Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Umadanika ken Jehova

 KAPITULO 31

“Umadanikayo iti Dios ket Isu Umadaninto Kadakayo”

“Umadanikayo iti Dios ket Isu Umadaninto Kadakayo”

1-3. (a) Ania ti maadaltayo maipapan iti nakaparsuaan ti tao no paliiwentayo ti relasion dagiti nagannak iti maladagada? (b) Ania ti naikasigudan a reaksiontayo no adda mangipakita iti ayat kadatayo, ket ania a napateg a saludsod ti iyimtuodtayo iti bagbagitayo?

MAAY-AYATAN dagiti nagannak a makakita iti panagisem ti kappasngay nga anakda. Masansan nga iyasidegda ti rupada iti maladaga, a rayray-awen ken isem-isemanda. Magagaranda a makakita iti reaksionna. Ket madamdama pay, rummuaren dagiti kallid ti pingpingna, agbingngin dagiti bibigna, ket addaytan ti makaay-ayo nga isem. Naisalsalumina dayta nga ebkas ti pammateg ken ayat ti maladaga kas panangsubad iti ayat dagiti dadakkelna.

2 Ti isem ti maladaga ipalagipna kadatayo ti maysa a napateg a banag maipapan iti nakaparsuaan ti tao. Naikasigudan a subadantayo ti ayat iti ayat. Naparsuatayo a kasta. (Salmo 22:9) Bayat a dumakdakkeltayo, ad-adda a masursurotayo a subadan ti ayat. Nalabit malagipmo no kasano nga inyebkas dagiti dadakkelmo, kakabagiam, wenno gagayyemmo ti ayatda kenka idi ubingka pay. Kas man la nagramut iti pusom ti nabara a rikna, timmarubo, ken nagsabong. Sinupapakam dayta iti ayat. Kasta met kadi ti relasionmo ken Jehova a Dios?

3 Kuna ti Biblia: “No maipapan kadatayo, agayattayo, agsipud ta isu ti immuna a nagayat kadatayo.” (1 Juan 4:19) Iti Benneg 1 agingga iti 3 daytoy a libro, napalagipanka nga us-usaren ni Jehova a Dios ti pannakabalin, kinahustisia, ken siribna kadagiti naayat a wagas nga agpaay iti pagimbagam. Ket iti Benneg 4, nakitam a direkta nga inyebkasna ti ayatna iti sangatauan—agraman kenka a mismo—kadagiti naisangsangayan a wagas. Ita tumaud ti maysa a saludsod. No pampanunoten, dayta ti kapatgan a maisaludsodmo iti bagim: ‘Kasanok a subadan ti ayat ni Jehova? ’

 No Ania ti Kayat a Sawen ti Panagayat iti Dios

4. Kasano a mariro dagiti tattao no maipapan iti kayat a sawen ti panagayat iti Dios?

4 Kas Gubuayan ti ayat, pagaammo ni Jehova a nabileg unay ti ayat ta mairuarna dagiti kasayaatan a galad kadagiti sabsabali. Isu nga iti baet ti agtultuloy a panagsukir dagiti di matalek a tattao, agtalek latta nga adda dagiti tattao a mangsubad iti ayatna. Kinapudnona, minilion dagiti kasta a tattao. Ngem nakalkaldaang ta dagiti relihion iti daytoy rinuker a lubong riniroda dagiti tattao no maipapan iti kayat a sawen ti panagayat iti Dios. Nagadu ti agkuna nga ay-ayatenda ti Dios, ngem kasla ipagarupda a ti kasta nga ayat ket maysa laeng a rikna a mayebkas iti sasao. Mabalin a kasta ti pangrugian ti panagayat iti Dios, no kasano a ti ayat ti maladaga kadagiti dadakkelna ket damo a maipakita babaen ti isem. Ngem kadagiti nataengan, saan la a dayta ti ramanen ti ayat.

