Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Umadanika ken Jehova

 KAPITULO 2

Talaga Kadi a ‘Makaadanika iti Dios’?

Talaga Kadi a ‘Makaadanika iti Dios’?

1, 2. (a) Ania ti kasla imposible kadagiti adu, ngem ania ti ipasigurado kadatayo ti Biblia? (b) Ania a nasinged a relasion ti nagun-od ni Abraham, ken apay?

ANIA ti riknam no kunaen ti Namarsua iti langit ken daga maipapan kenka, “Daytoy ti gayyemko”? Nalabit kasla imposible dayta kadagiti adu. Kasano koma ngamin a mabalin a makigayyem ken Jehova a Dios ti maysa laeng a tao? Nupay kasta, ipasigurado kadatayo ti Biblia a talaga a makaadanitayo iti Dios.

2 Maysa ni Abraham idi un-unana a nangtagiragsak iti kasta a kinasinged. Inawagan ni Jehova dayta a patriarka kas “gayyemko.” (Isaias 41:8) Wen, imbilang ni Jehova a nasinged a gayyemna ni Abraham. Nagun-od ni Abraham ti kasta a nasinged a relasion gapu ta “naaddaan iti pammati ken Jehova.” (Santiago 2:23) Uray met itatta, agbirbirok ni Jehova kadagiti gundaway tapno ‘makisinggalut’ kadagidiay agserserbi kenkuana a maigapu iti ayat. (Deuteronomio 10:15) Idagadag ti Saona: “Umadanikayo iti Dios, ket isu umadaninto kadakayo.” (Santiago 4:8) Agpada a masarakantayo ti awis ken kari kadagitoy a sasao.

3. Ania ti iyaw-awis ni Jehova kadatayo, ket ania a kari ti nainaig iti dayta?

3 Aw-awisennatayo ni Jehova nga umadani kenkuana. Sisasagana ken sidadaan a mangawat kadatayo kas gagayyemna. Kasta met, ikarina a no ikagumaantayo ti umadani kenkuana, kasta met laeng ti aramidenna. Umadani kadatayo. Iti kasta, matagiragsaktayo ti banag a pudno a napateg—“kinasinged ken Jehova.” * (Salmo 25:14) Ti “kinasinged” ipasimudaagna ti ideya maipapan iti kompidensial a pannakisarita iti naisangsangayan a gayyem.

4. Kasano ti panangiladawanmo iti nasinged a gayyem, ket iti ania a wagas a kasta ti pannakigayyem ni Jehova kadagidiay umadani kenkuana?

 4 Adda kadi nasinged a gayyemmo a mabalinmo a pagtalkan? Maseknan kenka ti kasta a gayyem. Agtalekka kenkuana, gapu ta napaneknekan ti kinasungdona. Ad-adda ti rag-om no iranudmo dayta kenkuana. Nalaklakam nga ibturan ti ladingitmo gapu ta imdengannaka a buyogen ti pannakipagrikna. Uray no kasla awanen ti makaawat kenka, maawatannaka. Umasping iti dayta, no umadanika iti Dios, maaddaanka iti naisangsangayan a Gayyem a pudno a mangipatpateg, maseknan unay, ken naan-anay a makaawat kenka. (Salmo 103:14; 1 Pedro 5:7) Agtalekka a naimpusuan kenkuana, gapu ta ammom nga isu ket nasungdo kadagidiay nasungdo kenkuana. (Salmo 18:25) Nupay kasta, magun-odtayo daytoy naisangsangayan a kinasinged iti Dios gapu laeng ta pinagbalinna a posible dayta.

Linuktan ni Jehova ti Dalan

5. Ania ti inaramid ni Jehova tapno mabalintayo ti umadani kenkuana?

5 No iti kabukbukodantayo, kas managbasol ditay pulos makaadani iti Dios. (Salmo 5:4) “Ngem ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo,” kuna ni apostol Pablo. (Roma 5:8) Wen, inyurnos ni Jehova nga ‘ited ni [Jesus] ti kararuana kas subbot a kasukat dagiti adu.’ (Mateo 20:28) Ti pammatitayo iti dayta a daton a subbot pagbalinenna a posible ti iyaadanitayo iti Dios. Yantangay ti Dios ti “immuna a nagayat kadatayo,” isu ti nangisaad iti pundasion tapno mabalintay ti makigayyem kenkuana.—1 Juan 4:19.

