Mapan iti linaonna

Mapan iti listaan dagiti linaonna

Ti panagtulnog kadagiti nagannak ket kas iti panagbayad iti utang iti banko. No kanayon nga agbayadka, ad-adda a pagtalkan wenno pautangandaka

 PARA ITI AGTUTUBO

10: Kinamapagtalkan

10: Kinamapagtalkan

TI KAIPAPANANNA

Ti mapagtalkan a tao maalana ti panagtalek dagiti nagannakna, gagayyemna, ken amona. Sursurotenna dagiti paglintegan, tungtungpalenna dagiti karina, ken kanayon nga ibagana ti pudno.

NO APAY A NAPATEG

Masansan a ti wayawaya a maited kenka ket agdepende iti kadakkel ti panagtalek a naalam iti panaglabas ti tiempo.

“Ti kasayaatan a pamay-an tapno maalam ti panagtalek dagiti nagannakmo ket babaen ti panagbalinmo a manakem ken responsable, kaduam man ida wenno saan.”​—Sarahi.

PRINSIPIO TI BIBLIA: “Itultuloyyo a paneknekan no aniakayo.”​—2 Corinto 13:5.

TI MABALINMO NGA ARAMIDEN

Makatulong dagiti sumaruno nga addang no kayatmo nga ad-adda a pagtalkandaka wenno maisubli ti panagtalekda kenka.

Agbalinka a napudno. Nagalisto a mapukaw ti panagtalekda kenka no agulbodka. Ngem no saanka nga agilimlimed wenno napudnoka​—aglalo kadagiti kamalim​—maalam ti panagtalek ti sabsabali.

“Nalaka laeng ti agbalin a napudno no nasayaat ti bambanag. Ngem no napudnoka uray maapektaran ti panangmatmatda kenka, ad-adda a pagtalkandaka.”​—Caiman.

PRINSIPIO TI BIBLIA: “Kayatmi ti agbiag a mapagtalkan iti amin a bambanag.”​—Hebreo 13:18.

Agbalinka a mapagtalkan. Iti maysa a surbey iti U.S., 78 a porsiento kadagiti kompania ti nangibaga a ti kinamapagtalkan ti “maysa kadagiti tallo a kapatgan a kababalin a birbirokenda kadagiti aplikante.” No sursuruem itan ti agbalin a mapagtalkan, pagsayaatamto dayta inton adultokan.

“Madlaw dagiti nagannakko no responsableak ken no ar-aramidek dagiti trabahok uray no saandak nga ibabaon. No kanayon a kasta ti aramidek, ad-adda a pagtalkandak.”​—Sarah.

PRINSIPIO TI BIBLIA: “Agtaltalekak iti itutulokmo, . . . yantangay ammok nga aramidemto ti ad-adda pay ngem ti bambanag nga ibagak.”​—Filemon 21.

Agan-anuska. Alisto a madlaw ti panagdakkel iti pisikal, ngem kasapulan ti tiempo tapno makita ti panagmataengan ken panagbalin a responsable.

“Saanmo a maala a mamimpinsan ti panagtalek dagiti nagannakmo ken ti dadduma. Ngem in-inut a maalam dayta no agtultuloy a responsableka.”​—Brandon.

PRINSIPIO TI BIBLIA: “Ikawesyo ti . . . kinaanus.”​—Colosas 3:12, Naimbag a Damag Biblia.