Mapan iti linaonna

Mapan iti listaan dagiti linaonna

 KAPITULO 15

Ti Umiso a Pamay-an ti Panagdaydayaw iti Dios

Ti Umiso a Pamay-an ti Panagdaydayaw iti Dios

1. Asino ti makaibaga iti umiso a pamay-an ti panagdaydayaw iti Dios?

IBAGBAGA ti kaaduan a relihion nga isursuroda ti kinapudno maipapan iti Dios. Ngem imposible dayta ta naiduma unay ti isursuro dagiti relihion maipapan iti Dios ken no kasano ti rumbeng a panagdaydayawtayo kenkuana. Kasanotayo a maammuan ti umiso a pamay-an ti panagdaydayaw iti Dios? Ni laeng Jehova ti makaibaga no kasano ti rumbeng a panagdaydayawtayo kenkuana.

2. Kasanom a maammuan ti umiso a pamay-an ti panagdaydayaw iti Dios?

2 Inted ni Jehova ti Biblia tapno maammuantayo ti umiso a pamay-an ti panagdaydayaw kenkuana. Isu nga adalem ti Biblia, ket tulongannaka ni Jehova a mabenepisiaran kadagiti pannursurona ta ipatpategnaka unay.​—Isaias 48:17.

3. Ania ti kayat ti Dios nga aramidentayo?

3 Adda dagiti mangibagbaga nga awaten ti Dios ti amin a relihion, ngem saan a kasta ti insuro ni Jesus. Kinunana: “Saan a ti tunggal maysa nga agkuna kaniak, ‘Apo, Apo,’ makastrekto iti Pagarian ti langit, no di ket daydiay laeng mangar-aramid iti pagayatan ni Amak.” Isu a napateg nga adalentayo no ania ti pagayatan ti Dios ken aramidentayo dayta. Serioso a banag dayta ta dagidiay saan nga agtultulnog iti Dios ket impada ni Jesus iti maysa a kriminal, “nga agar-aramid iti dakes.”​—Mateo 7:21-23.

4. Ania ti imbaga ni Jesus maipapan iti panagaramid iti pagayatan ti Dios?

4 Pinakdaarannatayo ni Jesus a no kayattayo nga aramiden  ti pagayatan ti Dios, adda dagiti maipasango kadatayo a pakarigatan. Kinunana: “Sumrekkayo iti akikid a ruangan, gapu ta ti akaba a ruangan ken nalawa a dalan ket agturong iti pannakadadael, ket adu ti sumrek iti dayta; idinto ta ti akikid a ruangan ken nailet a dalan ket agturong iti biag, ket manmano ti makasarak iti dayta.” (Mateo 7:13, 14) Ti nailet a dalan, wenno ti umiso a pamay-an ti panagdaydayaw iti Dios, ket agturong iti biag nga agnanayon. Ti nalawa a dalan, wenno ti di umiso a pamay-an ti panagdaydayaw iti Dios, ket agturong iti ipapatay. Ngem saan a kayat ni Jehova a matay ti asinoman. Ik-ikkanna ti amin iti tsansa a mangam-ammo kenkuana.​—2 Pedro 3:9.

TI UMISO A PAMAY-AN TI PANAGDAYDAYAW ITI DIOS

5. Kasanom a mailasin dagiti agdaydayaw iti Dios iti umiso a pamay-an?

5 Imbaga ni Jesus a mailasintayo dagidiay agdaydayaw iti Dios iti umiso a pamay-an. Maaramidtayo dayta no adalentayo dagiti patpatien ken ar-aramidenda. Kinunana: “Mailasinyonto ida babaen iti bungada.” Innayonna: “Nasayaat ti bunga ti tunggal nasayaat a kayo.” (Mateo 7:16, 17) Saan a kayat a sawen daytoy a perpekto dagiti agdaydayaw iti Dios. Ngem ikagkagumaanda nga aramiden ti umiso. Adalentayo no ania ti makatulong tapno mailasintayo dagiti agdaydayaw iti Dios iti umiso a pamay-an.

