Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Agriingkayo!  |  No. 2 2016

 NO ANIA TI KUNA TI BIBLIA

Panagdandanag

Panagdandanag

Mabalin a pagsayaatan wenno pagdaksan ti panagdandanag. Tulongannatayo ti Biblia a mangilasin iti dayta a dua nga epektona.

Normal laeng kadi ti agdanag?

TI REALIDAD

Karaman iti panagdandanag ti rikna a saan a makatalna, panagnerbios, wenno panagaburido. Gapu ta awan ti sigurado iti lubong a pagbibiagantayo, adda dagiti panawen nga agdanagtayo.

TI KUNA TI BIBLIA

Insurat ni Ari David: “Kasano ti kapaut ti panagibturko iti riribuk? Mano pay nga aldaw ken rabii nga agladingitak?” (Salmo 13:2, Ti Baro a Naimbag a Damag Biblia) Ania ti nakatulong ken David? Imbukbokna ti amin a linaon ti pusona iti Dios babaen iti kararag, ken naan-anay a nagtalek iti ayat ken asi ti Dios. (Salmo 13:5; 62:8) Kinaagpaysuanna, aw-awisennatayo ti Dios nga ipabagkattayo kenkuana dagiti pakadagsenantayo. “Iyallatiwyo kenkuana ti isuamin a pakaringgoranyo, agsipud ta isu maseknan kadakayo,” kuna ti 1 Pedro 5:7.

No adda aramidentayo a banag para kadagiti ipatpategtayo, maksayan ti panangidandanagtayo kadakuada

Ngem kaaduanna nga adda dagiti maaramidantayo tapno makontroltayo ti panagdandanagtayo. Kas pagarigan, idi nakarikna ti mannurat iti Biblia a ni Pablo iti ‘panagdanag [para] iti amin a kongregasion,’ inaramidna ti amin tapno maliwliwa ken maparegta ida. (2 Corinto 11:28) Iti dayta a kaso, nasayaat ti epekto ti panagdandanagna ta natignay a mangted iti kasapulan a tulong. Mabalin a kasta met ti epekto kadatayo ti panangidandanagtayo iti dadduma. Ngem no ditayo marikna dayta wenno awan bibiangtayo, ipakpakita dayta a saantayo a sipapanunot iti pagimbagan ti dadduma.Proverbio 17:17.

“Saan la a ti pagimbaganyo ti kitaenyo. Kitaenyo met ti pagimbagan ti tunggal maysa.”Filipos 2:4, Ti Baro a Naimbag a Damag Biblia.

 Ania ti aramidem no saanen a rasonable ti panagdandanagmo?

TI REALIDAD

Adda dagiti mabalin a makonkonsiensia gapu kadagiti napalabas a dakes nga aramidda, wenno madandanagan gapu iti masanguanan wenno iti kuarta. *

TI KUNA TI BIBLIA

Pannakakonsiensia gapu kadagiti napalabas a dakes nga aramid: Sakbay a nagbalin a Kristiano ti dadduma a tattao idi umuna a siglo, mammartek, manangkikil, immoral, ken mannanakawda. (1 Corinto 6:9-11) Imbes a sangkapanunotda ti napalabasda, nagbalbaliwda ken nagtalekda a nakasagana ti Dios a mangipakita iti asi kadakuada. “Ta adda kenka [Apo Dios] ti pudno a panangpakawan, tapno iti kasta mapagbutnganka,” kuna ti Salmo 130:4.

Panagdanag gapu iti masanguanan: “Dikay pulos maringgoran maipapan iti sumaganad nga aldaw,” kuna ni Jesu-Kristo, “ta ti sumaganad nga aldaw addaanto kadagiti bukodna a pakaringgoran.” (Mateo 6:25, 34) Ania ti puntona? Dagiti laeng problema iti agdama nga aldaw ti problemaem. Dimon naynayonan dagita babaen ti panangpanunotmo iti problema iti sumaruno nga aldaw ta mabalin a mapukaw ti kinabalansem ket agdarasudoska nga agdesision. Laglagipem met nga adu a pakadanagan ti mabalin a makitamto nga awan met gayam nakaibatayanda.

Panagdanag gapu iti kuarta: Inkararag idi ti maysa a masirib a tao: “Saannak nga ikkan iti kinakurapay wenno uray kinabaknang.” (Proverbio 30:8) Imbes ketdi, inkagumaanna ti agbalin a kontento, banag a nangparagsak iti Dios. Kas mabasa iti Hebreo 13:5: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinuna [ti Dios]: ‘Saankanto a pulos panawan ket saankanto a pulos baybay-an.’” Dagidiay agtalek iti kuarta ket mabalin a madismayanto laeng. Ngem saanto a pulos paayen ti Dios dagidiay agtaltalek kenkuana ken agbibiag a simple.

“Saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.”Salmo 37:25.

Addanto kadi tiempo nga awanen ti panagdandanag?

TI KUNA TI DADDUMA

“Sabsabali itan ti panagdandanag dagiti tattao,” kuna ti journalist a ni Harriet Green iti maysa nga artikulo ti The Guardian idi 2008. Idi 2014, insurat ni Patrick O’Connor iti The Wall Street Journal nga “ita pay laeng ti kakaruan a nairekord a panagdandanag dagiti Amerikano.”

TI KUNA TI BIBLIA

“Ti panagdanag nga adda iti puso ti maysa a tao isunto ti mamagrukob iti dayta, ngem ti naimbag a sao isu ti mamagrag-o iti dayta.” (Proverbio 12:25) Ti talaga a “naimbag a sao” ket masarakan iti naimbag a damag ti pagarian ti Dios. (Mateo 24:14) Dandanin aramiden ti Pagarian, wenno gobierno ti Dios, ti banag a saantayo pulos a maaramidan—pagpatinggaennanto ti panagdandanag babaen ti panangpukawna iti ramut dayta, a pakairamanan ti sakit ken ipapatay! “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”Apocalipsis 21:4.

“Ti Dios a mangipaay iti namnama punnuennakay koma iti isuamin a rag-o ken talna babaen iti panamatiyo.”Roma 15:13.

^ par. 10 Nasayaat no agpakonsulta iti doktor dagiti addaan iti nakaro a sakit a panagdandanag. Saan a mangirekrekomenda ti Agriingkayo! iti aniaman a kita ti panangagas.

Ammuem ti Ad-adu Pay

TI PAGWANAWANAN

Agtalekka Kadi iti Dios?

Ammuem no kasano nga agbalinka a naragsak no maam-ammom ti Dios kas mapagtalkan a gayyem.

ANIA A TALAGA TI ISURSURO TI BIBLIA?

Pinanggep Kadi ti Dios Daytoy?

Mabalin a pampanunotem no apay a nagadu ti problema ita. Ammom kadi nga ibagbaga ti Biblia nga agbaliwto ti kasasaad ken mabenepisiarankanto?