Mapan iti linaonna

Mapan iti listaan dagiti linaonna

Makita iti Toledo ti pakabuklan a historia ken kultura ti Spain. Napili idi 1986 kas maysa a World Heritage site ken popular a pagpaspasiaran dagiti turista

 LUGLUGAR KEN TATTAO

Panagpasiar Idiay Spain

Panagpasiar Idiay Spain

AGDUDUMA a buya ken klase ti tattao ti makita idiay Spain. Kaaduan a paset ti Spain ket naaplagan iti kataltalonan ti trigo, kaubasan, ken kakaykaywan ti olibo. Iti abagatan, 14 a kilometro laeng ti danum a namagsina iti Spain ken iti kontinente ti Africa.

Adu ti immakar ken dimmappat iti daytoy nga abagatan a laud a paset ti Europa. Karaman kadakuada dagiti Phoenician, Greek, ken Carthaginian manipud iti North Africa. Idi nakadanon dagiti Romano iti dayta a lugar idi maikatlo a siglo B.C.E., sinakup ken inawaganda iti Hispania. Kalpasanna, sinakup dayta dagiti Visigoth sa dagiti Moor. Agpada a nangibatida iti pakakitaan ti kulturada.

Iti nabiit pay a tawen, nasurok nga 68 a milion ti bimmisita iti Spain. Kaaduanna a gapu dayta iti nagmayat a  paniempo, bimmalitok a darat iti baybay, ken kadagiti artistiko, historikal, ken arkitektural a kinabaknang ti pagilian. Adu met a bisita ti maatrakar kadagiti makan iti Spain. Ti gagangay a makan sadiay ket seafood, sinuoban a ham, nananam a lauya, salad, ken natnateng a naluto wenno nalaokan iti olive oil. Sikat iti intero a lubong dagiti Spanish omelet, paella, ken tapas.

Ti Mariscada ket maysa a gagangay a seafood a putahe

Agsalsala iti flamenco

Mannakigayyem ken managpasiar dagiti Spanish. Kaaduan ti mangibaga a Katolikoda ngem medio bassit laeng ti makimismisa. Kadagiti napalabas a tawtawen, adu ti immakar idiay Spain a taga-Africa, Asia, ken Latin America. Adu kadakuada ti maragragsakan a makisarsarita maipapan iti patpatien ken kostumbre ti relihionda. Nagsayaat ti resulta ti pannakisarita kadakuada dagiti Saksi ni Jehova ken natulonganda ida a mangammo iti isursuro ti Biblia iti adu a topiko.

Idi 2015, nasurok a 10,500 a Saksi ti nagbulontario nga agibangon wenno ag-renovate iti 70 a paggigimonganda a maawagan Kingdom Hall. Dagiti daga a nakaibangonan ti dadduma kadagita a proyekto ket impadawat dagiti munisipalidad. Tapno matulongan dagiti imigrante, mangang-angay dagiti Saksi ni Jehova kadagiti gimong iti nasurok a 30 a lengguahe, puera pay ti Spanish. Idi 2016, nasurok a 186,000 ti immatender iti espesial nga okasion dagiti Saksi ni Jehova tapno lagipenda ti ipapatay ni Jesu-Kristo.