5. Sigun iti Biblia, ania ti kaipapanan ti panagayat iti Dios, ket apay a rumbeng a maragsakantayo iti dayta?

5 Impakita ni Jehova no ania ti kayat a sawen ti panagayat kenkuana. Kuna ti Saona: “Daytoy ti kaipapanan ti ayat iti Dios, a tungpalentayo dagiti bilinna.” No kasta, ti panagayat iti Dios ket nasken a mayebkas iti aramid. Pudno, adu ti agtukkiad nga agtulnog. Ngem siaayat a kuna pay ti isu met laeng a bersikulo: “Ket kaskasdi a dagiti bilin [ti Dios] saanda a makapadagsen.” (1 Juan 5:3) Nairanta dagiti linteg ken prinsipio ni Jehova nga agpaay iti pagimbagantayo, saan a tapno mangpadagsen kadatayo. (Isaias 48:17, 18) Naglaon ti Sao ti Dios kadagiti prinsipio a tumulong kadatayo nga agbalin a nasingsinged kenkuana. Kasano a kasta? Repasuentayo ti tallo nga aspeto ti relasiontayo iti Dios—komunikasion, panagdayaw, ken panangtulad.

Pannakisao ken Jehova

6-8. (a) Babaen iti ania a makapagimdengtayo ken Jehova? (b) Kasanotay a mapagbalin a nabiag dagiti Kasuratan a basaentayo?

6 Mangrugi ti Kapitulo 1 iti kastoy a saludsod, “Mailadawam kadi ti bagim a makisarsarita iti Dios?” Nakitatayo a saan nga arapaap laeng daytoy. No pampanunoten, nakasarita idi ni Moises  ti Dios. Datayo ngay? Saan a mangibabaon ita ni Jehova kadagiti anghel a makisarita kadagiti tattao. Ngem adda nagsayaat a wagas ni Jehova a makisarita kadatayo ita. Kasanotay a mangngegan ni Jehova?

7 Yantangay “amin a Kasuratan impaltiing ti Dios,” umim-imdengtayo ken Jehova no basaentayo ti Saona, ti Biblia. (2 Timoteo 3:16) Dayta ti gapuna nga indagadag ti salmista kadagiti adipen ni Jehova a basaenda dayta iti “aldaw ken rabii.” (Salmo 1:1, 2) Masapul a pagreggetantayo nga aramiden dayta. Ngem makagunggona dayta. Kas nakitatayo iti Kapitulo 18, mayarig ti Biblia iti napateg a surat a naggapu iti nailangitan nga Amatayo. Isu a di rumbeng a makapadagsen ti panangbasa iti dayta. Masapul a pagbalinentayo a nabiag dagiti Kasuratan a basaentayo. Kasanotay a maaramid dayta?

8 Sirmataem dagiti salaysay iti Biblia a basbasaem. Iladawam iti panunotmo dagiti karakter iti Biblia. Ikagumaam a tarusan ti kabibiagda, dagiti kasasaad, ken motiboda. Kalpasanna, utobem a naimbag ti basbasaem, nga iyimtuodmo iti bagim dagiti saludsod a kas kadagitoy: ‘Iti daytoy a salaysay, ania ti maadalko maipapan ken Jehova? Ania kadagiti galadna ti naitampok? Ania a prinsipio ti kayat ni Jehova a masursurok, ket kasano a maipakatko dayta iti biagko?’ Basaem, utobem, ken iyaplikarmo—ket iti panangaramidmo iti kasta, agbalin a nabiag kenka ti Sao ti Dios.—Salmo 77:12; Santiago 1:23-25.

9. Siasino “ti matalek ken masirib nga adipen,” ket apay a nasken a sipapasnek nga umimdengtayo iti dayta nga “adipen”?

9 Agsasao met ni Jehova kadatayo babaen “ti matalek ken masirib nga adipen.” Kas impadto ni Jesus, maysa a bassit a grupo dagiti napulotan a Kristiano a lallaki ti nadutokan a mangipaay iti naespirituan a ‘taraon iti umiso a tiempo’ kadagitoy nariribuk a maudi nga al-aldaw. (Mateo 24:45-47) No agbasatayo kadagiti literatura a naisagana a tumulong kadatayo a gumun-od iti umiso a pannakaammo iti Biblia ken no tumabunotayo kadagiti Nakristianuan a gimong ken kombension, tartaraonannatayo iti naespirituan dayta nga adipen. Yantangay adipen ida ni Kristo, nainsiriban nga ipangagtayo ti sasao ni Jesus: “Siputanyo  no kasano ti panagimdengyo.” (Lucas 8:18) Sipapasnek nga umimdengtayo agsipud ta bigbigentayo ti matalek nga adipen kas maysa kadagiti pamay-an ni Jehova a makisarita kadatayo.

