Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Sungbat iti 10 a Saludsod Dagiti Agtutubo

 SALUDSOD 4

Kasanok a Mailinteg Dagiti Kamalik?

Kasanok a Mailinteg Dagiti Kamalik?

NO APAY A NAPATEG

No aminem dagiti kamalim, agbalinka a mas responsable ken mapagtalkan a tao.

ANIA TI ARAMIDEM?

Panunotem daytoy nga eksena: Makiay-ayam ni Tim kadagiti gagayyemna. Imbatona ti bola ket natamaan ti sarming ti lugan ti kaarrubada.

No sika ni Tim, ania ti aramidem?

AGPANUNOT!

ADDA TALLO NGA OPSIONMO:

  1. Agtarayka.

  2. Pabasolem ti sabali.

  3. Ipudnom iti kaarrubayo ti napasamak, sa ibagam a bayadam ti naperdim.

Mabalin a kayatmo a pilien ti Opsion A. Ngem adda dagiti nasayaat a rason nga aminem dagiti kamalim—nakabuongka man iti sarming wenno sabali pay.

 TALLO A RASON NGA AMINEM DAGITI KAMALIM

  1. Dayta ti umiso nga aramidem.

    Kuna ti Biblia: “Kayatmi ti agbiag a mapagtalkan iti amin a bambanag.”—Hebreo 13:18.

  2. Mas pakawanendaka ti sabsabali.

    Kuna ti Biblia: “Daydiay mangabbong kadagiti salungasingna [wenno, basolna] saanto nga agballigi, ngem daydiay mangipudno ken mangpanaw kadakuada maipakitaanto iti asi.”—Proverbio 28:13.

  3. Kapatgan iti amin, maparagsakmo ti Dios.

    Kuna ti Biblia: “Kagura [ni Jehova] dagiti agaramid iti dakes ngem maragsakan kadagiti nalinteg.”—Proverbio 3:32, Ti Baro a Naimbag a Damag Biblia.

Saan nga imbaga ti 20 anyos a ni Karina ken papangna a natiketan gapu iti napartak a panagmanehona. Ngem dina nailimed dayta iti agnanayon. “Kalpasan ti agarup makatawen,” kuna ni Karina, “naammuan ni papangko ti maipapan iti dayta. Nagproblemaak iti kasta unay!”

Ania ti maadaltayo? “Kumaro laeng ti situasion no ilimedmo dagiti kamalim. Apitemto latta dagiti ibungana!” kuna ni Karina.

KASANOKA A MAKASURSURO KADAGITI KAMALIM?

Kuna ti Biblia: “Maitibkoltayo [wenno, agkamalitayo] amin iti adu a daras.” (Santiago 3:2) Ken kas iti naammuantayon, napakumbaba ken manakemka no aminem dagiti kamalim—ken no dagus nga aramidem dayta.

Kalpasanna, agsursuroka kadagiti kamalim. Kuna ti agtutubo a ni Vera: “Kada agkamaliak, panunotek no ania ti masursurok a leksion a makatulong tapno agbalinak a nasaysayaat a tao ken tapno ammokton ti aramidek inton maipasangoak manen iti kasta a situasion.” Kitaentayo no kasanom a maaramid dayta.

Binulodmo ti bisikleta ni papangmo ket naperdim. Ania ti aramidem?

  • Dimo ibagbaga ken mangnamnamaka a saan a maammuan ni papangmo.

  • Ibagam ken papangmo ti talaga a napasamak.

  • Ibagam ken papangmo ti napasamak ngem pabasolem ti sabali.

Saanka a nakapasa iti maysa a test gapu ta dika nag-review. Ania ti aramidem?

  • Irasonmo a nagrigat ti test.

  • Aminem a basolmo no apay a dika nakapasa.

  • Ibagam a kaguranaka ti titsermo.

No sangkapanunotmo dagiti nagkamaliam, kaska la nakatutok iti rearview mirror bayat nga agmanmaneho

 Ita, subliam dagiti eksena ken panunotem a sika (1) ni papangmo ken (2) ti titsermo. Ania ngata ti marikna ni papangmo ken ti titsermo no dagus nga aminem dagiti kamalim? Ania ngata ti panunotenda no ilimedmo dagiti kamalim?

Ita, panunotem ti maysa a naaramidam a kamali idi napan a tawen ket sungbatam dagiti sumaruno a saludsod.

Ania ti kamalim? Ania ti inaramidmo iti dayta?

  • Inlimedko.

  • Pinabasolko ti sabali.

  • Inaminko a dagus.

No inlimedmo idi ti kamalim, ania ti nariknam kalpasanna?

  • Mayat—nakalusotak!

  • Makonkonsiensiaak—impudnok la koman.

Ania koma ti nasaysayaat nga inaramidmo?

Ania ti nasursurom iti kamalim?

ANIA TI MAKUNAM?

Apay a saan nga aminen ti dadduma dagiti kamalida?

Ania ti maikuna dagiti tattao kenka no kanayon nga ilimedmo dagiti kamalim? Ania met ti maikunada no aminem dagiti kamalim?—Lucas 16:10.