Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Sungbat iti 10 a Saludsod Dagiti Agtutubo

 SALUDSOD 9

Masapul Kadi a Patiek ti Ebolusion?

Masapul Kadi a Patiek ti Ebolusion?

NO APAY A NAPATEG

No pudno ti ebolusion, awan ti pudpudno a panggep ti biag. No pudno ti panamarsua, mabirokantayo ti sungbat dagiti saludsod maipapan iti biag ken iti masanguanan.

ANIA TI ARAMIDEM?

Panunotem daytoy nga eksena: Magulguluan ni Alex. Inkaubinganna ti mamati iti Dios ken iti panamarsua. Ngem ita, ipappapilit ti maestrona iti biology a pudno ti ebolusion ken naibatay dayta kadagiti mapagtalkan a research iti siensia. Saan a kayat ni Alex nga agparang nga awan ammona. ‘Total,’ pampanunotenna, ‘no napaneknekanen dagiti scientist nga agpayso ti ebolusion, asinoak koma tapno kuestionarak ida?’

No sika ni Alex, patiem kadi ti ebolusion gapu laeng ta ibaga dagiti libro nga agpayso dayta?

AGPANUNOT!

Dagiti mamati iti ebolusion ken dagiti mamati iti panamarsua masansan nga ibagada a dagus no ania ti patpatienda uray saanda met a talaga nga ammo no apay a patienda dayta.

  • Mamati ti dadduma iti panamarsua gapu laeng ta dayta ti naisuro kadakuada iti relihionda.

  • Mamati ti dadduma iti ebolusion gapu laeng ta dayta ti naisuro kadakuada iti eskuelaan.

 INNEM A SALUDSOD A PANUNOTEM

Kuna ti Biblia: “Tunggal balay adda nangibangon, ngem ti nangibangon iti amin a bambanag isu ti Dios.” (Hebreo 3:4) Rasonable kadi dayta?

No ibaga ti maysa nga awan ti Namarsua, kaslana la ibagbaga nga awan ti nangaramid iti daytoy a balay

TI KUNADA: Amin a banag iti uniberso ket resulta ti big bang.

1. Asino wenno ania ti nakaigapuan ti big bang?

2. Ania ti mas nakappapati—awan naggapuan ti amin wenno adda nangaramid iti amin?

TI KUNADA: Naggapu ti tao kadagiti animal.

3. No naggapu ti tao kadagiti animal—kas pagarigan, kadagiti sunggo—apay ngarud a nagdakkel ti nagdumaan ti abilidad ti tao nga agpanunot kompara kadagiti sunggo?

4. Apay a nakakomkomplikado uray dagiti “kasisimplean” a kita ti biag?

TI KUNADA: Adu dagiti ebidensia a mangsuporta iti ebolusion.

5. Ti kadi mangibagbaga iti dayta inadalna a mismo dagiti ebidensia?

6. Mano ti mamati iti ebolusion gapu laeng ta naibaga kadakuada a patien dayta ti amin a nalaing a tattao?

“No magmagnaka iti kabakiran ket makakitaka iti napintas a balay, panunotem kadi: ‘Wow, nagpintas! Sigurado a nagtinnag dagiti kayo iti eksakto a lugarda tapno maaramid daytoy a balay.’ Siempre saan! Imposible dayta. Apay koma ngarud a patientayo a basta nagadda lattan dagiti bambanag iti uniberso?”—Julia.

“Kas pagarigan, adda nangibaga kenka nga adda bimtak iti uneg ti maysa a planta a pagimprentaan. Ti tinta a naiparsiak kadagiti diding ken bobida ket nagbalin a letletra ti maysa a diksionario. Patiem kadi?”—Gwen.

 APAY A MAMATIKA ITI DIOS?

Iyunay-unay ti Biblia nga usarem ti ‘pannakabalinmo nga agrason.’ (Roma 12:1) Kayatna a sawen a ti panamatim iti Dios ket saan laeng koma a naibatay iti

  • EMOSION (Panagriknak, adda talaga mannakabalin a persona)

  • IMPLUENSIA TI SABSABALI (Relihioso dagiti tattao iti lugarmi)

  • PANNAKAPILIT (Pinadakkeldak dagiti nagannakko a mamati iti Dios—awan maaramidak)

Imbes ketdi, masapul nga adda natibker a rasonmo kadagiti patpatiem.

“No dengdenggek ti panangilawlawag ti titsermi maipapan iti panagandar ti bagitayo, talaga a kombinsidoak nga adda Dios. Adda usar ti amin a paset ti bagitayo, uray dagiti kababassitan, ken kaaduanna a saantayo a mapupuotan ti panagandar dagita. Talaga a makapabilib ti bagi ti tao!”—Teresa.

“No adda makitak a nangato a building, barko, wenno kotse, isaludsodko iti bagik, ‘Asino ngata ti nangaramid?’ Dagiti laeng nalalaing ti makaaramid kadagita, kas pagarigan, iti kotse. Ngamin, masapul nga eksakto ti panagandar ti nakaad-adu a babassit a piesana tapno makataray. Isu a no adda nangdisenio iti kotse, adda met ngarud nangdisenio kadatayo.”—Richard.

“Bayat nga umad-adu ti maad-adalko iti siensia, ad-adda met a makitak a saan a nakappapati ti ebolusion. . . . Para kaniak, adayo a narigrigat a patien ti ebolusion ngem iti kaadda ti Namarsua.”—Anthony.

PANUNOTEM

Uray no adun a tawen nga agres-research dagiti scientist, saan latta nga agpapada ti panangilawlawagda iti ebolusion. No dagiti scientist a maibilbilang nga eksperto ket saan nga agtutunos maipapan iti ebolusion, kamalika kadi no kuestionaram dayta?

Ammuem ti Ad-adu Pay

AGRIINGKAYO!

Ania ti Kuna ti Biblia Maipapan iti Panamarsua?

Dineskribir ti Biblia ti innem nga “aldaw” a panangparsua ti Dios. Sag-24 oras kadi nga aldaw dagitoy?

LIBRO KEN BROSHUR

Naparsua Kadi ti Biag?

Napateg no ania ti patpatiem maipapan iti nangrugian ti biag.