Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NO. 5 2016

 DAMDAMAG ITI LUBONG

Maipapan Kadagiti Pagilian iti America

Maipapan Kadagiti Pagilian iti America

Ipakita dagiti damdamag kadagiti pagilian iti America a talaga a napateg ti saan nga agkupas a prinsipio ti Biblia.

Kissayam ti Stressmo, Dika Unay Agtsetsek iti E-mail-mo!

Sigun iti research a naaramid idiay Vancouver, Canada, mabalin a makissayan ti stress-mo no mamitlo laeng iti maysa nga aldaw nga itsekmo ti e-mail-mo imbes a sangkakitam. Maibatay iti resulta dayta, kuna ti nangidaulo a ni Kostadin Kushlev: “Marigatan dagiti tattao a manglaban iti riknada a mangtsek iti e-mail-da, ngem makissayan ti stress-da no labananda dayta.”

PANUNOTEM: Agbibiagtayo iti “tiempo a narigat a pakilangenan” isu a saan kadi a masapul a mangkitatayo iti pamay-an a mangkissay iti stress-tayo?—2 Timoteo 3:1.

Immadu Manen Dagiti Ikan

Kuna ti report a naited iti Wildlife Conservation Society (WCS): “Adda dagiti naidokumento a kaso ti iyaadu dagiti ikan, pusapusa (conch), ken dakkel nga udang (lobster) kadagiti lugar a maiparit ti agkalap” idiay Belize ken dadduma pay a paset ti Caribbean. Innayonna: ‘Iti uneg laeng ti 1-6 a tawen, mabalin nga umadu manen ti populasion dagiti maib-ibusen a klase ti ikan nga agbibiag kadagiti lugar a maiparit ti agkalap, ngem mabalin a kasapulan ti adu a dekada tapno maisubli ti dati a kaaduda.’ Kinuna ti maysa a WCS program director a ni Janet Gibson maipapan iti Belize: “Nalawag a gapu kadagiti lugar a maiparit ti agkalap, maisubli manen ti dati a kaadu dagiti ikan iti pagilian ken ti agduduma a klase ti parsua.”

PANUNOTEM: Saan kadi a ti abilidad ti nakaparsuaan nga agsubli iti dati a kondisionna ket pammaneknek nga adda masirib a Namarsua?—Salmo 104:24, 25.

Kinaranggas Idiay Brazil

Kumarkaro ti kinaranggas idiay Brazil, sigun iti impadamag ti Agência Brasil. Idi 2012, ti bilang dagiti pammapatay ket nasuroken a 56,000—ti kangatuan pay laeng a nairekord ti Ministry of Health a kaso ti pammapatay iti uneg ti makatawen. Mamati ni Luís Sapori, maysa nga eksperto iti seguridad ti publiko, a dayta nga ikakaro ipakitana ti panagbaba ti moralidad. No awanen ti respeto dagiti tattao iti linteg ti sibilisado a komunidad, “mangrugidan a mangranggas tapno maalada ti kayatda,” kinunana.

AMMOM KADI? Impakpakauna ti Biblia ti tiempo a “lumamiisto” ti ayat dagiti tattao ken kumaro ti kinakillo.—Mateo 24:3, 12.