10-12. (a) Apay a naisangsangayan a sagut ni Jehova ti kararag? (b) Kasanotayo a makapagkararag iti wagas a makaay-ayo ken Jehova, ket apay a makapagtalektayo a napateg kenkuana dagiti kararagtayo?

10 Ngem komusta met ngay ti pannakisao iti Dios? Makasaritatayo aya ni Jehova? Makapaamanga a panunoten dayta. No asitgam ti katan-okan nga agturay iti pagilianyo tapno makisaritaka kenkuana maipapan iti maysa a banag a pakaseknam, patgannaka ngata? Iti dadduma a kasasaad, mabalin a napeggad no gandatem nga aramiden dayta! Idi kaaldawan da Ester ken Mardokeo, mabalin a mapapatay ti tao a dumatag iti ari ti Persia no saan nga inawis ti ari. (Ester 4:10, 11) Ngem mabalinmo ti umasideg iti Soberano nga Apo iti uniberso, a no idilig kenkuana, “kaslada kadagiti rumsa” uray dagiti kabibilgan a tattao. (Isaias 40:22) Rumbeng kadi a maamaktayo nga umadani kenkuana? Saan!

11 Nangipaay ni Jehova iti nawaya, ngem simple, a wagas ti iyaadani kenkuana—kararag. Uray ti maysa a bassit nga ubing mabalinna ti agkararag ken Jehova a buyogen ti pammati, nga aramidenna dayta iti nagan ni Jesus. (Juan 14:6; Hebreo 11:6) Ngem babaen ti kararag, mayebkastayo met dagiti narikut, personal unay a pampanunot ken rikriknatayo—uray dagidiay nasaem a ditay maipeksa. (Roma 8:26) No agkararagtayo ken Jehova, awan kapapay-anna ti panangaramat kadagiti nangayed, nasabsabongan a balikas wenno atitiddog, maulit-ulit a kararag. (Mateo 6:7, 8) Iti sabali a bangir, saan a kedngan ni Jehova ti kapaut wenno kasansan ti pannakisaotayo kenkuana. Iyaw-awis pay ketdi ti Saona nga ‘agkararagtayo a di agressat.’—1 Tesalonica 5:17.

12 Laglagipem a ni Jehova laeng ti maawagan “Managdengngeg iti kararag,” ket agimdeng a buyogen ti napaypayso a pannakipagrikna. (Salmo 65:2) An-anusanna laeng aya dagiti kararag dagiti matalek nga adipenna? Saan, kinapudnona maragsakan kadagita. Inyarig ti Saona dagiti kasta a kararag iti agpangpangato a naayamuom nga asuk ti mapupuoran nga insienso. (Salmo 141:2; Apocalipsis 5:8; 8:4) Saan aya a  makaliwliwa a panunoten nga agpangato ken makaay-ayo met iti Soberano nga Apo dagiti napasnek a kararagtayo? Isu a no kayatmo ti umadani ken Jehova, sipapakumbaba nga agkararagka kenkuana a masansan, inaldaw. Ibukbokmo kenkuana ti linaon ti pusom; ipeksam ti amin a riknam. (Salmo 62:8) Ibagam iti nailangitan nga Amam dagiti pakaseknam, dagiti pagrag-oam, ti panagyaman, ken pammadayawmo. Iti kasta, ad-adda a lumagda ti relasionmo kenkuana.

Panagdayaw ken Jehova

13, 14. Ania ti kayat a sawen ti panagdayaw ken Jehova, ket apay a maitutop nga aramidentay dayta?

