Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

AGRIINGKAYO! NO. 1 2016

Am-ammom Kadi Dagiti Saksi ni Jehova?

Am-ammom Kadi Dagiti Saksi ni Jehova?

Makitkitanakami a mangaskasaba iti publiko a lugar. Mabalin nga addan dagiti nabasam a damdamag wenno nangngegmo iti sabsabali maipapan kadakami. Ngem talaga kadi nga am-ammom dagiti Saksi ni Jehova?

SUBOKEM TI PANNAKAAMMOM

Tsekam no husto wenno saan a husto ti kada sentensia.

HUSTO SAAN A HUSTO

  1. Kristiano dagiti Saksi ni Jehova.

  2. Creationist dagiti Saksi ni Jehova.

  3. Saan nga agpadpadoktor dagiti Saksi ni Jehova.

  4. Akseptaren dagiti Saksi ni Jehova ti intero a Biblia.

  5. Ti laeng Biblia nga impatarus dagiti Saksi ni Jehova ti us- usarenda.

  6. Binaliwan dagiti Saksi ni Jehova ti Bibliada tapno bumagay iti patpatienda.

  7. Awan bibiang dagiti Saksi ni Jehova iti komunidad.

  8. Nababa ti panagkita dagiti Saksi ni Jehova kadagiti miembro ti sabali a relihion.

Ammuem dagiti sungbat kadagiti sumaruno a panid.

  1.  1 HUSTO. Porsegidokami a mangsurot a naimbag kadagiti pannursuro ni Jesu-Kristo ken mangtulad kadagiti kababalinna. (1 Pedro 2:21) Ngem adu ti nakaidumaanmi iti dadduma a relihion a maaw-awagan a Kristiano. Kas pagarigan, naammuanmi nga isursuro ti Biblia a ni Jesus ket Anak ti Dios ken saan a paset ti Trinidad. (Marcos 12:29) Patienmi a matay ti kararua ken awan a pulos ti ibaga ti Biblia nga agnanayon a parparigaten ti Dios dagiti dakes a tattao idiay impierno. Patienmi met a dagiti mangidadaulo iti aktibidad ti relihion ket saan a maiparbeng a maaddaan kadagiti awag a mangipangato kadakuada iti dadduma.—Eclesiastes 9:5; Ezequiel 18:4; Mateo 23:8-10.

  2. 2 SAAN A HUSTO. Mamatikami nga inaramid ti Dios ti amin a bambanag. Ngem saanmi nga akseptaren ti patpatien ti adu a mamati iti creationism. Apay? Maikontra ngamin iti Biblia ti dadduma nga ideya dagiti creationist. Kas pagarigan, ibaga ti dadduma a ti 6 nga aldaw a panamarsua ket literal nga addaan iti sag-24 nga oras. Ngem ti sao nga “aldaw” iti Biblia ket mabalin a tumukoy iti napapaut a tiempo ngem iti 24 nga oras. (Genesis 2:4; Salmo 90:4) Adda pay ketdi dagiti creationist a mangisursuro a sumagmamano a ribu pay laeng ti edad ti daga. Ngem ipakita ti Biblia a nabayagen a naparsua ti daga ken ti uniberso sakbay pay ti innem nga aldaw a panamarsua. 1Genesis 1:1.

  3. 3 SAAN A HUSTO. Agpadpadoktorkami met. Doktor pay ketdi ti dadduma kadakami, kas ken Lucas a maysa a Kristiano idi umuna a siglo. (Colosas 4:14) Ngem saanmi nga awaten ti aniaman a panangagas a maikontra kadagiti prinsipio ti Biblia. Kas pagarigan, saankami nga agpapayalison wenno agpaspasaksak iti dara gapu ta iparit ti Biblia ti panangipauneg iti dara.—Aramid 15:20, 28, 29.

    Ngem kayatmi ti kasayaatan a pannakaagas para kadakami ken iti pamiliami. Kinapudnona, dagiti panangagas a nairanta idi para kadagiti pasiente a Saksi a makatulong tapno bassit laeng ti rummuar ken masayang a dara bayat ti panagopera ket pakabembenepisiaranen ti amin. Iti adu a nasion, mabalinen a maliklikan ti asinoman a pasiente dagiti posible a dakes a resulta ti panagpasaksak iti dara, kas iti sakit a mayakar babaen iti dara, abnormal a panagandar ti immune-system, ken panagkamali ti tao.

  4. 4 HUSTO. Mamatikami a ti intero a Biblia ket “impaltiing [wenno impaisurat] ti Dios ken makagunggona.” (2 Timoteo 3:16) Agpada a karaman iti dayta ti aw-awagan ti kaaduan a Daan a Tulag ken ti Baro a Tulag. Kaaduanna nga awaganmi dagita iti Hebreo a Kasuratan ken Kristiano a Griego a Kasuratan. Iti kasta, maliklikan ti impresion nga adda dagiti paset ti Biblia a kadaananen wenno saanen nga importante.

