Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NO. 6 2016

 NO ANIA TI KUNA TI BIBLIA

Kinamanagsapsapa

Kinamanagsapsapa

Uray dagidiay managladladaw mamatida a napateg ti kinamanagsapsapa. Naglaon ti Biblia kadagiti makatulong a prinsipio mainaig iti daytoy.

Kasano kapateg ti kinamanagsapsapa?

NO APAY A NAPATEG

Nakita ti dadduma a talaga a maksayan ti stress-da no nasapsapada a sumangpet ngem iti nagtulagan nga oras. No managsapsapaka, sumayaat pay ti reputasionmo. Kasano?

Ipakpakitam a responsableka. No managsapsapaka, ipakpakitam nga ikagkagumaam a kontrolen ti biagmo imbes nga ipalubosmo lattan a dagiti situasion ti manglapped kenka a mangaramid kadagiti kayatmo nga aramiden.

Ipakpakitam a mapangnamnamaanka. Masansan itan a saan a tungtungpalen dagiti tattao dagiti kari wenno nagtulaganda isu a maapresiar dagidiay mangtungtungpal iti saoda. Dagiti mapangnamnamaan a tattao ket resrespetuen ti gagayyem ken kapamiliada. Kaykayat dagiti employer dagiti empleado a managsapsapa ken mangileppas iti trabaho sigun iti deadline. Mabalin nga ad-adda a pagtalkanda ken ingatoda pay ketdi ti sueldo dagiti mapangnamnamaan nga empleado.

TI KUNA TI BIBLIA

Adda dagiti bersikulo iti Biblia nga adda pakainaiganna iti kinamanagsapsapa. Kas pagarigan, kuna ti Biblia: “Masapul a maaramid nga umno ken naurnos ti amin a banag.” (1 Corinto 14:40, Ti Baro a Naimbag a Damag Biblia) No agtulag ti dua a tao nga agkitada iti espesipiko nga oras ken lugar, umno ken maitutop laeng a saanda a maladaw. Kuna pay ti Biblia: “Tunggal banag adda naituding a tiempo, ti mismo a tiempo iti tunggal aramid iti baba ti langlangit.” (Eclesiastes 3:1) Kuna ti sasao kalpasan daytoy a bersikulo nga adda “tiempo ti panagmula ken tiempo ti panagparut.” (Eclesiastes 3:2) Agmula dagiti mannalon iti umiso ken eksakto a tiempo tapno ad-adu ti maapitda. Iti sabali a pannao, nasayaat ti resultana no saan a maladaw nga agmula ti mannalon.

Adda pay ti ibagbaga ti Biblia a nasaysayaat a rason no apay a masapul a managsapsapaka: Ipakpakitam a resrespetuem ti sabsabali ken ikabkabilangam ti napateg a tiempoda. (Filipos 2:3, 4) Ngem dagidiay kanayon nga agpapauray, kasla taktakawenda ti tiempo dagidiay agur-uray.

“Itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.”Filipos 2:4.

 Ania ti aramidem tapno agbalinka a managsapsapa?

TI KUNA TI BIBLIA

Isingsingasing ti Biblia ti nasaksakbay a panagplano. (Proverbio 21:5) No mariknam a kanayonka a maladaw kadagiti appointment-mo, baka napno unayen ti eskediulmo. Mabalin ngata nga ikkatem iti eskediulmo dagiti aktibidad a saan unay a napateg ken mangsayang iti tiempom? Mangyeskediulka iti at-atiddog a pawayway no mapanka kadagiti nakitulagam ken ikagumaam ti sumangpet a nasapa. Iti kasta, saanka a maladaw no adda aberia kas iti trapik wenno saan a nasayaat a paniempo.

Ibagbaga pay ti Biblia a nasayaat ti panagbalin a naemma. (Proverbio 11:2) Kayatna a sawen, bigbigem dagiti limitasionmo. Sakbay nga awatem ti maysa nga appointment wenno deadline, panunotem no realistiko nga iramanmo pay dayta iti eskediulmo. No adu unay ti inyeskediulmo, saan laeng a sika ti ad-adda a ma-stress ken maupay, uray pay ti sabsabali!

Ibaga pay ti Biblia nga usarentayo a naimbag ti tiempotayo. (Efeso 5:15, 16) Iyun-unam nga aramiden dagiti kapatgan a trabaho. (Filipos 1:10) Kas pagarigan, bayat nga agbibiaheka wenno adda ur-urayem, usarem dayta a tiempo nga agbasa wenno mangiplano iti aldawmo.

“Dagiti gakat [wenno, plano] daydiay nasaet sigurado a mangipaay iti pagsayaatan.”Proverbio 21:5.