Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Umadanika ken Jehova

Pakauna

Pakauna

Patgenmi nga Agbasa:

Mariknam kadi a nasingedka iti Dios? Kadagiti adu, kasla imposible dayta. Pagarupen ti dadduma nga adayo unay ti Dios; adda met dagidiay makarikna a saanda a pulos a maikari nga umadani kenkuana. Nupay kasta, siaayat nga idagadag kadatayo ti Biblia: “Umadanikayo iti Dios, ket isu umadaninto kadakayo.” (Santiago 4:8) Impanamnamana pay kadagiti agdaydayaw kenkuana: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”—Isaias 41:13.

Kasanotay a maaddaan iti kasta a nasinged a relasion iti Dios? Naibatay ti singgalut ti aniaman a panaggayyem iti panangammo iti tao a kayattay a gayyemen, panangraem ken panangipateg kadagiti naisalsalumina a kababalinna. No kasta, nasken nga adalentayo dagiti galad ken daldalan ti Dios, a naipalgak iti Biblia. Ad-adda a sumingedtayo iti Dios no utobentayo ti wagas a panangiparangarang ni Jehova iti tunggal maysa kadagiti galadna, no maammuantayo no kasano a naan-anay nga inyanninaw ni Jesu-Kristo dagita a galad, ken no matarusantayo no kasanotay met a mapatanor dagitoy. Maawatantayto a ni Jehova ti maikari ken awan pagkuranganna a Soberano iti uniberso. Maysa pay, isu ti Ama a kasapulantay amin. Yantangay nabileg, nalinteg, masirib, ken naayat, pulos a dina baybay-an dagiti matalek nga annakna.

Sapay koma ta tulongannaka daytoy a libro nga ad-adda a suminged ken Jehova a Dios, a maaddaan iti relasion kenkuana a dinto aggibus uray kaanoman tapno maidaydayawmo iti agnanayon.

Dagiti Nangipablaak