Mapan iti linaonna

Mapan iti listaan dagiti linaonna

Ania a klase a tugot ti kayatyo a suroten dagiti annakyo?

 PARA ITI NAGANNAK

8: Ulidan

8: Ulidan

TI KAIPAPANANNA

Dagiti nasayaat a nagannak ar-aramidenda dagiti isursuroda. Kas pagarigan, saanyo a namnamaen nga agbalin a napudno ti anakyo no mangngegna a kunayo, “Ibagam nga awanak,” no diyo kayat a kasarita ti adda iti ruangan.

“Popular ti pagsasao nga ‘Aramidem ti ibagak, saannak a tuladen.’ Ngem saan nga epektibo dayta kadagiti annak. Kasda la espongha a mangagsep iti amin nga ibaga ken aramidentayo, ken ibagada no ditay ar-aramiden ti isursurotayo kadakuada.”​—David.

PRINSIPIO TI BIBLIA: “Sika, a mangikaskasaba iti ‘Dika agtakaw,’ agtakawka aya?”​—Roma 2:21.

NO APAY A NAPATEG

Dakdakkel ti impluensia dagiti nagannak kadagiti ubbing ken uray kadagiti tin-edyer nga annakda ngem iti siasinoman​—karaman dagiti kaedadda. Ipakita dayta a dakayo a nagannak ti kasayaatan a mangidalan kadagiti annakyo no la ket ta aramidenyo ti isursuroyo.

“Uray maminsangagasut nga ulitentayo nga ibaga ti maysa a banag, ditay ammo no dumdumngeg ti anaktayo, ngem ti maminsan laeng a ditay panangaramid iti imbagatayo, ammona dayta. Kitkitaen dagiti annaktayo ti amin a garawtayo uray no panagkunatayo ket saanda nga agsipsiput.”​—Nicole.

PRINSIPIO TI BIBLIA: “Ti sirib manipud ngato . . . saan a managinsisingpet.”​—Santiago 3:17.

TI MABALINYO NGA ARAMIDEN

Sukimatenyo dagiti pagalagadanyo. Ania dagiti magusgustuanyo a buyaen? Kasano ti panangtratoyo iti asawa ken annakyo? Siasino dagiti gagayyemyo? Maseknankayo kadi iti sabsabali? Iti sabali a pannao, kas kadi kadakayo ti kayatyo a pagbalinanto dagiti annakyo?

“Saanmi nga ipapaaramid iti annakmi dagiti banag a dimi ar-aramiden ken lakayko.”​—Christine.

Agpadispensarkayo iti kamaliyo. Ammon dagiti annakyo nga imperpektokayo. Ngem no ibagayo a “Pakawanennak” no nagkamalikayo​—iti asawayo ken iti annakyo—sursuruanyo ida nga agbalin a napudno ken napakumbaba.

“Masapul a mangngeg dagiti annaktayo nga aminentayo dagiti kamalitayo ken agpadispensartayo, ta no saan, dida masursuro nga aminen ti kamalida.”—Robin.

“Datayo a nagannak ti kasayaatan a mangimpluensia kadagiti annaktayo, ket ti ulidantayo ti kasayaatan nga alikamentayo ta kanayonda a makitkita dayta. Kaslatay iti libro a kanayon a nakalukat a pakasursuruanda.”—Wendell.