Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Tuladenyo ti Pammatida

Konklusion

Konklusion

“Agbalin a tumutulad kadagidiay a babaen ti pammati ken kinaanus tawidenda dagiti kari.”—HEBREO 6:12.

1, 2. Apay a nasken a pabilgen ti pammatitayo itan? Iyilustrarmo.

PAMMATI. Maysa dayta a sao a mangiladawan iti makaay-ayo ken nagsayaat a galad. Ngem no mabasa wenno mangngegtayo dayta a sao, nasayaat no panunotentayo ti sabali pay a sao: “Naganat!” Ngamin no awan pammatitayo, nasken nga agganattayo a manggun-od iti dayta. Ken no addaantayon iti pammati, nasken nga agganattayo a mangsalaknib ken mangpabileg iti dayta. Apay?

2 Ipapanmo nga agdaldaliasatka iti naglawa a desierto. Kasapulam unay ti danum ket no makasarakkan, nasken a protektaram iti darang ti init, no naksayan dayta, nayonam tapno dika maibusan agingga a makagtengka iti papanam. Kasta met ita, agbibiagtayo iti naespirituan a desierto, maysa a lubong nga awanan iti pudpudno a pammati—kas iti dayta a danum—manmano ken naglaka a maibus no saan a maprotektaran ken mapabileg. Kasapulantay unay dayta; no kasano a mataytayo no awan ti danum, mataytayo met iti naespirituan no awan ti pammati.—Roma 1:17.

3. Ania ti impaay ni Jehova a makatulong a mangpabileg iti pammatitayo, ken ania ti dua a banag a nasken nga aramidentayo?

3 Ammo ni Jehova no kasano kaganat a kasapulantayo ti pammati, ken ammona a saan a nalaka a patanoren ken pabilgen ti pammati ita. Dayta ti makagapu a nangipaay kadagiti ulidan a tuladentayo. Pinaltiingan ni Jehova ni apostol Pablo a mangisurat: “Agbalin a tumutulad kadagidiay a babaen ti pammati ken kinaanus tawidenda dagiti kari.” (Heb. 6:12) Ken dayta ti makagapu a parparegtaennatayo ti organisasion ni Jehova nga ikagumaantayo a tuladen ti ulidan dagiti matalek a lallaki ken babbai, kas kadagiti naadaltayo iti daytoy a libro. Ania ngarud itan ti aramidentayo? Laglagipentayo koma ti dua a banag: (1) Masapul nga itultuloy a pabilgen ti pammatitayo; (2) masapul a sipapanunottayo iti namnamatayo.

4. Apay a maibagatayo a ni Satanas ket kabusor ti pammati, ngem apay a ditay agbuteng?

4 Itultuloymo a pabilgen ti pammatim. Ni Satanas ti nabileg a kabusor ti pammati. Kas agturay iti lubong, pinagbalinna daytoy a sistema ti bambanag a kasla desierto tapno marigatantayo a mangtaginayon iti pammatitayo. Nabilbileg ngem kadatayo. Rumbeng kadi a pagbutngantayo a ditay mapatanor ken mapabileg ti pammatitayo? Saan! Ni Jehova ti nabileg a Gayyem dagiti amin a mangbirok kenkuana nga addaan pudpudno a pammati. Ipanamnamana kadatayo a babaen ti tulongna, masarangettayo ti Diablo ken agtalawto kadatayo. (Sant. 4:7) Busorentayo  ti Diablo babaen ti inaldaw a panangpabileg iti pammatitayo. Kasano?

5. Kasano a naaddaan iti nabileg a pammati dagiti matalek a lallaki ken babbai a nadakamat iti Biblia? Ilawlawag.

5 Kas nakitatayon, dagiti lallaki ken babbai a nadakamat iti Biblia ket saan a sigud nga addaan iti nabileg a pammati. Ipakita ti panagbiagda a ti pammati ket bunga ti nasantuan nga espiritu ni Jehova. (Gal. 5:22, 23) Inkararagda ti tulong ni Jehova ket kas resultana kanayon a pinabilegna ti pammatida. Tuladentayo koma ida a ditay liplipatan a siwawadwad nga ipaay ni Jehova ti espirituna kadagidiay agkiddaw iti dayta ken agtignay maitunos kadagiti kararagda. (Luc. 11:13) Adda kadi pay masapul nga aramidentayo?

6. Kasanotayo a magunggonaan iti panagadaltayo kadagiti salaysay ti Biblia?

6 Iti daytoy a libro, sumagmamano laeng a pagarigan dagiti addaan iti nabileg a pammati ti naadaltayo. Ngem adu pay ti saan a nadakamat! (Basaem ti Hebreo 11:32.) Adu pay ti masursurotayo kadagiti matalek a karakter iti Biblia a nalabit saan a nairaman iti daytoy a libro. No agap-apuratayo a mangbasa iti salaysay ti Biblia maipapan kadagiti tattao nga addaan nabileg a pammati, ditay mapabileg ti pammatitayo. Tapno naan-anay a magunggonaantayo, iwayaantayo koma a sukimaten dagiti konteksto ken dagiti pasamak a naisalaysay iti Biblia. No laglagipentayo a kanayon a dagitoy nga imperpekto a lallaki ken babbai ket addaanda met iti “rikna a kas kadatayo,” ad-adda pay a makatulong kadatayo ti ulidanda. (Sant. 5:17) No ipapantayo nga addatayo iti kasasaadda, matarusantayo no kasanoda a sinango dagiti pakarigatan ken parikut a pakaipaspasanguantayo.

