Mapan iti linaonna

Mapan iti listaan dagiti linaonna

 LEKSION 2

No Kasano ti Agbalin a Napakumbaba

No Kasano ti Agbalin a Napakumbaba

ANIA TI KINAPAKUMBABA?

Nadayaw dagiti napakumbaba. Saanda a napangato, wenno dida met ekspektaren ti espesial a panangtrato kadakuada. Napudno ti interes ti napakumbaba iti sabsabali ken kayatna ti agsursuro kadakuada.

Pampanunoten ti dadduma a ti kinapakumbaba ket pagkapuyan. Ngem kinapudnona, pakakitaan dayta ti kinabileg a makatulong iti tattao a mangamin kadagiti kamalida ken mangbigbig kadagiti limitasionda.

APAY A NAPATEG TI KINAPAKUMBABA?

  • Ti kinapakumbaba ket mangpasayaat kadagiti relasion. “Kaaduanna, nalaklaka a makigayyem dagiti napakumbaba,” kuna ti libro a The Narcissism Epidemic. Kunana pay a “nalaklakada a makibagay.”

  • Ti kinapakumbaba ket mangpasayaat iti masakbayan ti anakmo. No masursurona ti kinapakumbaba, makatulong dayta kenkuana itan ken inton adulton​—kas pagarigan, inton agbirok iti trabaho. “No nangato ti panagkita ti agtutubo iti bagina ken dina bigbigen dagiti pagkapuyanna, saan a nasayaat ti impresion kenkuana ti manginterbiu inton agaplay iti trabaho,” insurat ni Dr. Leonard Sax. “Ngem mas posible a makastrek iti trabaho ti agtutubo a talaga nga interesado iti ibaga ti manginterbiu kenkuana.” *

NO KASANO NGA ISURO TI KINAPAKUMBABA

Iparegtam a balanse koma ti panagkitana iti bagina.

PRINSIPIO TI BIBLIA: “No panunoten ti maysa a tao nga isu ket importante idinto ta saan met, al-allilawenna ti bagina.”​—Galacia 6:3.

  • Dika agibaga iti makaallilaw a sasao. Kasla makaparegta ti sasao a kas iti “Matungpalto ti amin nga arapaapmo” ken “Kayam ti agbalin iti aniaman a kayatmo” ngem kaaduanna a di pumayso dagita. Ad-adda nga agballigi ti annakmo no rasonable dagiti ambisionda ken ikagumaanda a gaw-aten dagita.

  • Padayawam dagiti espesipiko nga inaramidna. Saan a mangiparegta iti kinapakumbaba ti basta panangibaga iti anakmo a “nakalalaing” isuna. Agbalinka nga espesipiko.

  • Limitaram ti panangusarna iti social media. Masansan a mausar ti social media iti panangitan-ok iti bagi—maipakpakita dagiti paglaingan ken nagapuanan ti maysa a tao—ti mismo a kasumbangir ti kinapakumbaba.

  •   Iparegtam nga agpadispensar a dagus. Ipaawatmo iti anakmo ti kamalina ken isurom nga aminenna dayta.

Isurom ti kinamanagyaman.

PRINSIPIO TI BIBLIA: “Ipakitayo a managyamankayo.”​—Colosas 3:15.

  • Panagyaman gapu kadagiti parsua. Masapul nga apresiaren dagiti ubbing ti nakaparsuaan ken masapul a maawatanda a nakadependetayo unay iti dayta tapno agtultuloy ti biagtayo. Kasapulantayo ti angin nga angsen, danum nga inumen, ken taraon a kanen. Usarem dagita tapno masursuroda ti mangapresiar, agsiddaaw, ken agyaman gapu kadagiti nakaskasdaaw a banag ditoy daga.

  • Panagyaman gapu kadagiti tattao. Ipalagipmo iti anakmo a nangatngato ti amin ngem isuna iti nadumaduma a pamay-an ken agsursuro kadakuada, imbes nga apalanna dagiti paglaingan ken abilidadda.

  • Panangyebkas iti panagyaman. Isurom iti annakmo a sipapasnek nga ibagada ti panagyamanda. Ti kinamanagyaman ti makatulong kadatayo nga agtalinaed a napakumbaba.

Isurom iti annakmo a napateg ti panagserbi iti sabsabali.

PRINSIPIO TI BIBLIA: “Agpakumbabakayo, nga ibilangyo a nangatngato ti sabsabali ngem dakayo, a sapulenyo dagiti pagimbagan ti dadduma, saan la a dagiti bukodyo a pagimbagan.”​—Filipos 2:3, 4.

  • Ibagam a tumulong kadagiti trabaho iti balay. No dimo ikkan iti trabaho iti balayyo, kasla ibagbagam iti anakmo, ‘Napatpateg dagiti kayatmo nga aramiden!’ Masapul a mayun-una dagiti trabaho iti balay imbes a ti panagay-ayam. Ipaganetgetmo no kasano a dagiti trabaho iti balay ket pagsayaatan ti dadduma ken no kasano nga isu ket maapresiar ken maraem no aramidenna dagita.

  • Iyunay-unaymo a maysa a pribilehio ti agserbi iti sabsabali. Maysa dayta a kangrunaan a pamay-an tapno agbalin a manakem. Iparegtam ngarud nga ammuenna no siasino dagiti agkasapulan iti tulong. Ilawlawagmo no ania dagiti maitulongna. Komendaram ken suportaram bayat nga agserserbi iti sabsabali.

^ par. 8 Manipud iti libro a The Collapse of Parenting.