Mapan iti linaonna

Mapan iti listaan dagiti linaonna

 KAPITULO 10

Ti Kinapudno Maipapan Kadagiti Anghel

Ti Kinapudno Maipapan Kadagiti Anghel

1. Apay nga adalentayo ti maipapan kadagiti anghel?

KAYAT ni Jehova a maam-ammotayo ti pamiliana. Dagiti anghel ket miembro ti pamilia ti Dios. Iti Biblia, naawaganda kas “annak ti Dios.” (Job 38:7) Ania ti ar-aramiden dagiti anghel? Kasano a tinulonganda dagiti tattao iti napalabas? Ken matulongandatayo ngata ita?​—Kitaen ti Endnote 8.

2. Nagtaudan dagiti anghel? Mano nga anghel ti naparsua?

2 Masapul a maammuantayo no nagtaudan dagiti anghel. Mabasa iti Colosas 1:16 a kalpasan a pinarsua ni Jehova ni Jesus, “naparsua ti amin a dadduma pay a bambanag idiay langit ken ditoy daga.” Karaman dagiti anghel iti dayta. Mano nga anghel ti naparsua? Ibaga ti Biblia a ginasut a milion ti bilang dagiti anghel.​—Salmo 103:20; Apocalipsis 5:11.

3. Ania ti ibagbaga ti Job 38:4-7 maipapan kadagiti anghel?

3 Isursuro met ti Biblia a pinarsua ni Jehova dagiti anghel sakbay nga inaramidna ti daga. Ania ti nariknada idi nakitada ti daga? Ibaga ti libro a Job a nakaragragsakda. Maysada a nadekket a pamilia nga agserserbi ken Jehova.​—Job 38:4-7.

TULTULONGAN DAGITI ANGHEL DAGITI ADIPEN TI DIOS

4. Apay a maibagatayo nga interesado dagiti anghel kadagiti tattao?

4 Idi pay un-unana, interesadon dagiti anghel kadagiti tattao ken iti panggep ni Jehova iti daga ken kadagiti  tattao. (Proverbio 8:30, 31; 1 Pedro 1:11, 12) Naladingitanda la ketdi idi nagrebelde da Adan ken Eva. Ad-adda manen a maladingitanda ita a makakitkita nga agsuksukir ken Jehova ti kaaduan a tattao. Ngem no adda agbabawi ken agsubli iti Dios, nakaragragsak dagiti anghel. (Lucas 15:10) Interesado unay dagiti anghel kadagiti agserserbi iti Dios. Us-usaren ni Jehova dagiti anghelna tapno tulongan ken protektaranna dagiti adipenna ditoy daga. (Hebreo 1:7, 14) Kitaentayo ti sumagmamano a pagarigan.

“Nangibaon ti Diosko iti anghelna a nangkaem iti ngiwat dagiti leon.”​—Daniel 6:22

5. Kasano a tinulongan dagiti anghel dagiti adipen ti Dios iti napalabas?

 5 Nangibaon ni Jehova iti dua nga anghel a tumulong ken Lot ken iti pamiliana tapno saanda a mairaman iti pannakadadael dagiti siudad ti Sodoma ken Gomorra. (Genesis 19:15, 16) Ginasut a tawen kalpasanna, naipisok ni propeta Daniel iti rukib dagiti leon, ngem saan a naan-ano ta ‘nangibaon ti Dios iti anghelna a nangkaem iti ngiwat dagiti leon.’ (Daniel 6:22) Idi naibalud ni apostol Pedro, nangibaon ni Jehova iti anghel a mangwayawaya kenkuana. (Aramid 12:6-11) Idi adda ni Jesus ditoy daga, tinulongan met dagiti anghel. Kas pagarigan, kalpasan a nabautisaran, ‘nagserserbi dagiti anghel kenkuana.’ (Marcos 1:13) Sakbay la unay a napapatay ni Jesus, maysa nga anghel ti ‘nangpabileg’ kenkuana.​—Lucas 22:43.

