Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  No. 4 2017

 NO ANIA TI KUNA TI BIBLIA

Sulisog

Sulisog

Nadadael a panagasawa, sakit, nakaro a pannakakonsiensia​—dadduma laeng dagitoy kadagiti dakes a resulta no agpasulisog ti maysa. Kasanotayo a malisian daytoy a silo?

Ania ti sulisog?

Maipasangoka iti sulisog no maatrakarka iti maysa a banag​—nangruna iti dakes a banag. Kas pagarigan, bayat nga addaka iti mall, nagustuam ti maysa a banag. Bigla a napanunotmo a mabalin nga alistom la a matakaw dayta a didaka matiliwan. Ngem saan, kuna ti konsiensiam! Isu a binay-amon ket pimmanawkan. Iti dayta a gundaway, awanen ti sulisog, ket sika ti nangabak.

TI KUNA TI BIBLIA

 

Dina kayat a sawen a dakeska no maipasangoka iti sulisog. Ibaga ti Biblia a maipasangotayo amin iti sulisog. (1 Corinto 10:13) Ti napateg ket no ania ti aramidentayo no mapasamak dayta. Sangkapanunot ti dadduma ti di nasayaat a tarigagay agingga nga aramidendan dayta. Adda met dagiti dagus a mangiwaksi iti dayta ta ibilangda a dakes.

“Tunggal maysa masuot babaen ti pananggargari ken panangsulbog ti bukodna a derrep.”​—Santiago 1:14.

Apay a napateg nga adaywam a dagus ti sulisog?

Ipakita ti Biblia dagiti addang a mangiturong iti basol. Kuna ti Santiago 1:15: “Ti derrep, inton nayinawen, mangipasngay iti basol.” Kayatna a sawen, no sangkapanunottayo ti dakes a tarigagay, addanto tiempo a ditayon magawidan nga aramiden dayta a kas iti panaganak ti masikog a babai. Nupay kasta, kabaelantayo ti saan nga agpakontrol kadagiti di nasayaat a tarigagay. Ti agpayso, makontroltayo dagita.

TI MAITULONG TI BIBLIA

 

No kasano a kabaelan ti isiptayo nga iserrek dagiti dakes a tarigagay, kabaelanna met nga iruar dagita. Kasano? Mabalin nga agpokustayo iti sabali nga aktibidad, makisarita iti maysa a gayyem, wenno agpanunot iti nasayaat a banag. (Filipos 4:8) Makatulong met no panunotem ti resulta ti panagpasulisog kas iti dakes nga epektona iti emosion, espiritualidad, wenno iti salun-at. (Deuteronomio 32:29) Dakkel met ti maitulong ti kararag. Kinuna ni Jesu-Kristo: “Agkararagkayo nga agpatpatuloy, tapno saankayo a sumrek iti pannakasulisog.”​—Mateo 26:41.

“Dikay payaw-awan: Ti Dios saan a maysa a marabrabak. Ta aniaman nga imulmula ti maysa a tao, daytoyto met ti apitenna.”​—Galacia 6:7.

 Kasanom a mapatibker ti determinasionmo a di agpasulisog?

TI REALIDAD

 

Ti sulisog ket maysa nga appan, wenno pakat, a mangiturong iti tao a di agpampanunot, ignorante, wenno darasudos iti pagdaksanna. (Santiago 1:14) Awatem dayta a kinapudno. Nangnangruna nga agpayso dayta iti sulisog nga agaramid iti seksual nga immoralidad nga agresulta iti didigra.​—Proverbio 7:​22, 23.

TI MAITULONG TI BIBLIA

 

Kinuna ni Jesu-Kristo: “No, ita, dayta makannawan a matam itibtibkolnaka, suatem ket ibellengmo.” (Mateo 5:29) Siempre, saan a literal dayta! Ti kayatna a sawen, no kayattayo a paragsaken ti Dios ken agbiag nga agnanayon, masapul nga arigna papatayentayo dagiti paset ti bagitayo a mangiturong kadatayo nga agbasol. (Colosas 3:5) Mabalin a kaipapanan dayta a tallikudantayo a dagus ti sulisog. Inkararag ti maysa a matalek nga adipen ti Dios: “Iliklikmo dagiti matak manipud panangkita iti awan pategna.”​—Salmo 119:37.

Siempre, mabalin a narigat a kontrolen ti bagitayo ta ‘nakapuy ti lasag.’ (Mateo 26:41) Isu nga agkamalitayo. Ngem no talaga nga agbabbabawi ken ikarigatantayo a saan nga iyugali ti agaramid iti dakes, ‘kaasiannatayo’ ti Namarsua kadatayo a ni Jehova a Dios. (Salmo 103:8) Anian a makapabang-ar dayta!

“No dagiti biddut koma ti siputam, O Jah, O Jehova, siasino ti makapagtakder?”​—Salmo 130:3.