Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NO. 3 2016

 NADISENIO KADI?

Ti Tengnged ti Kuton

Ti Tengnged ti Kuton

AGBILBILIB dagiti mechanical engineer iti abilidad ti gagangay a kuton nga agbagkat kadagiti adayo a nadagdagsen ngem iti mismo a bagina. Kayat a maawatan dayta dagiti engineer iti Ohio State University, U.S.A., isu nga iti tulong ti kompiuter, nagaramidda iti modelo ti dadduma a parte ti bagi ti kuton, ti estrukturana, ken ti panaggunayna. Naaramid dagiti modelo babaen kadagiti X-ray cross-sectional images (micro CT scans) ken babaen ti panangtuladda iti puersa nga iruruar ti kuton no adda bagbagkatenna.

Ti tengnged ti kuton ket importante unay a parte ti bagina, ta dayta ti mangawit iti amin a dagsen ti am-ammalanna. Dagiti soft tissue iti tengnged ti kuton ket nakakonektar iti natangken a makinruar a paset ti bagi ken ulona. “Ti disenio ken estruktura daytoy a koneksion iti nagbaetan ti soft tissue (nalukneng a tisyu) ken ti natangken a makinruar a paset ti bagi ken ulo ti kuton ket nagpateg para iti panagandar ken trabaho ti joint ti tengngedna,” kuna ti maysa kadagiti researcher. “Ti naidumduma a pamay-an ti panagkinnonektar ti natangken ken nalukneng a banag ti posible a nangpatibker iti dayta a koneksion, ken mabalin a ti kasta a pannakadisenio ti makagapu a kabaelan ti joint ti tengnged ti kuton nga awiten ti nadagsen a banag.” Mangnamnama dagiti researcher a ti nalawag a pannakaawatda iti panagandar ken trabaho ti tengnged ti kuton ket makatulong tapno sumayaat pay ti panangdisenioda kadagiti robot.

Ania ti makunam? Gapu kadi iti ebolusion a napaadda ti komplikado ken nakatibtibker a tengnged ti kuton? Wenno adda nangdisenio iti dayta?

Ammuem ti Ad-adu Pay