6, 7. Apay a naibatay iti Biblia ti pudno a panagdaydayaw? Ania ti masursurotayo iti ehemplo ni Jesus?

6 Masapul a naibatay iti Biblia ti panagdaydayawtayo. Kuna ti Biblia: “Inwanwan ti Dios ti pannakaisurat ti intero a Kasuratan ken makagunggona dayta iti panangisuro, panangtubngar, panangilinteg iti bambanag, ken panangdisiplina para iti kinalinteg, tapno agbalin a naan-anay a kualipikado ti adipen ti Dios, a naan-anay a nakasagana para iti tunggal naimbag nga aramid.” (2 Timoteo 3: 16, 17) Insurat ni apostol Pablo kadagiti Kristiano: “Idi inawatyo ti sao ti Dios a nangngegyo kadakami, inawatyo dayta no ania a talaga dayta, saan a kas sao ti tattao no di ket kas sao ti Dios.” (1 Tesalonica 2:13) Iti laeng Sao ti Dios, ti Biblia, ti nakaibatayan ti pudno a panagdaydayaw, saan a kadagiti ideya dagiti tattao, tradision, wenno dadduma pay.

7 Naibatay iti Sao ti Dios ti amin nga insuro ni Jesus. (Basaen ti Juan 17:17.) Kanayon idi nga agkotar iti Kasuratan. (Mateo 4:4, 7, 10) Tultuladen dagiti pudno nga adipen ti Dios ti ehemplo ni Jesus ket ibasbasarda iti Biblia ti amin nga isursuroda.

8. Ania ti insuro ni Jesus maipapan iti panagdaydayaw ken Jehova?

8 Ni Jehova laeng ti masapul a dayawentayo. Kuna ti Salmo 83:18: “Sika, nga agnagan Jehova, sika laeng ti Kangatuan iti intero a daga.” Kayat ni Jesus a maammuan dagiti tattao no asino a talaga ti pudno a Dios, ken insurona kadakuada ti nagan ti Dios. (Basaen ti Juan 17:6.) Kinuna ni Jesus: “Ni laeng Jehova a Diosmo ti masapul a pagdayawam, ket isu laeng ti masapul a pangipaayam iti sagrado a panagserbi.” (Mateo 4:10) Isu a kas adipen ti Dios, tultuladentayo ni Jesus. Ni laeng Jehova ti daydayawentayo, us-usarentayo ti naganna, ken isursurotayo iti dadduma ti naganna ken no anianto ti aramidenna para kadatayo.

9, 10. Kasanotay nga ipakpakita ti ayattayo iti maysa ken maysa?

9 Masapul a napudno ti ayattayo kadagiti tattao. Insuro ni Jesus kadagiti adalanna nga agiinnayatda. (Basaen ti Juan 13:35.) Saan a napateg no sadino ti naggapuantayo, no ania ti kulturatayo, wenno no ania ti kasasaadtayo iti biag. Ti koma ayattayo iti maysa ken maysa ti mamagkaykaysa kadatayo nga agkakabsat. (Colosas 3:14) Dayta ti makagapu a saantayo a makigubat ken pumatay. Kuna ti Biblia: “Daytoy ti nalawag a nagdumaan ti annak ti Dios  ken ti annak ti Diablo: Saan a nagtaud iti Dios ti asinoman a saan nga agar-aramid iti kinalinteg, wenno uray daydiay saan nga agayat iti kabsatna.” Innayonna: “Masapul nga agiinnayattayo; saan a kas ken Cain, a nagtaud iti daydiay managdakdakes ket pinatayna ti kabsatna.”​—1 Juan 3:10-12; 4:20, 21.

10 Us-usarentayo ti panawen, pigsa, ken sanikuatayo tapno agtitinnulong ken agpipinnaregtatayo. (Hebreo 10:24, 25) ‘Agar-aramidtayo iti naimbag iti amin.’​—Galacia 6:10.

