Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Tuladenyo ti Pammatida

 KAPITULO 6

Impeksana ti Riknana iti Dios Babaen ti Kararag

Impeksana ti Riknana iti Dios Babaen ti Kararag

1, 2. (a) Apay a saan a naragsak ni Anna idi agsagsagana para iti panagdaliasat? (b) Ania ti masursurotayo iti pakasaritaan ni Anna?

MAKUMIKOM ni Anna nga agsagsagana para iti panagdaliasat, nga ikagkagumaanna a lipaten dagiti parikutna. Naragsak koma dayta a gundaway; ni Elcana nga asawana ket tinawen nga agdaliasat a kadua ti intero a pamiliana tapno agdayawda iti tabernakulo idiay Silo. Inranta ni Jehova nga agbalin a naragsak dagita nga okasion. (Basaem ti Deuteronomio 16:15.) Sipud kinaubing ni Anna, naragsakan la ketdi kadagita a piesta. Ngem adda namagbalbaliw ti riknana kadagiti naglabas a tawen.

2 Addaan ni Anna iti asawa a mangipatpateg kenkuana. Ngem adda maikadua nga asawa ni Elcana nga agnagan Penina. Kayat ni Penina a pagleddaangen ni Anna, a ginundawayanna pay dagita a tinawen a piesta tapno agbalin a nakaay-ay-ay ti kasasaad ni Anna. Kasano? Kangrunaanna, kasano a nakatulong ken Anna ti pammatina ken Jehova tapno madaeranna ti nagrigat a kasasaadna? No maipasangoka kadagiti mamagleddaang a parikut, nangnangruna a makapabileg kenka ti kapadasan ni Anna.

“Apay a Maladingitan ta Pusom?”

3, 4. Ania ti dua a nadagsen a parikut ni Anna, ken apay a narigatna a daeran dagita?

3 Ipalgak ti Biblia ti dua a nadagsen a parikut ni Anna. Umuna, ni lakayna ket addaan iti sabali pay nga asawa a manggurgura kenkuana, ket bassit laeng ti maaramidanna iti dayta. Maikadua, lupes ni Anna ket awan a pulos ti maaramidanna iti dayta. Ti kinalupes ket narigat a daeran ti asinoman nga asawa nga agtarigagay a maaddaan iti annak; ngem nakarkaro pay ta maysa dayta a pakaigapuan ti nakaro a panagleddaang idi tiempo ni Anna ken iti kulturana. Ti tunggal pamilia ket agpannuray iti anak a mangitakder iti nagan ti pamilia. Gapuna, ti kinalupes ket maysa a pakaumsian ken pakaibabainan.

4 Saan koma a narigat unay a daeran ni Anna ti kinalupesna no saan nga um-umsien ni Penina. Nikaanoman, saan a nasayaat ti poligamia. Gagangay unay ti panagapal, ringgor, ken panagsakit ti nakem. Naiduma unay dayta iti pagalagadan ti monogamia nga  impasdek ti Dios iti minuyongan ti Eden. (Gen. 2:24) Saan nga anamongan ti Biblia ti poligamia. Ti mangipakita a saan a nasayaat dayta ket ti kasasaad iti sangakabbalayan ni Elcana.

5. Apay a kayat ni Penina nga agsagaba ni Anna, ken kasanona nga inrurumen ni Anna?

5 Ipatpateg unay ni Elcana ni Anna. Sigun iti tradision dagiti Judio, ni Anna ti immun-una nga asawana, ket adun a tawen ti naglabas sakbay ti panangasawana ken Penina. Pudno man dayta wenno saan, impamuspusan la ketdi ti managimon unay a ni Penina nga agsagaba ti karibalna. Adu ti annak ni Penina isu a dakkel ti pangatiwanna ken Anna. Bayat a manaynayonan ti annak ni Penina, ad-adda met ti panagpannakkelna. Imbes a kaasian ken liwliwaenna ni Anna, ginundawayanna dayta a naladingit a kasasaad ni Anna tapno irurumenna. Kunaen ti Biblia a pinagluksawna ni Anna tapno ‘aglagaw.’ (1 Sam. 1:6) Inggagarana ngarud a ruroden ni Anna, ket nagballigi iti panangaramidna iti dayta.