6, 7. (a) Kasanotayo nga ammo a ni Jehova ket saan a nakalemmeng ken di maam-ammo a Dios? (b) Kadagiti ania a wagas nga impalgak ni Jehova ti kinasiasinona?

6 Adda pay sabali nga addang nga inaramid ni Jehova: Impalgakna kadatayo ti kinasiasinona. Iti aniaman a panaggayyem, ti kinasinged ket maibatay iti pudno a panangam-ammo iti maysa a tao, nga ipategmo dagiti galad ken kababalinna. Gapuna, no nakalemmeng ken di maam-ammo a Dios ni Jehova, ditay pulos makaadani kenkuana. Ngem imbes nga ilemmengna ti  bagina, kayatna a maam-ammotayo. (Isaias 45:19) Maysa pay, ti ipalgakna maipapan kenkuana ket mabalin nga ammuen ti amin, uray dagidiay maibilbilang kadatayo a nanumo sigun kadagiti estandarte ti lubong.—Mateo 11:25.

Impalgak ni Jehova ti bagina babaen kadagiti parsuana ken ti naisurat a Saona

7 Kasano nga impalgak ni Jehova kadatayo ti kinasiasinona? Dagiti parsuana ti mangipakaammo iti dadduma a banag maipapan iti personalidadna—ti kinadakkel ti pannakabalinna, ti kinauneg ti siribna, ti kinaaglaplapusanan ti ayatna. (Roma 1:20) Ngem saan laeng a dagiti pinarsua ni Jehova ti mangipalgak iti kinasiasinona. Yantangay isu ti Naindaklan a Mannakikomunikar, nangipaay iti naisurat a palgaak maipapan kenkuana iti Saona, ti Biblia.

Panangkita iti “Kinamakaay-ayo ni Jehova”

8. Apay a maikuna a ti mismo a Biblia ket pammaneknek iti ayat ni Jehova kadatayo?

8 Ti mismo a Biblia ket pammaneknek iti ayat ni Jehova kadatayo. Iti Saona, ipalgakna ti kinasiasinona babaen ti sasao a matarusantayo—ebidensia a saannatayo laeng nga ay-ayaten no di ket kayatna nga isu ket am-ammuen ken ayatentayo. Ti mabasatayo iti daytoy nagpateg a libro tulongannatayo a mangkita iti “kinamakaay-ayo ni Jehova” ken tignayennatayo nga agtarigagay nga umadani kenkuana. (Salmo 90:17) Usigentayo ti dadduma kadagiti makaay-ayo a wagas a panangipalgak ni Jehova iti bagina babaen ti Saona.

9. Ania ti sumagmamano a direkta a sasao iti Biblia a mangipabigbig kadagiti galad ti Dios?

9 Naglaon ti Kasuratan iti adu a direkta a sasao a mangipabigbig kadagiti galad ti Dios. Imutektekanyo ti sumagmamano a pagarigan. “Ni Jehova ket managayat iti kinahustisia.” (Salmo 37:28) Ti Dios ket “natan-ok iti pannakabalin.” (Job 37:23) “‘Nasungdoak,’ kuna ni Jehova.” (Jeremias 3:12) “Isu masirib iti puso.” (Job 9:4) Isu ket “maysa a Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno.” (Exodo 34:6) “Sika, O Jehova, naimbagka ken sisasagana a mamakawan.” (Salmo 86:5) Ken, kas  nadakamat iti immuna a kapitulo, adda maysa a kangrunaan a galad: “Ti Dios ket ayat.” (1 Juan 4:8) Bayat nga utobem dagitoy a makaay-ayo a galad, saanka aya a maguyugoy nga umadani iti daytoy awan kaaspingna a Dios?

Tulongannatayo ti Biblia nga umadani ken Jehova

10, 11. (a) Tapno matulongantayo a mangkita a nalawlawag iti personalidadna, ania ti inraman ni Jehova iti Saona? (b) Ania a pagarigan iti Biblia ti tumulong kadatayo a mangsirmata iti panagtignay ti pannakabalin ti Dios?

