Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Sungbat iti 10 a Saludsod Dagiti Agtutubo

 SALUDSOD 7

Kasanon no Pilitendak a Makiseks?

Kasanon no Pilitendak a Makiseks?

NO APAY A NAPATEG

Dakkel ti epektona iti masakbayam ti desisionmo maipapan iti seks.

ANIA TI ARAMIDEM?

Panunotem daytoy nga eksena: Dua a bulan pay laeng a boyfriend ni Alice ni Mike, ngem panagriknana, kasla nakabaybayagdan nga agam-ammo. Kanayonda nga agtintinneks, adu nga orasda nga agtintinnawag, ken kabesadodan ti panagpampanunot ti maysa ken maysa! Ngem ita, adda sabalin a kayat nga aramiden ni Mike.

Iti napalabas a dua a bulan, agin-inniggem la iti ima da Mike ken Alice ken apagbiit nga agbinnisongda. Agingga la dita ti kayat ni Alice. Ngem dina met kayat a mapukawna ni Mike. Ni laeng Mike ti mangiparparikna a nakaes-espesial isuna ken nakapimpintas. Inrasonna, ‘Uray ta agin-innayatkami met ken Mike . . . ’

No addaka iti situasion ni Alice ket addaka metten iti husto nga edad tapno maki-boyfriend wenno maki-girlfriend, ania ti aramidem?

AGPANUNOT!

Ti pannakiseks ket regalo ti Dios a para laeng kadagiti agassawa. No makisekska iti maysa a dikay pay nagkasar, ipakpakitam a dimo ipatpateg dayta a regalo. Kasla pagbalbalinem a nisnis ti nagpintas a bado nga inregaloda kenka

Pagdaksam no kontraem ti linteg ti nakaparsuaan (law of nature). Kas pagarigan, no tumpuakka iti maysa a kayo sa padasem ti agtayab, madangranka. Kasta met laeng no kontraem dagiti linteg maipapan iti moral, kas iti bilin nga: “Adaywanyo ti pannakiabig [wenno, seksual nga immoralidad].”—1 Tesalonica 4:3.

Ania dagiti dakes nga epekto ti panangsukir iti dayta a bilin? Kuna ti Biblia: “Ti mangyugali iti pannakiabig agbasbasol . . . iti bukodna a bagi.” (1 Corinto 6:18) Kasano a kasta?

 Sigun kadagiti researcher, adu nga agtutubo a nakiseks a di pay nagkasar ti nakapasar iti maysa wenno ad-adu pay kadagitoy a resulta.

  • PANNAKAKONSIENSIA. Kaaduan nga agtutubo a nakiseks a di pay nagkasar ti nangibaga a pagbabbabawyanda dayta.

  • PANNAKAPUKAW TI PANAGTALEK. Kalpasan ti panagseksda, panunoten ti tunggal maysa kadakuada, ‘Adda pay ngata sabali a nakaseksna?’

  • PANNAKADISMAYA. Kaykayat ti adu a babbai ti maysa a lalaki a mangprotektar, saan ket a manggundaway, kadakuada. Ken saanen a kayat ti adu a lallaki ti maysa a babai a nakaseksdan.

  • Konklusion: No makisekska iti maysa a dikay pay nagkasar, ipabpababam ti bagim gapu ta ipalpalubosmo a mapukaw ti maysa a nakapatpateg a banag. (Roma 1:24) Nakapatpateg ti bagim isu a saanmo a basta ipadawat!

Ipakitam a desididoka nga ‘umadayo iti pannakiabig.’ (1 Tesalonica 4:3) Ket inton adda asawamon, mabalinmonton ti makiseks nga awan ti pagdandanagam, pagbabbabawyam, ken pagbutbutngam—bambanag a kaaduanna a mapasaran dagidiay nakiseks a di pay nagkasar.—Proverbio 7:22, 23; 1 Corinto 7:3.

 ANIA TI MAKUNAM?

  • No talaga nga ay-ayatennaka ti maysa, agaramid kadi iti banag a mabalin a pakasaktam iti pisikal ken emosional?

  • No talaga nga ipatpategnaka ti maysa, pilitennaka kadi nga agaramid iti banag a mabalin a mangdadael iti relasionmo iti Dios?—Hebreo 13:4.