Nariribukan unay ni Anna gapu ta lupes, ket inaramid ni Penina ti amin a kabaelanna tapno agleddaang ni Anna

6, 7. (a) Nupay inkagumaan ni Elcana a liwliwaen ni Anna, apay a saanna nga imbaga ti pagledleddaanganna? (b) Ti kadi kinalupes ni Anna kaipapananna a saan nga inanamongan ni Jehova? Ilawlawag. (Kitaem ti footnote.)

6 Agparang a ti tinawen a panagdaliasatda a mapan idiay Silo ti pagay-ayat ni Penina a gundaway tapno mapagleddaangna ni Anna. Tapno adda idatonda ken Jehova, nangipaay ni Elcana iti bingay ti tunggal maysa iti adu nga annak ni Penina—“amin nga annakna a lallaki ken annakna a babbai.” Ngem maysa laeng a bingay ti naawat ni Anna gapu ta awan ti anakna. Isu a nagpannakkel ni Penina, nga impalagipna ti kinalupes ni Anna. Nagsangsangit ni Anna gapu iti dayta, ket di payen makapangan. Agparang a nadlaw ni Elcana a naladingit ken di kayat ni Anna ti mangan, isu a liniwliwana. “Anna,” insaludsodna, “apay nga agsangitka, ken apay a saanka a mangan, ken apay a maladingitan ta pusom? Saanak aya a naim-imbag kenka ngem iti sangapulo nga annak a lallaki?”—1 Sam. 1:4-8.

7 Naimbag ta maawatan ni Elcana nga agledleddaang ni Anna gapu iti kinalupesna. Siaasi nga impatalged ni Elcana ti panagayatna, ket sigurado nga inapresiar dayta ni Anna. * Ngem saan a dinakamat ni Elcana ti makaparurod nga ugali ni Penina ken awan met ti iparipirip ti Biblia a nagipulong ni Anna  ken ni Elcana. Nalabit naamiris ni Anna nga ad-adda laeng nga umirteng ti kasasaadna no ipakaammona ti ar-aramiden ni Penina. Mabalbaliwan kadi ni Elcana ti kasasaad? Saan ngata a pakaruen ni Penina ti panangrurodna ken Anna, ken saan ngata nga ad-adda a makasuron ni Penina agraman dagiti annak ken adipenna? Ad-adda la ketdi a marikna ni Anna a maipupuera iti bukodna a sangakabbalayan.

Nupay saan a nasayaat ti pannakatrato ni Anna iti pagtaenganda, nagkararag ken Jehova tapno maliwliwa

8. Apay a makaliwliwa a laglagipen a ni Jehova ket Dios ti kinahustisia no matagtagibassit wenno mairurumenka?

8 Ammo man ni Elcana wenno saan ti amin maipapan iti kinaawan asi ni Penina, ammo la ketdi ni Jehova ti amin. Ipalgak ti Saona ti pakabuklan ti pasamak, a pakaballaagan ti siasinoman nga agar-aramid kadagiti kasla nalag-an laeng a panangirurumen maigapu iti imon ken gura. Iti sabali a bangir, dagiti inosente ken mannakikappia a kas ken Anna, maliwliwada iti kinapudno a ti Dios ti hustisia ilintegnanto ti bambanag iti umiso a tiempo ken pamay-anna. (Basaem ti Deuteronomio 32:4.) Nalabit ammo ni Anna dayta, yantangay ni Jehova ti nagpatulonganna.

“Saanen a Nagdanag”

9. Ania ti masursurotayo iti kinatulok ni Anna a mapan idiay Silo nupay ammona ti aramiden ni Penina?

9 Idi pumarbangonen, adu ti kasapulan a maaramid. Agsagsaganada amin, agraman dagiti ubbing. Iti ipapanda idiay Silo, kasapulan a daliasaten ti dakkel a pamilia ti nasurok a 30 a kilometro iti deppaar ti Efraim nga aduan iti turturod. * Maysa agingga iti dua nga aldaw a pagpagnaenda dayta. Ammo lattan ni Anna no ania ti aramiden ni Penina. Ngem saan a nagbati ni Anna iti balayda. Nangipasdek ngarud iti nagsayaat nga ulidan para kadagiti agdaydayaw ita iti Dios. Nikaanoman, saan a nainsiriban nga agsardengtayo nga agdayaw iti Dios gapu iti saan a nasayaat nga aramid ti sabsabali. Ngamin, maikapistayo kadagiti mismo a bendision a mangpabileg kadatayo nga agibtur.