10 Malaksid iti panangibagana kadatayo no ania dagiti galadna, siaayat nga inraman ni Jehova iti Saona dagiti espesipiko a pagarigan no kasano nga impakitana dagitoy a galad babaen kadagiti aramidna. Dagita a salaysay ket mangipaay kadagiti nabatad a ladawan a tumulong kadatayo a mangkita a nalawlawag iti nadumaduma nga aspeto ti personalidadna. Iti kasta, dayta ti tumulong kadatayo nga umadani kenkuana. Usigem ti maysa a pagarigan.

11 Napateg a banag a mabasam a ti Dios ket “nakired iti pannakabalin.” (Isaias 40:26) Ngem sabali ti pategna no basaem ti panangilasatna iti Israel idiay Nalabaga a Baybay sa inaywananna ti nasion idiay let-ang iti 40 a tawen. Masirmatam ti pannakabisngay ti nadawel a dandanum. Mailadawanmo ti nasion—nalabit agdagup iti 3,000,000—a magmagna iti namaga a lansad ti baybay, a dagiti nagbalay a danum ket kasla dadakkel a pader iti agsumbangir. (Exodo 14:21; 15:8) Makitam ti pammaneknek iti nadungngo a panangaywan ti Dios idiay let-ang. Pimsuak ti danum manipud iti bato. Timpuar iti daga ti taraon a kasla puraw a bukbukel. (Exodo 16:31; Numeros 20:11) Impalgak ditoy ni Jehova a saan laeng nga adda pannakabalinna no di pay ket usarenna dayta a maigapu iti ilina. Saan aya a makaliwliwa a maammuan a makagteng dagiti kararagtayo iti  mannakabalin a Dios a “maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk”?—Salmo 46:1.

12. Kasano ti panangtulong ni Jehova kadatayo a “mangkita” kenkuana babaen iti sasao a matarusantayo?

12 Kas maysa nga espiritu, adu pay ti inaramid ni Jehova a tumulong kadatayo a mangam-ammo kenkuana. Kas tattao mailasintayo laeng dagiti literal a makita ti matatayo ket ngarud, ditay makita ti lubong dagiti espiritu. No deskribiren ti Dios ti bagina kadatayo babaen iti sasao a nainaig iti espiritu, kas man la padpadasem nga ilawlawag iti maysa a nayanak a bulsek no ania dagiti detalye ti itsuram, a kas iti kolor ti matam wenno dagiti pekasmo. Imbes a kasta, siaasi a tulongannatayo ni Jehova a “mangkita” kenkuana babaen iti sasao a matarusantayo. No dadduma, agusar iti piguratibo a sasao, nga iyarigna ti bagina kadagiti banag nga ammotayo. Deskribirenna pay ti bagina a kasla iti itsura ti tao. *

13. Ania a ladawan ti patauden ti Isaias 40:11, ket ania ti epektona dayta kenka?

13 Imutektekanyo ti pannakailadawan ni Jehova iti Isaias 40:11: “Kas iti maysa a pastor ipastorannanto ti bukodna a pangen. Babaen ti takiagna ummongennanto a sangsangkamaysa dagiti kordero; ket iti barukongna awitennanto ida.” Mayasping ditoy ni Jehova iti maysa a pastor a mangubba kadagiti kordero babaen iti “takiagna.” Ipasimudaag daytoy ti pannakabalin ti Dios a mangsalaknib ken mangsuporta iti ilina, uray kadagidiay nakapkapuy. Mariknatayo ti kinatalged kadagiti nabileg a takiagna, gapu ta no nasungdotayo kenkuana, pulos a dinatayto baybay-an. (Roma 8:38, 39) Ti Naindaklan a Pastor awitenna dagiti kordero “iti barukongna”—sasao nga agaplikar iti nalawa a sab-ok iti makinngato a pagan-anay, a pasaray  pangikargaan ti maysa a pastor iti kappasngay a kordero. Masiguradotayo ngarud nga ilalaen ken sidudungngo nga aywanannatayo ni Jehova. Natural laeng a kayattay ti umadani kenkuana.