11. Apay nga awatentayo ni Jesus kas dalan nga agturong iti Dios?

11 Masapul nga agtulnogtayo ken Jesus ta isu ti dalan nga agturong iti Dios. Kuna ti Biblia: “Awan ti asinoman a mangyeg iti pannakaisalakan, ta awan ti sabali a nagan iti baba ti langit a naited kadagiti tattao a mabalin a pakaisalakanantayo.” (Aramid 4:12) Iti Kapitulo 5 daytoy a libro, naadaltayo nga imbaon ni Jehova ni Jesus tapno itedna ti biagna kas subbot para kadagiti natulnog a tattao. (Mateo 20:28) Pinili ni Jehova ni Jesus kas Ari a mangituray iti daga. Isu nga ibagbaga ti Biblia a masapul nga agtulnogtayo ken Jesus no kayattayo ti agbiag nga agnanayon.​—Basaen ti Juan 3:36.

12. Apay a saantayo a makiraman iti politika?

12 Masapul a saantayo a makiraman iti politika. Saan a nakiraman ni Jesus iti politika. Idi mauk-ukom, imbagana iti Romano nga agturay a ni Pilato: “Ti Pagariak ket saan a paset daytoy a lubong.” (Basaen ti Juan 18:36.) Kas ken Jesus, matalektayo iti nailangitan a Pagarian ti Dios isu a sadinoman ti paggigianantayo, saantayo a makiraman iti politika. Ngem ibilbilin ti Biblia nga agtulnogtayo “kadagiti nangatngato nga autoridad,” wenno gobierno. (Roma 13:1) Agtulnogtayo kadagiti linteg ti pagilian a pagnanaedantayo. Siempre, no maikontra ti maysa kadagita  iti linteg ti Dios, tuladentayo dagiti apostol a nangibaga: “Masapul nga agtulnogkami iti Dios kas agturay imbes a kadagiti tattao.”​—Aramid 5:29; Marcos 12:17.

13. Ania ti ikaskasabatayo maipapan iti Pagarian ti Dios?

13 Patientayo a ti Pagarian ti Dios ti kakaisuna a solusion kadagiti problema ti lubong. Imbaga ni Jesus a maikaskasabanto iti intero a lubong ti “naimbag a damag maipapan iti Pagarian.” (Basaen ti Mateo 24:14.) Awan ti gobierno ti tao a makaaramid kadagiti aramidento ti Pagarian ti Dios para kadatayo. (Salmo 146:3) Insuro ni Jesus nga ikararagtayo ti Pagarian ti Dios idi imbagana: “Umay koma ti Pagariam. Maaramid koma ti pagayatam ditoy daga, a kas sadi langit.” (Mateo 6:10) Ibaga ti Biblia a dadaelento ti Pagarian ti Dios ti amin a gobierno ti tao ket “daytanto laeng ti agtalinaed iti agnanayon.”​—Daniel 2:44.

14. Para kenka, siasino dagiti agdaydayaw iti Dios iti umiso a pamay-an?

14 Kalpasan a naadalmo dagitoy a punto, isaludsodmo iti bagim: ‘Siasino ti mangibasbasar kadagiti pannursuroda iti Biblia? Siasino ti mangipakpakaammo iti nagan ti Dios? Siasino dagiti pudpudno nga agiinnayat ken mamati a ni Jesus ket imbaon ti Dios tapno maisalakantayo? Siasino ti saan a makiramraman iti politika? Siasino ti mangikaskasaba a ti laeng Pagarian ti Dios ti makasolbar kadagiti problematayo?’ Dagiti laeng Saksi ni Jehova.​—Isaias 43:10-12.

ANIA TI ARAMIDEM?

