Mapan iti linaonna

Mapan iti listaan dagiti linaonna

Ti kalat ket kas iti plano ti balay; no agreggetka, maibangonmo dayta

 PARA ITI AGTUTUBO

12: Kalat

12: Kalat

TI KAIPAPANANNA

Ti kalat ket saan laeng a basta arapaap​—banag a kayatmo a mapasamak. Ti pudpudno a kalat ramanenna ti panagplano, panangbaliw no kasapulan, ken panagregget.

Dagiti kalat ket mabalin a babassit (malpas iti sumagmamano nga aldaw wenno lawas), kalkalainganna (bulbulan), ken dadakkel (makatawen wenno nasursurok pay). Mabalin a maragpat dagiti dadakkel a kalat babaen kadagiti babassit ken kalkalainganna a kalat.

NO APAY A NAPATEG

Ti panangragpat kadagiti kalatmo padakkelenna ti kompiansam, patibkerenna ti pannakigayyemmo, ken paragsakennaka.

Kompiansa: No agaramidka kadagiti babassit a kalat ken ragpatem dagita, tumuredka nga agaramid iti daddadakkel a kalat. Naturturedka met a mangsango kadagiti problema iti inaldaw​—kas iti panangpilit kenka dagiti kasadaram nga agaramid iti di umiso.

Pannakigayyem: Magusgustuan dagiti tattao ti makikadua kadagiti adda kalatna​—kayatna a sawen, dagiti ammoda ti kayatda ken ikagkagumaanda a ragpaten dagita. Kanayonanna, ti maysa kadagiti kasayaatan a mangpatibker iti panaggayyem ket ti panagtinnulong a mangragpat iti maymaysa a kalat.

Kinaragsak: No mangaramidka kadagiti kalat ken ragpatem dagita, mariknam nga adda maar-aramidam.

“Kaykayatko ti mangaramid kadagiti kalat. Gapu iti dayta, kanayon nga adda ar-aramidek ken adda pampanunotek a masapul a ragpatek. Ken no maragpatmo ti kalatmo, nagmayat ti riknam ken maibagam, ‘Wow, nalpasko met laeng! Naragpatko ti kalatko.’”​—Christopher.

PRINSIPIO TI BIBLIA: “No ur-urayem a sumayaat ti angin ken panawen, awan a pulos ti maimulam ket awanto met ti apitem.”​—Eclesiastes 11:4, Ti Baro a Naimbag a Damag Biblia.

TI MABALINMO NGA ARAMIDEN

Aramidem dagiti sumaganad tapno makaaramidka kadagiti kalat ken maragpatmo dagita.

Ilistam dagiti kalatmo. Isuratmo dagiti kalatmo, ken ammuem no ania ti aramidem nga umuna, maikadua, maikatlo, ken dadduma pay.

Agplanoka. Iti tunggal kalat, aramidem dagiti sumaganad:

  • Ikeddengmo ti realistiko a pannakairingpasna.

  • Planuem dagiti aramidem.

  • Ammuem dagiti posible a manglapped, ken no kasanom a solusionan.

Agtignayka. Dimo urayen a makompletom ti amin a detalye sakbay nga agtignayka. Isaludsodmo iti bagim, ‘Ania ti umuna nga aramidek tapno maragpatko ti kalatko?’ Sa aramidem dayta. Ammuem no ania ti naaramidam bayat a mairingpasmo ti tunggal addang.

PRINSIPIO TI BIBLIA: “Dagiti gakat [wenno, plano] daydiay nasaet sigurado a mangipaay iti pagsayaatan.”​—Proverbio 21:5.