Mapan iti linaonna

Mapan iti listaan dagiti linaonna

 TULONG PARA KADAGITI NATAYAN

Ti Kasayaatan a Tulong Para Kadagiti Natayan

Ti Kasayaatan a Tulong Para Kadagiti Natayan

ITI NAPALPALABAS, TI SAEM NGA IYEG TI IPAPATAY TI MAYSA A PATPATGEN TI TOPIKO TI KAADUAN A PANAGADAL. Ngem kas nadakamaten, ti kasayaatan a balakad dagiti eksperto ket masansan a maitunos iti nagkauna a sirib a masarakan iti Biblia. Ipakita dayta a di agkupas ti panangiwanwan ti Biblia. Ngem saan laeng a mangted iti mapagtalkan a balakad. Mangipaay pay iti impormasion a makaliwliwa unay kadagiti natayan, a saan a mabirokan iti sadinoman.

  • Pammasiguro a saan nga agsagsagaba dagiti natay a patpatgentayo

    ‘Dagiti natay saanda a pulos sipapanunot iti aniaman,’ kuna ti Biblia iti Eclesiastes 9:5. ‘Mapukaw dagiti panunotda.’ (Salmo 146:4) Maitunos iti dayta, impada ti Biblia ti ipapatay iti naimas a turog.​—Juan 11:11.

  • Mangyeg iti liwliwa ti nabileg a pammati iti naayat a Dios

    Ibaga ti Biblia iti Salmo 34:15: “Dagiti mata ni Jehova * situturongda kadagidiay nalinteg, ket dagiti lapayagna situturongda iti panagpatulongda.” Ti panangyebkas iti riknatayo iti Dios iti kararag ket saan laeng a makaliwliwa wenno makatulong tapno makontroltayo ti panunottayo. Maaddaantayo pay iti nadekket a relasion iti Namarsua kadatayo, nga addaan iti pannakabalin a mangliwliwa kadatayo.

  • Nasaysayaat a masanguanan a padpadaanan

    Panunotem ti kasasaad inton mapagungar ditoy daga dagiti adda iti tanem! Namin-adu a dinakamat ti Biblia dayta a tiempo. Kas panangiladawan iti kasasaadto ditoy daga, kuna ti Biblia a ti Dios ‘punasennanto ti amin a lua kadagiti matatayo, ket awanton ni patay, awanto metten ti panagleddaang wenno panagsangit wenno ut-ot.’​—Apocalipsis 21:3, 4.

Adu a mamati ken Jehova, ti Dios iti Biblia, ti naliwliwa ta patienda a makitadanto manen dagiti natayen a patpatgenda. Kas pagarigan, kastoy ti imbaga ni Ann, a natay ni lakayna kalpasan ti 65 a tawen a panagasawada: “Impasigurado kaniak ti Biblia a saan nga agsagsagaba dagiti natayen a patpatgentayo ken pagungarento ti Dios ti amin nga adda iti lagipna. Dagitoy ti pampanunotek no malagipko ti napasamak, isu a nabaelak a sanguen ti karirigatan a pagteng iti biagko!”

Kinuna ni Tina, a nadakamat iti maysa nga artikulo iti daytoy a magasin: “Manipud idi natay ni Timo, nariknak ti tulong ti Dios. Talaga a nariknak a tinulongannak ni Jehova iti tiempo nga agladladingitak. Napaypayso unay kaniak ti panagungar a kari ti Biblia. Dayta ti mangpabpabileg kaniak a di sumuksuko agingga iti aldaw a makitak manen ni Timo.”

Kasta met laeng ti marikrikna ti minilion a tattao a kombinsido a mapagtalkan ti Biblia. Uray no panagriknam ket saan nga agpaypayso wenno tagtagainep laeng dagiti kari ti Biblia, sigurado a pagsayaatam no adalem dagiti ebidensia a mapagtalkan dagiti balakad ken karina. Makitamto a ti Biblia ti kasayaatan a makatulong kadagiti natayan.

AMMUEM TI AD-ADU PAY MAIPAPAN ITI NAMNAMA PARA KADAGITI NATAY

Buyaem dagiti video iti website-mi a jw.org/ilo

Ikari ti Biblia a makitatayto manen dagiti natayen a patpatgentayo

 ANIA TI KASASAAD DAGITI NATAY?

Ania ti mapasamak no mataytayo? Makaliwliwa ken makapabileg ti nalawag a sungbat ti Biblia

Kitaem ti PUBLIKASION > VIDEO (Kategoria ti Video: Ti Biblia)

KAYATMO KADI TI NAIMBAG A DAMAG?

Adu ita ti dakes a damag, ngem pakabirokam iti naimbag a damag? Iyam-ammo daytoy a video ti broshur a Naimbag a Damag Manipud iti Dios

Kitaem ti PUBLIKASION > VIDEO (Kategoria ti Video: Gimong ken Ministeriomi)

^ par. 7 Jehova ti personal a nagan ti Dios a masarakan iti Biblia.