Mapan iti linaonna

Mapan iti listaan dagiti linaonna

Relasion iti Dios

Relasion iti Dios

Kas nadakamat iti rugi, adu ti mangibilang iti Biblia kas sagrado a libro. Ibagada a no basaenda ti Biblia ken iyaplikarda dagiti balakadna, mariknada a nadekketda iti Dios ken maawatanda ti panggep ti biag.

Inusar ti Biblia ti sasao nga “agpapaiwanwan iti Dios” kas maysa a kababalin wenno masapul nga aramiden iti biag. (Judas 18, 19) Saan a kas kadagiti tattao nga agtaltalek iti opinionda, dagiti agpapaiwanwan iti Dios ipatpategda dagiti pagalagadanna.​—Efeso 5:1.

NAMNAMA

PRINSIPIO TI BIBLIA: “No maupayka iti aldaw ti rigat, agkurangto ti pigsam.”​—Proverbio 24:10.

TI KAIPAPANANNA: Ti pannakaupay ibusenna ti pigsa a kasapulantayo a mangsango kadagiti problema. Ngem ti namnama papigsaenna ti pakinakemtayo tapno saantayo a sumuko. Makaliwliwa a maammuan a temporario laeng dagiti problematayo. Kinapudnona, mabalin nga adda nasayaat nga epekto dagita.

TI MABALINMO NGA ARAMIDEN: Matmatam a positibo dagiti mapasamak iti masanguanan. Imbes a pagdanagam ti mabalin a mapasamak wenno urayem a sumayaat ti bambanag, agtignayka maitunos kadagiti kalatmo. Siempre, mabalin a dumteng dagiti “di ninamnama a pasamak.” (Eclesiastes 9:11) Ngem kaaduanna a nasaysayaat pay ti pagbalinan dagiti bambanag ngem iti ekspektarentayo. Kas panangiladawan, inusar ti Biblia ti panagtalon. Imbagana: “Imulam ti bin-im iti bigat ket dimo paginanaen ti imam agingga iti rabii; ta dimo ammo no ania kadagita ti agballigi, no daytoy wenno daydiay, wenno agpadadanto a naimbag.”​—Eclesiastes 11:6.

SUNGBAT KADAGITI NAPATEG A SALUDSOD ITI BIAG

PRINSIPIO TI BIBLIA: “Ikkannak iti pannakaawat . . . Ti saom ket kinapudno.”​—Salmo 119:144, 160.

TI KAIPAPANANNA: Sungbatan ti Biblia dagiti isalsaludsod ti kaaduan a kas iti

  •   Nagtaudantayo?

  • Apay nga addatayo ditoy?

  • Ania ti mapasamak no matay ti tao?

  • Kastoy la ngatan ti biag?

Simmayaat ti biag ti minilion a tattao iti intero a lubong gapu ta ad-adalenda dagiti sungbat ti Biblia kadagita ken iti dadduma pay a saludsod.

TI MABALINMO NGA ARAMIDEN: Ammuem dagiti isursuro ti Biblia. Agpatulongka iti maysa kadagiti Saksi ni Jehova tapno tulongannaka a mangtarus iti Biblia. Bisitaem ti website-mi a jw.org, wenno umatenderka iti maysa kadagiti gimongmi. Libre dagita ken para iti amin a tattao.

DADDUMA PAY A PRINSIPIO TI BIBLIA

Buyaem ti video nga Apay nga Adalem ti Biblia? iti jw.org/ilo. Mabuya dayta iti nasurok a 880 a lengguahe

BIGBIGEM A KASAPULAM TI AGPAIWANWAN ITI DIOS.

“Naragsak dagiti sipapanunot iti naespirituan a kasapulanda.”​—MATEO 5:3.

AMMUEM TI AD-ADU PAY MAIPAPAN ITI DIOS NGA ISURSURO TI BIBLIA.

‘Sapulem ti Dios . . . ikagumaam a biroken . . . saan nga adayo iti tunggal maysa kadatayo.’​—ARAMID 17:27.

BASAEM KEN PANUNOTEM A NAIMBAG TI MENSAHE TI BIBLIA.

“Pagragsakanna ti linteg ni Jehova, * ken pampanunotenna a naimbag dayta a Linteg iti aldaw ken rabii. . . . Agballigi ti amin nga aramidenna.”​—SALMO 1:2, 3, footnote.

^ par. 23 Jehova ti nagan ti Dios a naipakaammo iti Biblia.