Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

AGRIINGKAYO! NO. 1 2017

 TULONG PARA ITI PAMILIA | PANAGASAWA

No Kasano nga Ipakita ti Apresasion

No Kasano nga Ipakita ti Apresasion

TI PROBLEMA

Nagpateg nga ipakita ti apresasion tapno naragsak ti panagasawa. Ngem adu nga agassawa ti saanen a makadlaw iti nasayaat nga ugali ni baket wenno lakayda, isu a lallalo pay a saanda a maipakita ti apresasionda. Iti libro nga Emotional Infidelity, nadlaw ti maysa a mamalbalakad nga adu kadagiti agassawa a mapmapan kenkuana “ti ad-adda a maproblemaan iti saan a mapaspasamak [iti panagasawada] ngem iti mapaspasamak. Umayda iti opisinak tapno ibagada ti masapul a baliwan, saan a ti masapul a pagtalinaeden. Ti kamali dagitoy a pagassawaan ket ti saanda a panangipakita iti ayat babaen ti apresasion.”

Kasano a maliklikanyo dayta a silo kas agassawa?

TI MASAPUL A MAAMMUAM

Maksayan ti stress iti panagasawa no iyebkas ti apresasion. No ikagumaan ti asawa a lalaki ken asawa a babai a kitaen ken apresiaren dagiti nasayaat a kababalin ti maysa ken maysa, gagangay a sumayaat ti relasionda. Maksayan pay ti nakaro a tension no marikna ti agassawa ti apresasion ti tunggal maysa.

Para iti asawa a babai. “Adda tendensia ti adu a babbai a di mangikabilangan iti nakaro a pannaka-stress dagiti lallaki gapu iti responsabilidadda a mangipaay iti kasapulan ti pamiliada,” kuna ti nadakamat a libro itay nga Emotional Infidelity. Iti dadduma a komunidad, adda dayta nga stress uray agpada nga agtrabtrabaho ti agassawa.

Para iti asawa a lalaki. Masansan a tagtagilag-anen dagiti lallaki ti adu nga ar-aramiden ni baketda para iti pamiliada, iti man panagtrabaho iti sekular, panangpadakkel iti annak, wenno panangasikaso iti balay. Kuna ni Fiona * nga agarup tallo a tawenen a naasawaan: “Agkamalitayo amin, ket no agkamaliak, madi ti riknak iti bagik. Isu a no ibaga ni lakayko nga adda naaramidak a nasayaat iti pagtaenganmi, kas kadagiti trabaho iti balay, mariknak nga ay-ayatennak latta uray adda pagkamkamaliak. Mariknak pay a supsuportarannak ken mas maapresiarko ti bagik!”

Ngem no marikna ti maysa nga asawa a saan a maipatpateg, mabalin nga agpeligro ti panagasawada. Kuna ti asawa a babai a ni Valerie: “No saanmo a marikna nga ap-apresiarennaka  ti asawam, nalaka a matnag ti riknam iti maysa a mangap-apresiar kenka.”

TI MABALINMO NGA ARAMIDEN

Agbalin a managpaliiw. Iti sumaruno a lawas, siputam dagiti nasayaat nga ugali ti asawam. Kitaem dagiti ar-aramidenna tapno agtalinaed a naurnos ti amin iti balayyo—dagiti bambanag a mabalin a dimo pay naapresiar. Iti ngudo dayta a lawas, ilistam (1) dagiti maapresiarmo nga ugali ti asawam ken (2) dagiti inaramidna a pagsayaatan ti pamiliayo.—Prinsipio ti Biblia: Filipos 4:8.

Apay a masapul ti agbalin a managpaliiw? Kuna ti asawa a babai a ni Erika: “Kalpasan ti mano a tawen nga agassawakayo, mabalin a saanmon a maap-apresiar ti asawam. Saanmon a kitkitaen dagiti nasayaat nga ar-aramidenna ket mabalin a kitkitaem laengen dagiti saanna nga ar-aramiden.”

Saludsodem iti bagim: ‘Saanko kadin nga ap-apresiaren ti panagbannog ti asawak?’ Kas pagarigan, no adda tartarimaanen ni lakaymo iti balayyo, saanka kadin nga agyamyaman kenkuana ta ibilangmo a responsabilidadna met dayta? No maysaka nga asawa a lalaki, ipapanmo kadi a saanen a kasapulan ni baketmo ti pammadayaw iti panangikagumaanna a mangpadakkel iti annakyo ta ar-aramidenna met laeng ti manamnama kenkuana? Iyugalim a kitaen ken apresiaren ti amin nga ar-aramiden ti asawam para iti pagimbagan ti pamiliayo, bassit man dayta wenno dakkel.— Prinsipio ti Biblia: Roma 12:10.

Kanayon a mangted iti pammadayaw. Saan la nga ibaga ti Biblia nga agbalintayo a managyaman. Kunana pay: “Ipakitayo a managyamankayo.” (Colosas 3:15) Isu nga ikagumaam nga iyugali ti agyaman iti asawam. Kuna ti asawa a lalaki a ni James, “No ibaga ni baketko nga ap-apresiarenna dagiti ar-aramidek, ad-adda pay nga ikagumaak ti agbalin a nasaysayaat nga asawa ken nayonak pay ti ar-aramidek para iti panagasawami.”—Prinsipio ti Biblia: Colosas 4:6.

Tumibker ti relasion dagiti agassawa no ipakitada ti apresasionda iti maysa ken maysa. Kuna ti asawa a lalaki a ni Michael: “Mamatiak nga adu koma nga agassawa ti di nagsina no nagpokusda kadagiti magusgustuanda iti maysa ken maysa.” Intuloyna: “No adda dagiti problema, saan a dagus a panagsina ti solusionda ta kanayon a maipalpalagip kadakuada dagiti nasayaat nga adda kadakuada.”

^ par. 9 Nabaliwan ti dadduma a nagan.

Ammuem ti Ad-adu Pay

AGRIINGKAYO!

Ania ti Kuna ti Biblia Maipapan iti Kinamanagyaman?

Adu ti napaneknekanen a pagsayaatan ti panangipakita iti kinamanagyaman. Ania ti maitulong dayta kenka, ken kasanom a mapatanor?