  5.  5 SAAN A HUSTO. Adu a patarus ti us-usarenmi iti panagadalmi iti Biblia. Ngem kadagiti lengguahe a nakaipatarusanen ti Baro a Lubong a Patarus ti Nasantuan a Kasuratan, talaga a maapresiarmi dayta gapu iti panangusarna iti nagan ti Dios, iti kinaumisona, ken iti kinalawagna. Panunotem ti pannakausar ti nagan ti Dios a Jehova. Iti maysa a patarus ti Biblia, makita iti introduksionna ti listaan ti nagan ti 79 a tattao a nakatulong iti pannakaileppasna. Ngem iti dayta met la a patarus, dimo pulos mabasa ti nagan ti mismo nga Autor ti Biblia, ni Jehova a Dios! Naiduma ti Baro a Lubong a Patarus ta insublina ti nagan ti Dios iti rinibu nga orihinal a nagparanganna. 2

  6. 6 SAAN A HUSTO. Idi nakitami nga adda dagiti patpatienmi a saan a siento porsiento a maitunos iti Biblia, binalbaliwanmi ti pannakaawatmi. Sakbay pay a marugian ti pannakaaramid ti Baro a Lubong a Patarus ti Nasantuan a Kasuratan idi 1950, nabayagen nga inus-usarmi dagiti patarus nga adda idi ken imbataymi kadagita dagiti patpatienmi.

  7. 7 SAAN A HUSTO. Adu ti matultulongan ti trabahomi a panangasaba ken panangisuro iti Biblia. Adun ti natulonganmi a mangisardeng kadagiti bisioda, kas iti panagbarbartek ken panagdroga. Iti intero a lubong, rinibun ti natulongan gapu iti programami a panangisuro nga agbasa ken agsurat. No adda met dagiti dumalapus a kalamidad, mangmangtedkami kadagiti material a tulong agpada kadagiti Saksi ken saan a Saksi. Liwliwaenmi met dagiti biktima ken tultulonganmi ida tapno mariknada nga ay-ayaten ida ti Dios. 3

  8. 8 SAAN A HUSTO. Sursurotenmi ti balakad ti Biblia a ‘raemen ti amin a tattao’—aniaman ti relihionda. (1 Pedro 2:17, Ti Baro a Naimbag a Damag Biblia) Kas pagarigan, uray no ginasut a ribu ti bilangmi iti dadduma a nasion, saanmi a pilpiliten dagiti politiko wenno dagiti agpampanday iti linteg tapno paritan wenno limitaranda ti aktibidad ti dadduma a relihion. Saanmi met nga ikamkampania nga adda maipatungpal a linteg a mangobligar kadagiti tattao a mangsurot kadagiti moral a prinsipio ken patpatienmi. Imbes ketdi, resrespetuenmi ti sabsabali a kas met iti kayatmi a panangrespetoda kadakami.—Mateo 7:12.

Naglaon daytoy nga artikulo kadagiti impormasion a naala iti opisial a website-mi a jw.org/ilo. Tapno ad-adu pay ti maammuam, mapanka iti MAIPAPAN KADAKAMI > MASANSAN A MAISALUDSOD.

^ 1. Gapu iti dayta, saan a kas iti dadduma a creationist, saankami a kontra kadagiti mapagtalkan a panagadal iti siensia a mangipakita a mabalin a binilion a tawenen ti kabayag ti daga.

^ 2. Ti nakaidumaan pay ti Baro a Lubong a Patarus ket libre a maiwarwaras dayta. Isu a minilionen ti makabasa iti Biblia iti nakayanakanda a pagsasao. Mabasan ti Baro a Lubong a Patarus iti agarup 130 a lengguahe. Mabasam pay dayta online iti www.jw.org/ilo.

^ 3. Maysa kadagiti pangus-usaranmi kadagiti donasion ket ti pangtulong kadagiti biktima ti kalamidad. (Aramid 11:27-30) Gapu ta boluntario dagiti agtrabaho, dagiti pondo ket mausar amin a pangsaranay, saan ket a pangsueldo kadagiti mangidadaulo iti dayta a trabaho.

Ammuem ti Ad-adu Pay

Ania ti Maar-aramid iti Kingdom Hall?

Kitaem a mismo ti maar-aramid iti uneg ti Kingdom Hall.

Kasano ti Panagadal iti Biblia?

Iti intero a lubong, pagaammo dagiti Saksi ni Jehova a mangituktukon iti libre a panagadal iti Biblia. Buyaem no kasano a maar-aramid dayta.

Apay a Naawagankami iti Saksi ni Jehova?

Ammuem ti tallo a makagapu.