7-9. (a) Ania ngata ti mabalin a narikna ti dadduma kadagiti lallaki ken babbai a nadakamat iti Biblia maipapan iti panagdayaw ken Jehova kas iti ar-aramidentayo ita? (b) Apay a rumbeng a pabilgentayo ti pammatitayo babaen ti aramid?

7 Mapabilegtayo met ti pammatitayo babaen kadagiti desision nga aramidentayo. Kinapudnona, “ti pammati nga awanan ar-aramid natay.” (Sant. 2:26) Panunotem laengen ti ragsak dagiti lallaki ken babbai a naadaltayo no maipaannong kadakuada ti trabaho nga ipapaaramid ni Jehova kadatayo ita!

8 Kas pagarigan, ania ngata no naibaga ken Abraham a mabalin nga agdayaw ken Jehova a kadua dagiti kapammatianna iti nagpipintas a Kingdom Hall ken iti dadakkel a kombension, saan ket a kadagiti nabangon nga altar a bato a naaramid idiay let-ang, a sadiay ‘nakitada laeng iti adayo’ dagiti kari a nailawlawag a detalyado? (Basaem ti Hebreo 11:13.) Ania ngata no naibaga ken Elias a ti trabahona ket saan a panangdadael kadagiti propeta ni Baal bayat nga agserserbi ken Jehova idi agturturay ti dakes nga ari, no di ket ti panangsarungkar kadagiti tattao tapno idanonna kadakuada ti makaliwliwa ken mangipaay namnama a mensahe? Sigurado nga awatenda a dagus ti annongen nga agdayaw ken Jehova a kas iti ar-aramidentayo ita!

9 Gapuna, itultuloytayo koma a pabilgen ti  pammatitayo babaen iti aramid. No kasta ti aramidentayo, tultuladentayo ti ulidan ti pammati dagiti lallaki ken babbai a nadakamat iti naipaltiing a Sao ti Dios. Kas nadakamat iti Introduksion, agbalintayo a nasingsinged a gagayyemda. Ngem dandanin matungpal ti kasta a panaggagayyem.

10. Ania a ragsak ti mapasarantayto iti Paraiso?

10 Kanayon a sipapanunottayo iti namnamatayo. Napabileg a kanayon dagiti matalek a lallaki ken babbai iti namnama nga inted ti Dios kadakuada. Kastaka met kadi? Kas pagarigan, iladawam ti ragsakmo a makakita kadagiti matalek nga adipen ti Dios inton ‘mapagungar dagiti nalinteg.’ (Basaem ti Aramid 24:15.) Ania dagiti kayatmo a saludsoden kadakuada?

11, 12. Inton baro a lubong, ania ti kayatmo nga isaludsod ken ni (a) Abel? (b) Noe? (c) Abraham? (d) Ruth? (e) Abigail? (f) Ester?

11 Inton makasaritam ni Abel, kayatmo kadi a saludsoden ti maipapan kadagiti nagannakna? Wenno kayatmo kadi a saludsoden: “Nakasaritam kadi dagiti kerubin a mangbambantay iti dalan nga agturong iti Eden? Sinungbatandaka kadi?” Ni ngay Noe? Mabalin a kayatmo a saludsoden kenkuana: “Nagbutengka kadi kadagiti Nefilim? Kasanom nga inaywanan ti amin nga animal bayat nga addakayo iti daong?” No makasaritam ni Abraham, mabalin a maisaludsodmo: “Nakasaritam kadi ni Sem? Asino ti nangisuro kenka maipapan ken Jehova? Narigat kadi para kadakayo a panawan ti Ur?”

12 Kasta met, usigem dagiti kayatmo nga isaludsod kadagiti matalek a babbai a mapagungar. “Ruth, ania ti nangtignay kenka nga agbalin nga adipen ni Jehova?” “Abigail, nagbutengka kadi a nangibaga ken Nabal a tinulongam ni David?” “Ester, ania ti napasamak kadakayo ken Mardokeo idi nagpatingga ti salaysay ti Biblia maipapan kadakayo?”

13. (a) Ania dagiti mabalin nga isaludsod kenka dagiti mapagungar? (b) Ania ti mariknam no makasaritam dagiti matalek a lallaki ken babbai idi un-unana?

13 Siempre, mabalin nga adu met ti isaludsod kenka dagitoy a matalek a lallaki ken babbai. Maragsakanka la ketdi a mangestoria ti maipapan iti panagpatingga iti maudi nga al-aldaw ken kasano a binendisionan ni Jehova ti ilina kadagiti narigat a tiempo! Sigurado a maragsakanda a mangammo no kasano a tinungpal ni Jehova ti amin nga inkarina. Iti dayta a tiempo, saantayton a kasapulan a lagipen dagiti matalek nga adipen ti Dios a nadakamat iti Biblia. Kaduatayton ida idiay Paraiso! Gapuna, itultuloymo nga aramiden ti amin a kabaelam a mangadal ti maipapan kadakuada. Itultuloymo a tuladen ti pammatida. Maragsakankanto koma nga agserbi ken Jehova a kaduada kas nasinged a gagayyemmo iti agnanayon!