Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Sungbat iti 10 a Saludsod Dagiti Agtutubo

 SALUDSOD 3

Kasanok a Makasarita Dagiti Nagannakko?

Kasanok a Makasarita Dagiti Nagannakko?

NO APAY A NAPATEG

No nasaysayaat ti relasionmo kadagiti nagannakmo, naragragsak ti biagmo.

ANIA TI ARAMIDEM?

Panunotem daytoy nga eksena: Mierkoles ti malem. Makapagrelaks met laengen ni Geoff, nga agtawen iti 17, ta nalpasnan dagiti trabahona! Linuktanna ti TV sa mayaten ti tutugawanna iti paboritona a tugaw.

Eksakto met a simmangpet ni tatangna a kasla napudot ti ulona.

“Geoffrey, agbuybuyaka manen iti TV! Di kad’ imbagak a tulongam ni adingmo iti assignment-na? Sukirka a talaga!”

“Agunget manen,” indayamudom ni Geoff.

Immasideg ni tatangna. “Aniat’ kunam?”

“Awan,” inkusilap ni Geoff.

Talaga a makaungeten ni tatangna. “Saysayaatem ti panagsungsungbatmo, a!” kunana.

No sika ni Geoff, ania koma ti inaramidmo tapno saan a pumudot ti saritaan?

AGPANUNOT!

Ti pannakisaritam kadagiti nagannakmo ket kas iti panagmaneho. No naserraan ti kalsada, agbirokka iti sabali a ruta.

 KAS PAGARIGAN:

“Marigatanak a makisarita ken Tatang,” kuna ti agtutubo a ni Leah. “No dadduma, adda ibagbagak kenkuana ngem intono kuan ibagana, ‘Ania daydiay? Adda ibagbagam?’”

ADDA TALLO NGA OPSION NI LEAH.

  1. Bugkawanna ni tatangna.

    Ibugkaw ni Leah, “Denggendak ngamin, a! Importante daytoy!”

  2. Saanen a makisarita ken tatangna.

    Saan lattan a makisarita ni Leah ken tatangna ket saannan nga ibaga ti problemana.

  3. Aguray iti nasaysayaat a tiempo tapno makisarita manen.

    Makisaritanto ni Leah ken tatangna, wenno suratanna tapno ibagana ti problemana.

Ania kadagita ti mairekomendam ken Leah?

PANUNOTEM: Adda sabali a pampanunoten ti tatang ni Leah isu a dina nadlaw nga adda problema nga ibagbaga ti anakna. No ngarud pilien ni Leah ti Opsion A, baka saan a maawatan ni tatangna no apay nga agbugbugkaw. Baka lallalo pay ketdi a saan a dumngeg. Ken no kasta ti aramidenna, ipakpakitana nga awan respetona. (Efeso 6:2) Isu a saan a nasayaat daytoy nga opsion.

No naserraan ti kalsada, agbirokka iti sabali a ruta. Kasta met, makabirokka iti sabali a pamay-an tapno makasaritam dagiti nagannakmo

Mabalin a ti Opsion B ti kalakaan nga aramiden, ngem saan nga isu ti kasayaatan. Ngamin, tapno masolusionan ti problema ni Leah, masapul a makisarita ken tatangna. Ken tapno matulongan isuna ni tatangna, masapul nga ammo ni tatangna ti mapaspasamak iti biagna. No agulimek lattan ni Leah, saan a masolusionan ti problemana.

Ngem no pilien ni Leah ti Opsion C, ibilangna ti reaksion ni tatangna kas dadakkel laeng a bato a nangserra iti kalsada ket posible a makabirok iti sabali a ruta. Isu a padasennanto manen ti makisarita. Ken no suratanna ni tatangna, mabalin a lumag-an a dagus ti riknana.

No agsurat ni Leah, mabalin a mas maibagana pay ketdi ti kayatna nga ibaga. Inton basaen dayta ni tatangna, maammuanna ti kayat nga ibaga ti anakna ket mas maawatannanton ti problemana. Isu a pagsayaatan da Leah ken ni tatangna ti Opsion C. Makisarita man ni Leah wenno agsurat, tungtungpalenna ti kuna ti Biblia a ‘suroten ti bambanag a mamataud iti talna.’—Roma 14:19.

Ania pay ti sabali nga opsion ni Leah?

Mangpanunotka iti maysa. Kalpasanna, panunotem no ania ti mabalin a resulta dayta.

 PANUNOTEM A NAIMBAG TI IBAGAM

Laglagipem a no dadduma, sabali ti maawatan dagiti nagannakmo kadagiti ibagbagam.

KAS PAGARIGAN:

Damagen dagiti nagannakmo no apay a kasla madi ti mood-mo ken adda problemam. Ti sungbatmo ket, “Diak kayat a pagsaritaan dayta.”

Ngem ti maawatan dagiti nagannakmo: “Diak agtalek kadakayo. Ibagakto ti problemak kadagiti gagayyemko, saan a kadakayo.”

Kas pagarigan, adda nadagsen a problemam ket imbaga dagiti nagannakmo a kayatdaka a tulongan. Ngem ibagam: “Dikay madanagan. Kayak daytoy.”

  • Ania ti mabalin a maawatan dagiti nagannakmo?

  • Ania koma ti maymayat nga ibagam?