10, 11. (a) Apay a napan a dagus ni Anna idiay tabernakulo? (b) Kasano nga imbukbok ni Anna ti linaon ti pusona iti nailangitan nga Amana?

10 Kalpasan ti naunday a panagdaliasat iti agsikkosikko a daldalan iti bantay, nakadanon met laengen ti pamilia iti Silo a masarakan iti maysa a turod a napalikmutan kadagiti nataytayag a turod. Bayat nga umas-asidegda, mabalin a pinampanunot ni Anna no ania ti ikararagna ken Jehova. Idi nakasangpetdan, nanganda a sangapamiliaan. Dagus a pinanawan ni Anna ti pamilia ket nagturong iti tabernakulo ni Jehova. Adda sadiay ti nangato a padi a ni Eli, a nakatugaw iti asideg ti bautek. Ngem ti panunot ni Anna naipamaysa iti kararagna iti Dios. Agtalek nga adda umimdeng kenkuana iti tabernakulo.  No awan man ti naan-anay a makaawat iti kasasaadna, maawatan dayta ti Amana sadi langit. Impeksana ti ladingitna, ket nangrugi nga agsangit.

11 Gapu iti panagsaibbekna, agkuykuyegyeg ti bagina bayat a siuulimek nga agkarkararag ken Jehova. Agpigpigerger dagiti bibigna bayat nga itantanamitimna ti an-anek-ekenna. Napaut ti panagkararagna ta imbukbokna iti Amana ti linaon ti pusona. Ngem saanna la a basta kiniddaw a patgan ti Dios ti kasta unay a panagtarigagayna a maaddaan iti anak. Nupay tartarigagayan ni Anna ti pamendision ti Dios, tartarigagayanna met nga ipaay iti Dios ti amin a kabaelanna. Isu nga inkarina a no maaddaan iti anak a lalaki, idedikarna ti ubing tapno tungpal biag nga agserbi ken Jehova.—1 Sam. 1:9-11.

12. Kas ipakita ti ulidan ni Anna, ania ti laglagipentayo maipapan iti kararag?

12 No kasta, nangipakita ni Anna iti ulidan a suroten ti amin nga adipen ti Dios no maipapan iti panagkararag. Aw-awisen ni Jehova dagiti adipenna a sibubulos nga iyebkasda Kenkuana ti rikriknada ken an-anek-ekenda a kas iti aramiden ti maysa nga ubing nga agtalek iti naayat a nagannak kenkuana. (Basaem ti Salmo 62:8; 1 Tesalonica 5:17.) Napaltiingan ni apostol Pedro a mangisurat kadagitoy a makaliwliwa a sasao maipapan iti kararag ken Jehova: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.”—1 Ped. 5:7.

13, 14. (a) Apay a di umiso ti panangipapan ni Eli ken Anna? (b) Kasano a naipakita iti sungbat ni Anna ken Eli ti nagsayaat a pagwadan ti pammati?

13 Ngem dagiti tattao saanda a kas ken Jehova a mannakaawat ken mannakipagrikna. Bayat nga agsangsangit ken agkarkararag ni Anna, naklaat idi adda nagsao. Timek dayta ti nangato a padi a ni Eli, a mangpalpaliiw kenkuana. Kinuna ti padi: “Kasanonto kabayag a sibabartekka? Iwaksim kenka ta arakmo.” Nadlaw ni Eli ti panagpigerger dagiti bibig, panagsaibbek, ken naladingit a langa ni Anna. Imbes a saludsodenna no apay, impagarupna lattan a nabartek ni Anna.—1 Sam. 1:12-14.

14 Bayat dayta a kanito a panagtutuok ni Anna, nasaktan la ketdi ta nababalaw nga awan gapgapuna ken mararaem pay met ngarud ti nangbabalaw kenkuana! Kaskasdi, nangipaay manen ni Anna iti nagsayaat a pagwadan iti pammati. Saanna nga impalubos a ti kinaimperpekto ti tao ti manglapped kenkuana nga agdayaw ken Jehova. Siraraem a sinungbatanna ni Eli ken inlawlawagna ti kasasaadna. Idi naamiris ti padi ti kamalina, simmungbat nalabit iti naalumamayen a boses: “Mapanka a sitatalna, ket ited koma ti Dios ti Israel ti dawatmo a kiniddawmo kenkuana.”—1 Sam. 1:15-17.