13 No makisaotayo ken Jehova a Dios, saantayo a basta umim-imdeng ken agsasao a kas no makisarsaritatayo iti maysa a gayyem wenno kabagian. Kinapudnona agdaydayawtayo ken Jehova, nga ipapaaytayo kenkuana ti nauneg a panagraem a pakaikarianna unay. Naisentro iti pudno a panagdayaw ti intero a panagbiagtayo. Kasta ti panangyebkastayo ken Jehova iti amin-kararua nga ayat ken debosiontayo, ken dayta ti mamagkaykaysa kadagiti amin a matalek a parsua ni Jehova, idiay man langit wenno ditoy daga. Iti sirmata, nangngeg ni apostol Juan ti maysa nga anghel a mangiwarwaragawag iti daytoy a bilin: “Agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.”—Apocalipsis 14:7.

14 Apay a rumbeng nga agdaydayawtayo ken Jehova? Panunotem dagiti galad a nasalaysay iti daytoy a libro, kas iti kinasanto, pannakabalin, panagteppel, kinahustisia, tured, asi, sirib, kinapakumbaba, ayat, pannakipagrikna, kinasungdo, ken kinaimbag. Nakitatayo a ni Jehova itakderanna ti kasayaatan ken kangatuan nga estandarte ti amin a napateg a galad. No padasentayo a tarusan ti pakagupgopan dagiti galadna, mabigbigtayo nga isu ket saan a basta naindaklan, mararaem a Persona. Kasta unay ti kinadayagna, nangatngato nga amang ngem kadatayo. (Isaias 55:9) Di pagduaduaan a ni Jehova ti nainkalintegan a Soberanotayo, ket pudno a maikari a dayawentayo. Ngem kasano ti panagdayawtayo ken Jehova?

15. Kasano ti panagdayawtayo ken Jehova a “buyogen ti espiritu ken kinapudno,” ket ania a gundaway ti ipaay kadatayo dagiti Nakristianuan a gimong?

 15 Kinuna ni Jesus: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Kayatna a sawen, agdaydayawtayo ken Jehova a buyogen ti puso a napno iti pammati ken ayat, nga iturturong ti espirituna. Kaipapananna met nga agdayawtayo a maitunos iti kinapudno, ti umiso a pannakaammo a masarakan iti Sao ti Dios. Addaantayo iti napateg a gundaway nga agdayaw ken Jehova a “buyogen ti espiritu ken kinapudno” tunggal agtataripnongtayo nga agkakapammatian. (Hebreo 10:24, 25) No agkantatayo iti pammadayaw ken Jehova, sangsangkamaysa nga agkararag kenkuana, ken agimdeng ken makiraman iti panagsasarita maipapan iti Saona, mayebkastayo ti ayat kenkuana iti nasin-aw a panagdayaw.

Dagiti Nakristianuan a gimong ket makaparagsak nga okasion a mangted iti gundaway nga agdayaw ken Jehova

16. Ania ti maysa kadagiti kadakkelan a bilin a masapul a tungpalen dagiti pudno a Kristiano, ket apay a matignaytayo a mangtungpal iti dayta?

 16 Agdaydayawtayo met ken Jehova no isarsaritatayo kadagiti sabsabali ti maipapan kenkuana, nga idaydayawtayo iti publiko. (Hebreo 13:15) Kinapudnona, ti panangikasaba iti naimbag a damag ti Pagarian ni Jehova ti maysa kadagiti kadakkelan a bilin a masapul a tungpalen dagiti pudno a Kristiano. (Mateo 24:14) Magagarantayo nga agtulnog agsipud ta ay-ayatentayo ni Jehova. No panunotentayo no kasano a “ti dios daytoy a sistema ti bambanag,” ni Satanas a Diablo, “binulsekna ti pampanunot dagiti di manamati,” a mangisaksaknap kadagiti nakaam-amak a kinaulbod maipapan ken Jehova, ditay kadi aggagar nga agserbi kas Saksi a maipuon iti Diostayo, nga ilintegtayo ti kasta a pammardaya? (2 Corinto 4:4; Isaias 43:10-12) Ket no utobentayo dagiti nagsasayaat a galad ni Jehova, saan aya a matignaytayo a mangisarsarita kadagiti sabsabali iti maipapan kenkuana? Pudno unay, awanen ti nasaysayaat pay a pribilehio ngem iti panangtulong kadagiti sabsabali a mangammo ken mangayat iti nailangitan nga Amatayo, kas iti ar-aramidentayo.

