Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NO. 1 2017

Ti masirib a babai surotenna ti diktar ti konsiensiana

 NO ANIA TI KUNA TI BIBLIA

Aborsion

Aborsion

Tinawen a nasurok a 50 a milion a sikog ti inggagara a maiparparegreg. Ad-adu pay dayta ngem iti populasion ti adu a pagilian.

Agdepende kadi iti maysa a tao no makuna a dakes ti aborsion wenno saan?

TI KUNA TI DADDUMA

Agduduma ti rason nga agparegreg dagiti babbai. Mabalin a gapu ta narigat ti biagda, adda problema iti relasionda iti dadduma, kayatda a nawayada a mangituloy iti panageskuela wenno propesionda, wenno saanda a kayat ti agbalin a balasang nga ina. Ngem ibilang ti dadduma a dakes ti aborsion ta panangtallikud dayta iti responsabilidad a naited iti masikog a babai.

TI KUNA TI BIBLIA

Para iti Dios, sagrado ti biag, nangruna ti biag ti tao. (Genesis 9:6; Salmo 36:9) Agaplikar dayta a prinsipio iti sikog a dumakdakkel iti tian ti ina, ti lugar a dinisenio ti Dios a natalged a pagyanan ti maisiksikog nga ubing. Kuna ti maysa a mannurat ti Biblia: “Pinagtalinaednak a nalingedan iti tian ni inak.” Innayonna: “Dagita matam nakitada uray pay ti maisiksikog a bagik, ket iti librom naisurat dagiti amin a pasetna, no maipapan iti al-aldaw idi a nabukelda.”—Salmo 139:13, 16.

Makita pay iti Linteg ti Dios para iti nasion ti Israel ken iti intedna a konsiensiatayo no ania ti pangibilanganna iti biag ti di pay nayanak nga ubing. Sigun iti Linteg ti Dios, mapapatay ti tao a nakadangran iti maysa a masikog a nakatayan ti sikogna. Ti biag ti nakapatay ti ibayadna iti napukaw a biag. (Exodo 21:22, 23) Siempre, masapul met nga ikabilangan dagiti ukom ti motibo ken kasasaad.—Numeros 35:22-24, 31.

Naikkan met dagiti tattao iti konsiensia. No denggen ti maysa nga ina ti konsiensiana babaen ti panangrespetona iti biag ti sikogna, natalna ti panunotna ta nadalus ti konsiensiana. * Ngem no dina suroten ti diktar ti konsiensiana, mabalin a riribuken ken sidiren ti konsiensiana. (Roma 2:14, 15) Kinapudnona, ipakita dagiti panagadal a dakdakkel ti posibilidadna nga agpasar iti panagdandanag ken depression dagiti nagparegreg a babbai.

Ngem kasanon no kasla mabuteng ti nagannak a mangpadakkel iti anakda, aglalo no di naiplano ti panagsikog? Panunotenyo ti makaliwliwa a kari ti Dios kadagiti matalek wenno nasungdo a sumursurot iti paglinteganna: “Iti daydiay nasungdo agtignaykanto a sisusungdo; iti awan pagkuranganna, nabaneg a lalaki [wenno babai] makilangenkanto nga awan pagkuranganna.” (Salmo 18:25) Mabasatayo pay: “Ni Jehova ket managayat iti kinahustisia, ket saannanto a panawan dagidiay nasungdona.”—Salmo 37:28.

“Ti konsiensiada makipagsaksaksi kadakuada ket, iti nagbabaetan ti bukodda a pampanunot, maak-akusar wenno mapakawanda pay ketdi.”Roma 2:15.

 Kasanon no nagparegregka idi?

TI KUNA TI DADDUMA

Kinuna ni Ruth, a maysa nga agsolsolo nga ina: “Tallo idin ti babassit nga annakko ken nariknak a diakon maaywanan ida no manayonan pay. Ngem kalpasan a nagparegregak, nariknak nga adda nagdakes a naaramidak.” * Ngem saan kadin a mapakawan ti Dios ti naaramidanna?

TI KUNA TI BIBLIA

Impakita ni Jesu-Kristo ti kapanunotan ti Dios iti dayta a situasion idi imbagana: “Immayak agayab, saan a kadagiti nalinteg a tattao, no di ket kadagiti managbasol tapno agturongda iti panagbabawi.” (Lucas 5:32) Wen, no pudpudno a pagladingitantayo ti dakes a naaramidantayo ken agbabawitayo, ken dumawattayo iti pammakawan iti Dios, isu ket nakasagana a mangpakawan kadatayo—uray kadagiti nadagsen a basol. (Isaias 1:18) “Ti puso a nadunor [wenno, nasugatan] ken naidagel, O Dios, saanmonto nga umsien,” kuna ti Salmo 51:17.

Malaksid iti nadalus a konsiensia, ikkan ti Dios ti maysa nga agbabbabawi iti talna ti panunot no sipapakumbaba nga agkararag kenkuana. “Babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo,” kuna ti Filipos 4:6, 7. * Idi nagadal ni Ruth iti Biblia ken imbukbokna ti linaon ti pusona iti Dios, naaddaan iti talna ti panunot. Naammuanna nga adda “pudno a panangpakawan” ti Dios.—Salmo 130:4.

[Ti Dios] saanna met nga inyeg kadatayo ti maikari kadatayo sigun kadagiti bidduttayo.”Salmo 103:10.

^ par. 8 Uray no posible nga agpeggad ti salun-at ti maysa nga ina wenno ti sikogna, saan a nainkalintegan nga iparegregna dayta. No bayat ti panaganak ti ina ket masapul nga agpili ti agassawa no ti biag ti ina wenno ti ubing ti masalbar, ti agassawa ti masapul nga agdesision. Nupay kasta, manmanon a mapasamak ti kasta iti adu a nabaknang a pagilian gapu iti irarang-ay ti medisina.

^ par. 12 Nabaliwan ti nagan.

^ par. 14 Makaited met iti talna ti panunot ti namnama a panagungar. Kitaem ti “Salsaludsod Dagiti Agbasbasa” iti ruar ti Pagwanawanan nga Abril 15, 2009, a mangilawlawag kadagiti prinsipio ti Biblia a mangiparipirip iti posibilidad nga agungar ti natay a sikog.