‘Kayat nga Ipalgak ti Anak’

14. Apay a maikuna nga ipaay ni Jehova ti kasingedan a panangipalgak iti bagina babaen ken Jesus?

14 Iti Saona, ipaay ni Jehova ti kasingedan a panangipalgak iti bagina babaen ti dungdungnguenna nga Anak, a ni Jesus. Malaksid ken Jesus, awanen ti nasingsinged a makayanninaw iti panunot ken rikrikna ti Dios wenno nabatbatad a makailawlawag Kenkuana. Adda ngamin idin dayta nga inauna nga Anak iti sibay ni Amana sakbay pay a naparsua dagiti dadduma nga espiritu a parsua ken ti pisikal nga uniberso. (Colosas 1:15) Am-ammo unay ni Jesus ni Jehova. Dayta ti makagapu a maikunana: “Awan makaammo no asino ti Anak no di ti Ama; ket no asino ti Ama, awan makaammo no di ti Anak, ken daydiay kayat a pangipalgakan kenkuana ti Anak.” (Lucas 10:22) Idi adda ni Jesus ditoy daga kas tao, adda dua a napateg a wagas a panangipalgakna iti Amana.

15, 16. Ania dagiti dua a wagas a panangipalgak ni Jesus iti Amana?

 15 Umuna, dagiti pannursuro ni Jesus tulongannatayo a mangam-ammo iti Amana. Dineskribir ni Jesus ni Jehova iti sasao a mangtignay iti pusotayo. Kas pagarigan, tapno mailawlawagna ti naasi a Dios a mangawat manen kadagiti agbabbabawi a managbasol, inyasping ni Jesus ni Jehova iti manangpakawan nga ama a naibuyog unay idi makitana ti agsubsubli a barayuboy nga anakna nga uray la a timmaray ken inapungolna ti tengnged ti anakna ken inagkanna a sidudungngo. (Lucas 15:11-24) Inladawan met ni Jesus ni Jehova kas maysa a Dios a “mangyasideg” kadagiti nalinteg ti panagpuspusoda a tattao gapu ta ay-ayatenna ida kas indibidual. (Juan 6:44) Ammona uray ti pannakatnag ti bassit a billit-tuleng iti daga. “Dikay agbuteng,” inlawlawag ni Jesus, “napatpategkayo ngem iti adu a billit-tuleng.” (Mateo 10:29, 31) Sigurado a maguyugoytayo nga umadani iti kasta a nadungngo a Dios.

16 Maikadua, ipakita kadatayo ti ulidan ni Jesus no siasino ni Jehova. Naan-anay nga inyanninaw ni Jesus ni Amana isu a maikunana: “Ti nakakita kaniak nakitana met ti Ama.” (Juan 14:9) Gapuna, no mabasatayo kadagiti Ebanghelio ti maipapan ken Jesus—ti impakitana a rikrikna ken ti pannakilangenna iti sabsabali—kayariganna makitkitatayo ti sibibiag a ladawan ni Amana. Awanen ti nabatbatad ngem iti dayta a palgaak nga inted ni Jehova kadatayo maipapan kadagiti galadna. Apay?

17. Iyilustrar no ania ti inaramid ni Jehova tapno matulongannatayo a mangtarus iti kinasiasinona.

17 Kas panangyilustrar: Panunotem a padasem nga ilawlawag no ania ti kinamanangngaasi. Mabalinmo a depinaren dayta iti sasao. Ngem no adda maitudom nga aktual a mangipakpakita iti kinamanangngaasi ket kunaem, “Dayta ti maysa nga ulidan iti kinamanangngaasi,” ad-adda a maibuksilan ken nalaklaka a matarusan ti sao a “kinamanangngaasi.” Kasta ti inaramid ni Jehova tapno matulongannatayo a mangtarus iti kinasiasinona. Malaksid iti panangdeskribirna iti bagina babaen ti sasao, impaayannatayo iti sibibiag nga ulidan ti Anakna. Makita ken Jesus ti aktual a pannakaiparangarang dagiti galad ti Dios. Babaen kadagiti  salaysay ti Ebanghelio a mangdesdeskribir ken Jesus, kas man la ibagbaga ni Jehova: “Kastaak.” Kasano ti panangdeskribir ti naipaltiing a rekord ken ni Jesus idi adda ditoy daga?