15, 16. (a) Ania ti narikna ni Anna iti panangibukbokna iti linaon ti pusona ken ti panagdayawna ken Jehova iti tabernakulo? (b) Kasanotayo a matulad ti ulidan ni Anna no madagdagsenan wenno malmaldaangantayo?

15 Ania ti narikna ni Anna kalpasan nga imbukbokna ti linaon  ti pusona ken nagdaydayaw ken Jehova iti tabernakulo? Kastoy ti kuna ti salaysay: “Ti babai napan ket nangan, ket saanen a nagdanag ti rupana.” (1 Sam. 1:18) Iti Ti Naimbag a Damag Biblia, naipatarus dayta kas “saanen a naliday.” Nabang-aranen ni Anna. No an-anagen, impabaklaynan dagiti emosional a dadagsenna kadagiti nabilbileg nga abaga ti nailangitan nga Amana. (Basaem ti Salmo 55:22.) Nikaanoman, awan a pulos ti parikut a saan a kabaelan a solbaren ni Jehova!

16 No madagdagsenantayo wenno lumlumdaangtayo, nasayaat no surotentayo ti ulidan ni Anna ken ipeksatayo ti an-anek-ekentayo iti Daydiay aw-awagan ti Biblia a “Managdengngeg iti kararag.” (Sal. 65:2) No aramidentayo dayta buyogen ti pammati, ti kinalidaytayo ket masuktan met iti “talna ti Dios a mangringbaw iti isuamin a panunot.”—Fil. 4:6, 7.

“Awan ti Bato a Kas iti Diostayo”

17, 18. (a) Kasano a sinuportaran ni Elcana ti kari ni Anna? (b) Ania ti nabigbig ni Penina maipapan iti panangrurodna ken Anna?

17 Kabigatanna, nagsubli ni Anna iti tabernakulo a kadua ni Elcana. Imbagana la ketdi ken lakayna no ania ti kiniddaw ken inkarina, ta kinuna ti Mosaiko a Linteg nga adda kalintegan ti asawa a lalaki a mangwaswas iti inkari ti asawana no dina anamongan dayta. (Num. 30:10-15) Ngem saan a winaswas dayta a matalek a lalaki ti inkari ni baketna, imbes ketdi, nagkaduada ken Anna a nagdayaw ken Jehova iti tabernakulo sakbay a nagawidda.

18 Ngem kaano a nabigbig ni Penina a saannan a mapagrurod ni Anna? Saan nga insalaysay ti Biblia dayta, ngem ti sasao a “saanen a nagdanag” ipakitana a kanayonen a naragsak ni Anna. Di nagbayag, nabigbig ni Penina a saannan a mapagrurod ni Anna babaen ti pananglaisna. Saanen a dinakamat ti Biblia ti nagan ni Penina kalpasan dayta.

19. Ania a bendision ti inawat ni Anna, ken kasano nga impakitana nga ammona ti nagtaudan ti bendision?

19 Iti panaglabas dagiti bulan, masikogen ni Anna! Isu a natalnan ti panunotna ken nakaragragsaken. Nupay kasta unay ti rag-ona, dina pulos nalipatan ti gubuayan ti bendision. Idi naipasngay ti ubing a lalaki, pinanagananna iti Samuel, a kayatna sawen “Nagan ti Dios” ket nabatad a tukoyen dayta ti panangawag iti nagan ti Dios, kas iti inaramid ni Anna. Iti dayta a tawen, saan a nakipagdaliasat ni Anna iti ipapan ni Elcana ken ti pamilia idiay Silo. Tallo a tawen a nagbati iti pagtaengan a kadua ti anakna, agingga a napusot ni Samuel. Kalpasanna, insaganana ti riknana iti iyaay ti aldaw nga iyaadayo ti ipatpategna nga anak.

