Mapan iti linaonna

Mapan iti listaan dagiti linaonna

 TI DALAN TI KINARAGSAK

Panggep iti Biag

Panggep iti Biag

ADU TI NAKAIDUMAAN TI TAO—MAKASURAT, MAKAPINTA, MAKAIMBENTO, KEN MAKAPANUNOT KADAGITI NAPATEG A SALUDSOD: Apay nga adda ti uniberso? Kasanotayo a napaadda? Ania ti panggep ti biag? Ania ti mapasamak iti masanguanan?

Saan a kayat a panunoten ti dadduma dagita a saludsod ta ipagarupda a saanda a masungbatan. Kuna met ti dadduma nga awan serserbi dagita a saludsod ta ti biag ket produkto ti ebolusion. “Awan dagiti dios, awan panggep,” kinuna ti propesor iti historia ken biologo a ni William Provine. Innayonna: “Awan ti pudpudno a nakaibatayan ti naimbag ken dakes, awan ti pudpudno a panggep ti biag.”

Ngem saan nga awaten ti dadduma dayta a negatibo a kapanunotan. Makitkitada a ti uniberso ket adda sursurotenna nga eksakto ken nasayaat ti pannakadiseniona a linteg. Masmasdaawda kadagiti agkakapintas a disenio iti nakaparsuaan ket ikagkagumaanda a tuladen dagita kadagiti imbensionda. Dagiti makitkitatayo a komplikado a disenio ipabigbigda nga adda nalaing a nangdisenio kadagita, saan a basta timmaud lattan.

Dagita a panagrasrason ti nangtignay iti dadduma nga ebolusionista a mangbalbaliw iti kapanunotanda. Kitaem ti dua a pagarigan:

NEUROSURGEON, DR. ALEXEI MARNOV. Kinunana: “Kadagiti nageskuelaak, naisuro ti ateismo ken ebolusion. Maibilang nga ignorante ti asinoman a mamati iti Dios.” Ngem idi 1990, nagbaliw dayta a kapanunotanna.

Inlawlawagna: “Inkagumaak nga ammuen no ania dagiti lohikal a panggep dagiti bambanag, agraman ti utek ti tao. Ti nakaskasdaaw nga utek ket umiso la unay a maawagan iti kakomplikaduan a banag iti uniberso. Ngem nadisenio laeng kadi ti utek nga agurnong iti impormasion ken agsursuro sa matay? Kasla saan a nainkalintegan dayta. Isu a pinampanunotko: ‘Apay nga addatayo ditoy lubong? Ania ti panggep ti biag?’ Nagpanunotak a naimbag ket naawatak nga adda Namarsua.”

Kayat a maammuan ni Alexei ti panggep ti biag isu a nagadal iti Biblia. Di nagbayag, nagadal met iti Biblia ni baketna a maysa met a doktor ken ateista, ngem idi damo kayatna laeng a paneknekan a kamali ni lakayna! Ita, agpadadan a mamati iti Dios ken maawatandan ti panggep ti Dios iti tao a nailawlawag iti Kasuratan.

PLASMA SCIENTIST, DR. HUABI YIN. Nagadal iti physics ni Huabi Yin ket adu a tawen a nagsukimat maipapan iti plasma. Ti plasma (kas ti adda iti init) ket maibilang a maikapat a kategoria ti banag ken kangrunaan a buklen dagiti electron ken positive ion.

Kuna ni Huabi: “No ad-adalenmi a sientista dagiti nakaskasdaaw a bambanag iti aglawlaw, kanayon a makitami ti nagpaiduma nga urnos, a resulta dagiti eksakto a linteg. Mapampanunotko, ‘Kasano a timmaud dagita a linteg? No ti apuy a pagluto ket masapul a makontrol a naimbag, asino ti adda iti likud dagiti linteg a mangkonkontrol iti bara ti init?’ Idi agangay, naikunak a ti umuna a sasao iti Biblia ti talaga a lohikal a sungbat: ‘Idi punganay, ti Dios pinarsuana ti langlangit ken ti daga.’”—Genesis 1:1.

Sigurado a nasungbatan ti siensia ti adu a saludsod a “kasano,” kas iti: Kasano nga agandar dagiti selula ti utek? Kasano a mangpatpataud ti init iti bara ken lawag? Ngem kas nakita da Alexei ken Huabi, sungbatan ti Biblia dagiti napatpateg a saludsod nga “apay”: Apay nga adda ti uniberso? Apay nga adda dagiti linteg a sursurotenna? Ken apay nga addatayo ditoy lubong?

Kuna ti Biblia maipapan iti daga: “[Ti Dios] saanna a pinarsua [ti daga] a maipaay laeng iti awan kapapay-anna, a nangbukel iti dayta tapno mapagnaedan.” (Isaias 45:18) Wen, adda panggep ti Dios para iti daga, ken kas ipakita ti sumaruno nga artikulo, dayta a panggep ket konektado unay iti namnamatayo iti masanguanan.