17. Ania ti ramanen ti panagdayawtayo ken Jehova, ket apay a masapul nga agdayawtayo a sitatarnaw?

17 Adu pay ti ramanen ti panagdayawtayo ken Jehova. Apektaranna ti amin a benneg ti biagtayo. (Colosas 3:23) No pudno a bigbigentayo ni Jehova kas Soberano nga Apotayo, ikagumaantayo nga aramiden ti pagayatanna iti amin a banag—iti pamiliatayo, iti panggedantayo, iti pannakilangentayo kadagiti sabsabali, iti panagpalpaliwatayo. Ikagumaantayo ti agserbi a sitatarnaw ken Jehova a “buyogen ti naan-anay a puso.” (1 Cronicas 28:9) Ti kasta a panagdayaw dina ipalubos ti nabingay a puso wenno doble a panagbiag—panagpammarang nga agserserbi ken Jehova bayat a sililimed nga agar-aramid kadagiti nadagsen a basol. Ti kinatarnaw dina ipalubos ti kasta a panaginsisingpet; ti ayat pagbalinenna dayta a makarimon. Makatulong met ti nadiosan a panagbuteng. Inaig ti Biblia ti kasta a panagraem iti agtultuloy a nasinged a relasiontayo ken Jehova.—Salmo 25:14.

 Panangtulad ken Jehova

18, 19. Apay a realistiko a panunoten a dagiti imperpekto a tattao kabaelanda a tuladen ni Jehova a Dios?

18 Agngudo ti tunggal benneg daytoy a libro iti kapitulo maipapan iti no kasanotayo nga ‘agbalin a tumutulad iti Dios, kas annak a dungdungnguen.’ (Efeso 5:1) Nasken a laglagipentayo a nupay imperpektotayo, pudpudno a matuladtayo ti awan pagkuranganna a wagas ni Jehova a mangusar iti pannakabalin, mangipakat iti hustisia, agtignay a nainsiriban, ken mangipakita iti ayat. Kasanotay nga ammo a talaga a kabaelantayo a tuladen ti Mannakabalin-amin? Laglagipem, ti kaipapanan ti nagan ni Jehova isurona kadatayo a pagbalinenna ti bagina iti aniaman a kayatna a pagbalinan tapno matungpal dagiti panggepna. Maitutop la unay a masdaawtayo iti dayta, ngem ditay kadi matulad? Kabaelantayo.

19 Naaramidtayo iti ladawan ti Dios. (Genesis 1:26) No kasta, dagiti tattao ket saan a kas kadagiti dadduma a parsua ditoy daga. Saannatay nga iturturong ti naikasigudan a kababalin, genes, wenno dagiti bambanag iti aglawlawtayo. Inikkannatayo ni Jehova iti napateg a sagut—ti wayawaya nga agpili. Iti laksid dagiti limitasion ken pagkurkurangantayo, nawayatayo nga agpili no ania ti pagbalinantayo. Kayatmo kadi ti agbalin a naayat, masirib, nalinteg a tao nga umiso ti panangaramatna iti pannakabalin? Iti tulong ti espiritu ni Jehova, maaramidmo dayta! Panunotem ti naimbag a magapuanam.

20. Ania ti naimbag a magapuanantayo no tuladentayo ni Jehova?

20 Maparagsakmo ti nailangitan nga Amam, mapagrag-om ti pusona. (Proverbio 27:11) ‘Maay-ayom [pay ketdi] a naan-anay’ ni Jehova, ta maawatanna dagiti limitasionmo. (Colosas 1:9, 10) Ket bayat nga agtultuloy a patanorem dagiti nasayaat a galad a kas panangtulad iti patpatgem nga Ama, maparaburanka iti naisangsangayan a pribilehio. Iti nasipngetan a lubong a nayadayo iti Dios, agserbika a kas silaw. (Mateo 5:1, 2, 14) Makatulongka a mangisilnag ditoy daga iti nadayag a personalidad ni Jehova. Anian a pakaidayawan!