20. Kasano a tinungpal da Anna ken Elcana ti karida ken Jehova?

 20 Saan a nalaka ti panagsina ti agina. Siempre, ammo ni Anna a maaywananto a naimbag ni Samuel idiay Silo, nalabit babaen iti sumagmamano a babbai nga agserserbi idiay tabernakulo. Ngem ubing pay unay ni Samuel, ket asino nga ina ti saan a mailiw iti anakna? Nupay kasta, imbes nga ipaidamda ti anakda, siyayaman ketdi nga impan da Elcana ken Anna ti ubing. Nagidatonda iti balay ti Dios, ken indatagda ni Samuel ken ni Eli, nga impalagipda kenkuana ti kari ni Anna sumagmamano a tawen ti napalabasen.

Talaga a pudpudno a bendision ni Anna iti anakna a ni Samuel

21. Kasano nga ipakita ti kararag ni Anna ken Jehova ti kauneg ti pammatina? (Kitaem met ti kahon a “ Dua a Naisangsangayan a Kararag.”)

21 Nangyebkas ngarud ni Anna iti kararag nga inkeddeng ti Dios a maikari a mairaman iti naipaltiing a Saona. No basaem dagiti sasao ni Anna a nailanad iti 1 Samuel 2:1-10, maammuam ti kinapasnek ti pammatina iti tunggal bersikulo. Indaydayawna ni Jehova gapu iti nakaskasdaaw a pannakabalinna—ti awan kaaspingna nga abilidadna a mamagpakumbaba iti natangsit, mamendision kadagiti nairurumen, ken mamagpatingga iti biag wenno mangispal pay ketdi manipud ken patay. Indayaw ni Anna ti nailangitan nga Amana gapu iti naisangsangayan a kinasanto, kinahustisia, ken kinamatalekna. Gapuna, siuumiso a maibaga ni Anna: “Awan ti bato a kas iti Diostayo.” Ni Jehova ket naan-anay a mapagtalkan ken di agbalbaliw a kamang ti amin a mairurumen ken maidadanes nga agpatulong kenkuana.

22, 23. (a) Apay a masiguradotayo nga ammo ni Samuel nga ipatpateg dagiti nagannakna? (b) Kasano a ni Anna ad-adda pay a binendisionan ni Jehova?

22 Sigurado a bendision para ken ubing pay a Samuel ti maaddaan iti ina a napnuan pammati ken Jehova. Nupay sigurado a kailiwna ti inana bayat ti panagdakkelna, dina pulos narikna a nabaybay-an. Tinawen a mapan ni Anna idiay Silo, a mangipan iti bassit  nga awan manggasna a lambon tapno usaren ni Samuel iti panagserbina iti tabernakulo. Pinagreggetan ni Anna a daiten dagita a lambon. Dayta ti pakakitaan ti ayat ken panangipategna iti anakna. (Basaem ti 1 Samuel 2:19.) Mailadawantayo la ketdi ni Anna a siraragsak a mangmingmingming ken siaasi a mangparparegta ken Samuel bayat nga isusuotna kenkuana ti baro a lambon. Talaga a nabendisionan ni Samuel iti kasta nga ina, ket nagbalin met ni Samuel a bendision kadagiti nagannak kenkuana ken iti amin nga Israel.

23 Iti biang ni Anna, isu ket binendisionan ni Jehova ket naaddaanda ken Elcana iti lima pay nga annak. (1 Sam. 2:21) Ngem nalabit, ti kadakkelan a bendision para ken Anna ket ti kinasingedna ken Jehova nga Amana, nga ad-adda a timmibker iti panaglabas dagiti tawen. Sapay koma ta kasta met kenka, bayat a tultuladem ti pammati ni Anna.

^ par. 7 Nupay nailanad iti Biblia a ‘sinerraan ni Jehova ti aanakan ni Anna,’ awan ti pammaneknek a karurod ti Dios daytoy napakumbaba ken matalek a babai. (1 Sam. 1:5) No dadduma, dakamaten ti Biblia a gapuanan ti Dios dagiti pasamak idinto nga impalubosna laeng dagita iti sumagmamano a tiempo.

^ par. 9 Naibasar dayta a distansia iti posibilidad a ti Rama nga ili ni Elcana ket isu met laeng ti lugar a naawagan idi agangay iti Arimatea idi kaaldawan ni Jesus.