Pedro 2:5.

Ibaga ti Biblia ti maysa a leksion a masursurotayo manipud iti Layus idi kaaldawan ni Noe: “Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.” (2 Pedro 2:9) Mailasin ti Dios dagidiay sipapasnek nga agtarigagay iti nasaysayaat a biag ken dagidiay mangparparigat iti padada a tattao. Inkeddengna kadagitoy ti “pannakadadael dagiti di nadiosan a tattao.” Ngem kadagidiay agtarigagay iti talna, isagsaganana ti baro a daga a pagtaengan ti kinalinteg.—2 Pedro 3:7, 13.

Manayon a Talna Ditoy Daga!

Masansan nga inusar dagiti mannurat iti Biblia ti sao a “daga” a pangtukoy iti sangatauan. Kas pagarigan, ti Genesis 11:1 kunaenna nga “amin a daga,” dagiti tattao a sibibiag idi a tiempo, maymaysa ti pagsasaoda. Dayta a kayulogan ti pampanunoten ni apostol Pedro idi insuratna ti “baro a daga.” Pabaruento ni Jehova ti kagimongan ti tao iti wagas a ti kinalinteg ken kinahustisia ti mangsukat iti kinaranggas ken gura kas permanente nga “agtaeng” iti daga. Iti maysa a padto a nailanad iti Mikias 4:3, kuna ti Biblia kadatayo: “Pudno unay a mangukomto iti tengnga ti adu nga ili, ket ilintegna ti bambanag maipapan kadagiti nabileg a nasion iti adayo. Ket kasapulanto a pitpitenda dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Saandanto a mangitag-ay iti kampilan, nasion maibusor iti nasion, saandanto met a sursuruenen ti pannakigubat.”

Kasanonto ti panagbiag dagiti tattao inton matungpal dayta a padto? Kuna ti Mikias 4:4: “Pudno nga agtugawdanto, tunggal maysa iti sirok ti  puon ti ubasna ken iti sirok ti kayona a higos, ket awanto ti asinoman a mamagpigerger kadakuada.” Iti dayta naindagaan a Paraiso, awanton ti agbiag a mabutbuteng iti sumaganad nga iraraut dagiti terorista. Mapagtalkam aya dayta a kari? Wen, “ta ti mismo a ngiwat ni Jehova ti buybuyot sinaona dayta.”—Mikias 4:4.

No kasta, bayat nga agsaksaknap ti pammutbuteng dagiti terorista ken agkulkullayaw dagiti nasion gapu iti kinaranggas, ti panagtalek ken Jehova ti solusion para kadagiti agay-ayat iti talna. Awan parikut a dina marisut. Ikkatennanton ti pannakadangran, panagsagaba, ken uray ti ipapatay. Kuna ti Biblia: “Pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” (Isaias 25:8) Dagiti napateg a daga ti adu a tattao, a napno ita iti ladingit ken buteng gapu iti terorismo, ket agsagrapto iti naruay a bunga ti talna. Dayta a talna, nga inkari ti Dios a “saanna a mabalin ti agulbod,” ti kasapulan unay ti sangatauan.—Tito 1:2; Hebreo 6:17, 18.

Ammuem ti Ad-adu Pay

PROGRAMA A PANAGADAL ITI BIBLIA

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?

MASANSAN A MAISALUDSOD

Ania ti Panagadal iti Biblia?

Ammuem ti sungbat dagiti saludsod maipapan iti programa a libre a panagadal iti Biblia.