 “Umadanikayo iti Dios, ket Isu Umadaninto Kadakayo”

Sapay koma ta sumingedka a suminged ken Jehova

21, 22. Ania nga awan patinggana a panagdaliasat ti agur-uray kadagiti amin nga agayat ken Jehova?

21 Saan a maysa laeng a kalat ti nalawag a pammagbaga a nailanad iti Santiago 4:8. Mayarig dayta iti panagdaliasat. No la ket ta agtalinaedtayo a matalek, pulos a di agpatingga dayta a panagdaliasat. Pulos a dinto sumardeng ti panagbalintayo a nasinged ken Jehova. Kinapudnona, kanayon nga addanto pay masursurotayo maipapan kenkuana. Ditay koma panunoten a naibagan kadatayo daytoy a libro ti amin a maipapan ken Jehova. Kinaagpaysuanna, saantay pay a naammuan ti amin nga ibagbaga ti Biblia maipapan iti Diostayo! Ket uray ti Biblia dina ibaga ti amin a mabalin nga ammuen maipapan ken Jehova. Kinuna ni apostol Juan a no maisurat ti amin nga inaramid ni Jesus bayat ti ministeriona ditoy daga, “ti lubong a mismo saanna a kabaelan a laonen dagiti naisurat a lukot.” (Juan 21:25) No pudno dayta maipapan iti Anakna, ad-adda a pudno daytoy maipapan iti Amana!

22 Uray no agbiagtayo nga agnanayon, saanto nga agpatingga ti  panagsursurotayo maipapan ken Jehova. (Eclesiastes 3:11) No kasta, panunotem ti masakbayan nga agur-uray kadatayo. Kalpasan ti ginasut, rinibu, minilion, binilion pay ketdi a tawen a panagbiagtayo, ad-adu nga amang ti ammotayton maipapan ken Jehova ngem iti ammotayo ita. Ngem di mabilang a nakaskasdaaw a banag ti maammuantayto pay. Magagarantayto nga agsursuro iti ad-adu pay, ta kanayon nga addanto rasontayo a makarikna iti kas iti narikna ti salmista, a nangikanta iti kastoy: “Ti iyaadani iti Dios naimbag kaniak.” (Salmo 73:28) Makapnek unay ken saan a makauma ti biag nga agnanayon—ket ti panagbalin nga ad-adda a nasinged ken Jehova ti kanayonto latta a kasayaatan a paset dayta.

23. Ania ti maiparegta nga aramidem?

23 Sapay koma ta subadam itan ti ayat ni Jehova, babaen ti panagayatmo kenkuana iti amin a puso, kararua, panunot, ken pigsam. (Marcos 12:29, 30) Sapay koma ta nasungdo ken di agkupas ti ayatmo. Sapay koma ta dagiti pangngeddeng nga aramidem iti inaldaw, manipud iti kabassitan agingga iti kadakkelan, iyanninawda amin ti isu met laeng a mangiturturong a prinsipio—a kanayon a piliem ti dana a mangiturong kenka iti natibtibker a relasion iti nailangitan nga Amam. Kangrunaan iti amin, sapay koma ta sumingedka a suminged ken Jehova, ket suminged met a suminged kenka ni Jehova—iti agnanayon!

Ammuem ti Ad-adu Pay

TI PAGWANAWANAN —PAGADALAN NGA EDISION

‘Siguraduenyo ti Napatpateg a Bambanag’

Pribilehiotayo ti agbalin a paset ti unibersal nga organisasion ti Dios. Kasanotayo a maipakita ti suportatayo iti dayta?

SIASINO ITA DAGITI MANGAR-ARAMID ITI PAGAYATAN NI JEHOVA?

Aramidem Kadi ti Pagayatan ni Jehova?

Ay-ayatennaka ni Jehova. Kasanom a maipakita ti tarigagaymo a mangay-ayo Kenkuana iti inaldaw?

SIASINO ITA DAGITI MANGAR-ARAMID ITI PAGAYATAN NI JEHOVA?

Kasanokami a Magunggonaan iti Pannakitimpuyogmi Kadagiti Kapammatianmi?

Iparparegta ti Sao ti Dios ti panagtitimpuyog dagiti Kristiano. Ammuem no kasanoka a magunggonaan iti daytoy.