15. Ania ti masapul nga aramidentayo no kayattayo nga awaten ti Dios ti panagdaydayawtayo?

15 Saan nga umanay a basta mamatitayo nga adda Dios. Uray dagiti demonio, mamatida nga adda Dios ngem saanda nga agtultulnog kenkuana. (Santiago 2:19) No kayattayo nga awaten ti Dios ti panagdaydayawtayo, saantay  laeng koma a patien nga adda Dios no di ket aramidentayo pay ti ibagbagana.

16. Apay a masapul a tallikudantayo ti ulbod a relihion?

16 Tapno awaten ti Dios ti panagdaydayawtayo, masapul a tallikudantayo ti ulbod a relihion. Insurat ni propeta Isaias: “Rummuarkayo iti tengngana, pagtalinaedenyo a nadalus ti bagiyo.” (Isaias 52:11; 2 Corinto 6:17) Dayta ti rason a masapul nga adaywantayo ti aniaman a konektado iti ulbod a relihion.

17, 18. Ania ti “Babilonia a Dakkel,” ken apay a masapul a panawam a dagus dayta?

17 Ania ti ulbod a relihion? Aniaman a relihion a mangisursuro a dayawentayo ti Dios iti pamay-an a maikontra iti Saona. “Babilonia a Dakkel” ti awag ti Biblia iti amin nga ulbod a relihion. (Apocalipsis 17:5) Apay? Kalpasan ti Layus idi panawen ni Noe, nangrugi ti adu nga ulbod a narelihiosuan a sursuro iti siudad ti Babilonia. Nagsaknap dagita nga ulbod a sursuro iti intero a daga. Kas pagarigan, agdaydayaw idi dagiti taga-Babilonia kadagiti grupo ti tinallo a dios. Adu met a relihion ita ti mangisursuro a ti Dios ket Trinidad, ngem nalawag nga isursuro ti Biblia a maymaysa laeng ti pudno a Dios, ni Jehova, ken ni Jesus ti Anakna. (Juan 17:3) Mamati met dagiti taga-Babilonia nga adda paset ti bagi ti maysa a tao nga agtultuloy nga agbiag kalpasan a matay ti bagi ken mabalin a matutuok dayta iti impierno. Saan a pudno dayta.​—Kitaen ti Endnote 14, 17, ken 18.

18 Impakpakauna ti Dios a dandanin madadael ti amin nga ulbod a relihion. (Apocalipsis 18:8) Maawatam kadin no apay a masapul a panawam a dagus ti ulbod a relihion? Kayat ni Jehova a Dios nga aramidem dayta sakbay a maladaw ti amin.​—Apocalipsis 18:4.

No agserbika ken Jehova a kadua ti ilina, agbalinka a paset ti sangalubongan a pamilia

19. No piliem ti agserbi ken Jehova, kasanonaka nga aywanan?

19 No piliem a panawan ti ulbod a relihion ket agserbika  ken Jehova, mabalin nga adda dagiti gagayyem ken kapamiliam a saan a makaawat iti desisionmo, ket posible a marigatanka gapu iti dayta. Ngem saannaka a baybay-an ni Jehova. Agbalinka a paset ti sangalubongan a pamilia a buklen ti minilion a tattao a pudpudno nga agiinnayat, ken maaddaanka iti namnama nga agbiag nga agnanayon iti baro a lubong ti Dios. (Marcos 10:28-30) Mabalin a dadduma kadagiti gagayyem ken kapamiliam a nangkontra iti desisionmo nga agserbi ken Jehova ket agdesisionto met nga agadal iti Biblia.

20. Apay a nakapatpateg nga agdaydayawka iti Dios iti umiso a pamay-an?

20 Dandanin dadaelen ti Dios ti amin a kinadakes ket ti Pagarianna ti mangiturayton iti daga. (2 Pedro 3:9, 13) Nakamaymayatto dayta a tiempo! Agdaydayawton ti amin ken Jehova iti pamay-an a kayatna. Isu a nakapatpateg nga agtignayka itan ket agdaydayawka iti Dios iti umiso a pamay-an.