18. Kasano nga impakita ni Jesus dagiti galad a pannakabalin, kinahustisia, ken sirib?

18 Nagsayaat ti panangipakita ni Jesus kadagiti uppat a kangrunaan a galad ti Dios. Naaddaan iti pannakabalin a mangparmek iti sakit, bisin, ken uray ipapatay. Nupay kasta, saan a kas kadagiti naagum a tattao a mangab-abuso iti pannakabalinda, pulos a di nagusar iti namilagruan a pannakabalin nga agpaay kenkuana wenno pangdangran kadagiti sabsabali. (Mateo 4:2-4) Inayatna ti kinahustisia. Napno ti pusona iti nalinteg a panagrurod idi makitana dagiti manangallilaw a negosiante a manggunggundaway kadagiti tattao. (Mateo 21:12, 13) Nalinteg ti panangtratona kadagiti napanglaw ken mailupitlupit, a tinulonganna ti kakasta a tattao tapno ‘makasarakda iti gin-awa’ a maipaay kadagiti kararuada. (Mateo 11:4, 5, 28-30) Masarakan kadagiti pannursuro ni Jesus ti awan kaaspingna a sirib, a “nangnangruna ngem ni Solomon.” (Mateo 12:42) Ngem pulos a di impasindayag ni Jesus ti siribna. Natukay ti puspuso dagiti ordinario a tattao iti sasaona, gapu ta nalawag, simple, ken praktikal dagiti pannursurona.

19, 20. (a) Kasano a naisangsangayan ni Jesus nga ulidan iti ayat? (b) Bayat a basaen ken utobentayo ti ulidan ni Jesus, ania koma ti laglagipentayo?

19 Naisangsangayan ni Jesus nga ulidan iti ayat. Iti intero a ministeriona, impakitana ti ayat iti adu nga aspetona, a pakairamanan ti pannakipagrikna ken asi. Maasian unay iti panagsagsagaba dagiti sabsabali. No namin-ano a daras a nagutugot nga agtignay gapu iti kasta a pannakipagrikna. (Mateo 14:14) Nupay pinaimbagna dagiti masakit ken pinakanna dagiti mabisin, inyebkas ni Jesus ti asi iti napatpateg pay a wagas. Tinulonganna dagiti sabsabali a mangammo, mangawat, ken mangipateg iti kinapudno maipapan iti Pagarian ti Dios, a mangyegto kadagiti permanente a bendision iti sangatauan. (Marcos 6:34; Lucas 4:43) Kangrunaanna, impakita ni Jesus ti managsakripisio nga ayat babaen ti situtulok a panangipaayna iti biagna maigapu kadagiti sabsabali.—Juan 15:13.

 20 Nakaskasdaaw aya no maguyugoy dagiti amin a kita ti tattao iti daytoy nadungngo ken mannakipagrikna a tao? (Marcos 10:13-16) Nupay kasta, bayat a basaen ken utobentayo ti mismo nga ulidan ni Jesus, kanayon koma a laglagipentayo a babaen iti daytoy nga Anak makitkitatayo ti nalawag a ladawan ni Amana.—Hebreo 1:3.

Katulongan iti Panagadaltayo

21, 22. Ania ti ramanen ti panangbirok ken Jehova, ket ania ti linaon daytoy a libro a tumulong kadatayo a mangaramid iti dayta?

21 Babaen ti nakalawlawag a panangipalgak ni Jehova iti bagina iti Saona, imbatadna a kayatna nga umadanitayo kenkuana. Nupay kasta, dinatay piliten a manggun-od iti naanamongan a relasion kenkuana. Datayo ti mangikeddeng no kayattay a biroken ni Jehova “bayat a masarakan pay.” (Isaias 55:6) Ti panangbirok ken Jehova ramanenna ti panangammo kadagiti galad ken daldalanna a naipalgak iti Biblia. Daytoy libro a basbasaem ket nairanta a tumulong kenka a mangaramid iti dayta.

