Mapan iti linaonna

Mapan iti listaan dagiti linaonna

Ania ti Panggep ti Dios Para Kadatayo?

Ania ti Panggep ti Dios Para Kadatayo?

NO AGBASAKA iti diario, agbuya iti telebision, wenno agdengngeg iti radio, makabuya ken makangngegka kadagiti damdamag maipapan iti krimen, gubat, ken terorismo. Mabalin nga uray sika ket agsagsagaba gapu iti sakit wenno gapu ta adda natay nga ipatpategmo.

Isaludsodmo iti bagim:

  • Daytoy kadi ti kayat ti Dios para kaniak ken iti pamiliak?

  • Pakabirokak iti tulong tapno mapagballigiak dagiti problemak?

  • Addanto ngata pudpudno a talna?

Mangted ti Biblia kadagiti makakombinsir a sungbat dagita a saludsod.

 ISURSURO TI BIBLIA NGA AGARAMID TI DIOS KADAGITI NAGSASAYAAT A BANAG DITOY DAGA.

  • Saanton a makarikna dagiti tattao iti ut-ot, saandanton a lumakay ken bumaket, wenno matay.​—Apocalipsis 21:4

  • “Aglagtonto dagiti pilay a kas iti ugsa.”​—Isaias 35:6

  • “Makakitanto ti mata dagiti bulsek.”​—Isaias 35:5

  •  Agbiagto manen dagiti natay.​—Juan 5:28, 29

  • Awanton ti agsakit.​—Isaias 33:24

  • Adunto ti makan para iti amin nga adda ditoy daga.​—Salmo 72:16

 MAGUNGGONAANKA ITI ISURSURO TI BIBLIA

Mabalin a panunotem a kasla arapaap laeng dagiti nabasam kadagiti immuna a panid daytoy a libro. Ngem inkari ti Dios a dandaninan aramiden dagita a panagbalbaliw ditoy daga, ken ilawlawag ti Biblia no kasanona nga aramiden dagita.

Saan la a dayta ti ilawlawag ti Biblia. Ibagana pay no ania dagiti masapul a maammuantayo tapno agbalintayo ita a pudpudno a naragsak ken matagiragsaktayo ti biag. Panunotem dagiti pagdandanagam. Mabalin a karaman iti dayta ti problema iti kuarta, sakit, wenno ipapatay ti maysa nga ipatpategmo. Matulongannaka ti Biblia tapno mapagballigiam dagita a problema, ken liwliwaennaka babaen ti panangsungbatna kadagiti saludsod a kas kadagitoy:

 Ti panangbasam iti daytoy a libro ipakitana a kayatmo a maammuan ti isursuro ti Biblia. Matulongannaka daytoy a libro. Adda dagiti saludsod para iti tunggal parapo a makatulong kenka a mangtarus nga ad-adda pay iti Biblia. Minilion a tattao ti maragragsakan a makipagadal iti Biblia kadagiti Saksi ni Jehova. Sapay koma ta kastaka met. Bendisionannaka koma ti Dios bayat nga ammuem dagiti isuro ti Biblia kenka!