Mapan iti linaonna

Mapan iti listaan dagiti linaonna

 TULONG PARA ITI PAMILIA | PANANGPADAKKEL ITI ANNAK

Ti Pateg ti Trabaho iti Balay

Ti Pateg ti Trabaho iti Balay

TI PROBLEMA

Iti dadduma a pamilia, manamnama a tumulong dagiti annak iti trabaho iti balay ket aramidenda dayta a saanda nga agrekreklamo. Adda met nagannak a saanda unay pagtrabahuen ti annakda. Kaykayat dayta dagiti ubbing isu a dida ipapati ti tumulong.

Nadlaw dayta dagiti researcher iti adu a pagilian. Kuna ti ama a ni Steven: ‘Mabaybay-an dagiti annak ita nga agvid-video games, agin-internet, ken agbuybuya iti TV. Bassit laeng ti manamnama kadakuada.’

Panagkunam? Napateg kadi a talaga ti trabaho iti balay, saan laeng a para iti pannakamantener ti balay no di ket para pay iti pagsayaatan ti anak?

TI MASAPUL A MAAMMUAM

Agpangadua ti dadduma a nagannak a mangibaon iti annakda a tumulong iti balay aglalo no nabuntonandan iti asaynment ken extracurricular activities. Ngem panunotem dagitoy a pagimbagan.

Makatulong iti panagnakem ti ubing. Dakdakkel ti posibilidadna a nangatngato ti grado ti annak a tumultulong iti balay. Saanen a pakasdaawan dayta ta no kasta ti aramidenda, maaddaanda iti kompiansa, disiplina iti bagi, ken determinasion a napateg iti panagsursuro.

Maisagana dagiti annak nga agbalin a manangtulong. Napaliiw ti dadduma a dagiti annak a tumultulong iti balay ket agbalin a mas manangtulong iti komunidad inton adultodan. Saan a pakasdaawan daytoy ta no tumultulongda iti balay, masansanayda met a mangyun-una iti kasapulan ti sabsabali. Ngem kinuna ni Steven a nadakamat itay: “No awan ti maekspektar kadagiti annak, ipapandanton a masapul a mapagserbianda ken dumakkelda a sabali ti kapanunotanda iti panagtrabaho ken responsabilidadda iti biag.”

Makatulong iti panagkaykaysa ti pamilia. Babaen ti pannakipagtrabahoda iti pagtaengan, saan laeng a mabigbig ti annak a napategda a miembro ti pamilia no di ket mariknada nga adda responsabilidadda iti dayta. Saanda a masursuro dayta no iparikna dagiti nagannak a napatpateg dagiti aktibidad iti eskuelaan ngem kadagiti trabaho iti balay. Panunotem, ‘Ania ti pagsayaatanna no agbalin a nadekket ti anakko iti basketball team-na ngem umadayo met ti riknana iti pamiliami?’

 TI MABALINMO NGA ARAMIDEN

Irugim bayat nga ubbingda pay. Adda dagiti mangibaga a masapul a maikkanen iti trabaho iti balay ti annak nga agtawen iti tallo. Irekomenda met ti dadduma a mabalinen uray dua laeng ti tawenda wenno awan pay. Ti punto? Maay-ayatan ti babassit pay nga annak nga agobra a kadua ti nagannakda ken tuladen ida.—Prinsipio ti Biblia: Proverbio 22:6.

Ibagaymo iti edadda. Kas pagarigan, mabalin nga ipakni ti tallo ti tawenna nga anak dagiti ay-ayam, punasen dagiti rugit, wenno pagsisinaen dagiti malabaan. Mabalin met nga agwalis dagiti daddadakkel nga annak, agdalus iti lugan, ken agsagana iti makan. Ibagaymo iti abilidad ti anakmo. Baka masorpresaka iti gagarna nga agtrabaho iti balay.

Iyun-una ti trabaho iti balay. Mabalin a narigat dayta no nabuntonan ti anakmo iti asaynment. Ngem no ilisim ti anakmo iti trabaho iti balay tapno laeng ngumato ti gradona, “seniales dayta ti kamali a prioridad,” kuna ti libro a The Price of Privilege. Kas naibagan, makatulong dagiti trabaho iti balay tapno agbalin ti annak a nalalaing nga estudiante. Ken dagiti masursuroda a leksion ket makatulong inton adda bukoddan a pamilia.—Prinsipio ti Biblia: Filipos 1:10.

Agpokuska iti panggep imbes nga iti resulta. Mabalin a nabaybayag a malpas ti anakmo ti impaobram ngem iti kayatmo. Baka mapaliiwmo met a nasaysayaat pay koma ti naaramidanna. No kasta ti mapasamak, liklikam koma a sublaten ti impaobram. Ti panggepmo ket saan a tapno aramidenna dayta kas iti maaramidan ti nataengan no di ket tapno tulongam a masursurona ti agbalin a responsable ken mariknana ti ragsak ti panagtrabaho.—Prinsipio ti Biblia: Eclesiastes 3:22.

Agpokuska iti agpayso a pagimbagan. Kuna ti dadduma a no tangdanam ti ubing no agtrabaho iti balay, agbalinda a responsable. Adda met mangibaga a mas agpokus dagiti annak iti maalada iti pamilia imbes nga iti maitulongda. Impakdaarda pay a baka agkedked ti anak nga agtrabaho no adda kuartana. Seniales dayta a dina naawatan ti pagsayaatan ti panagtrabaho iti balay. Ti leksion? Baka nasaysayaat no saanmo a tangtangdanan iti kuarta ti anakmo gapu iti panagtrabahona iti balay.