22 Makitamto a nabennebenneg daytoy a libro iti nagduduma a seksion sigun kadagiti uppat a kangrunaan a galad ni Jehova: pannakabalin, kinahustisia, sirib, ken ayat. Mangrugi ti kada seksion babaen ti pananggupgopna iti dayta a galad. Dagiti sumaganad a kapitulo iti dayta a seksion salaysayenda no kasano ti panangiparangarang ni Jehova iti dayta a galad iti nadumaduma  nga aspetona. Naglaon met ti kada seksion iti maysa a kapitulo a mangipakita no kasano nga inyulidan ni Jesus dayta a galad, agraman ti maysa a kapitulo a mangisalaysay no kasano a mayanninawtay dayta iti biagtayo.

23, 24. (a) Ilawlawagmo ti naisangsangayan a paset a “Salsaludsod a Pagmennamennaan.” (b) Kasano a ti panagmennamenna tulongannatayo nga ad-adda nga umadani iti Dios?

23 Mangrugi iti daytoy a kapitulo, adda naisangsangayan a paset a napauluan “Salsaludsod a Pagmennamennaan.” Kas pagarigan, kitaem ti kahon iti panid 24. Dagiti teksto ken saludsod ket saan a nairanta a pangrepaso iti kapitulo. Imbes ketdi, nairanta dagita a tumulong kenka a mangutob iti dadduma pay a napateg nga aspeto maipapan iti dayta a topiko. Kasano ti epektibo a panangusarmo iti daytoy a paset? Saggaysaem a kitaen dagiti naisitar a teksto, ket basaem a naimbag dagiti bersikulo. Kalpasanna, utobem ti saludsod a naipakuyog iti kada teksto. Agpanunotka kadagiti sungbat. Mabalinmo ti agsukimat. Utobem ti dadduma pay a saludsod: ‘Ania ti maadalko maipapan ken Jehova iti daytoy nga impormasion? Kasano a maapektaranna ti biagko? Kasano a mausarko dayta a pangtulong kadagiti dadduma?’

24 Ti kasta a panagmennamenna matulongannatayo nga ad-adda nga umadani ken Jehova. Apay? Sigun iti Biblia, adda pakainaiganna iti puso ti panagmennamenna. (Salmo 19:14) No panunotentayo a buyogen ti naimpusuan a panagyaman dagiti naammuantayo maipapan iti Dios, sumalput dayta nga impormasion iti piguratibo a pusotayo, nga apektaranna ti panagpampanunottayo, tignayenna ti riknatayo, ken pagangayanna gutugotennatayo nga agtignay. Umuneg ti ayattayo iti Dios, ket kas resultana, dayta nga ayat ti mangtignay kadatayo nga agtarigagay a mangay-ayo kenkuana kas kasingedan a Gayyemtayo. (1 Juan 5:3) Tapno masagraptayo ti kasta a relasion, masapul nga ammuentayo dagiti galad ken daldalan ni Jehova. Ngem umuna, usigentayo ti maysa nga aspeto ti personalidad ti Dios a mangipaay iti nabileg a rason tapno umadanitay kenkuana—ti kinasantona.

^ par. 3 Makapainteres ta ti Hebreo a sao a naipatarus a “kinasinged” ket nausar iti Amos 3:7, a kunana a ni Soberano nga Apo Jehova ipalgakna ti “kompidensial a banagna” kadagiti adipenna, nga ipakpakaunana kadakuada no ania dagiti panggepna nga aramiden.

^ par. 12 Kas pagarigan, dakamaten ti Biblia ti rupa, mata, lapayag, agong, ngiwat, takiag, ken saka ti Dios. (Salmo 18:15; 27:8; 44:3; Isaias 60:13; Mateo 4:4; 1 Pedro 3:12) Ditay koma matmatan a literal ti kakasta a piguratibo a sasao, no kasano a ditay matmatan a literal ti pannakadakamat ni Jehova kas “ti Bato” wenno “maysa a kalasag.”—Deuteronomio 32:4; Salmo 84:11.

Ammuem ti Ad-adu Pay

TI PAGWANAWANAN

Talaga Kadi a Maseknan Kenka ni Jehova?

Narigatmo kadi a patien nga ipatpategnaka ti Dios kas indibidual? Ti sasao ni Jesus iti Juan 6:44 mangted iti pammaneknek a maseknan ti Dios iti tunggal maysa.