6. (a) Kasanotayo nga ammo a tultulongan dagiti anghel dagiti adipen ti Dios ita? (b) Ania dagiti saludsod a sungbatantayo?

6 Saanen nga agpakpakita dagiti anghel kadagiti tattao ita. Ngem us-usaren latta ida ti Dios tapno tulonganna dagiti adipenna. Ibaga ti Biblia: “Bambantayan ti anghel ni Jehova dagidiay agbuteng iti Dios, ket isalakanna ida.” (Salmo 34:7) Apay a kasapulantayo ti proteksion? Adda ngamin dagiti mannakabalin a kabusor a mayat a mangdangran kadatayo. Siasinoda? Naggapuanda? Kasanodatayo a padpadasen a dangran? Tapno masungbatan dagita a saludsod, kitaentayo ti napasamak di nagbayag kalpasan a naparsua da Adan ken Eva.

DAGITI DI MAKITA A KABUSORTAYO

7. Ania ti inaramid dagiti tattao gapu iti panangallilaw ni Satanas?

7 Naammuantayo iti Kapitulo 3 nga adda anghel a nagrebelde iti Dios ken kayatna nga iturayan ti dadduma. Satanas a Diablo ti awag ti Biblia kenkuana. (Apocalipsis 12:9) Kayat ni Satanas nga agrebelde pay ti dadduma iti  Dios. Naallilawna ni Eva ket sipud idin, naallilawna ti kaaduan a tattao. Ngem adda sumagmamano a nagtalinaed a matalek ken Jehova, kas kada Abel, Enoc, ken Noe.​—Hebreo 11:4, 5, 7.

8. (a) Kasano a nagbalin a demonio ti dadduma nga anghel? (b) Ania ti inaramid dagiti demonio tapno makalasatda iti Layus?

8 Idi tiempo ni Noe, adda dagiti anghel a nagrebelde ket pinanawanda ti langit a pagnanaedanda tapno agbalin a tao ditoy daga. Apay? Ibaga ti Biblia a kayatda ti mangasawa. (Basaen ti Genesis 6:2.) Ngem saan nga umiso nga aramiden dayta dagiti anghel. (Judas 6) Kas kadagita a dakes nga anghel, nagbalin a dakes ken naranggas ti kaaduan a tattao iti dayta a tiempo. Gapuna, nagdesision ni Jehova a dadaelenna dagiti managdakdakes babaen ti layus iti intero a daga. Ngem insalakanna dagiti matalek nga adipenna. (Genesis 7:17, 23) Nagsubli dagiti dakes nga anghel idiay langit tapno makalasatda. Awagan ti Biblia dagita a dakes nga anghel iti demonio. Pinilida ti makikadua iti panagrebelde ni Satanas, ket ti Diablo ti nagbalin nga agturay kadakuada.​—Mateo 9:34.

9. (a) Ania ti napasamak kadagiti demonio idi nagsublida idiay langit? (b) Ania ti sumaruno nga adalentayo?

9 Gapu ta nagrebelde dagiti demonio, saan idan nga inawat ni Jehova kas miembro ti pamiliana. (2 Pedro 2:4) Saanen a makapagbalin a tao dagiti demonio, ngem agtultuloy latta nga ‘al-allilawenda ti intero a mapagnaedan a daga.’ (Apocalipsis 12:9; 1 Juan 5:19) Adalentayo no kasanoda nga al-allilawen, wenno iyaw-awan, ti nakaad-adu a tattao.​—Basaen ti 2 Corinto 2:11.

NO KASANO NGA AL-ALLILAWEN DAGITI DEMONIO DAGITI TATTAO

10. Kasano nga al-allilawen dagiti demonio dagiti tattao?

10 Adu ti pamay-an dagiti demonio a mangallilaw kadagiti tattao. Mabalin a makisarita dagiti tattao kadagiti  demonio babaen ti direkta a pamay-an wenno babaen ti maysa a tao, kas iti albolario wenno espiritista. Maawagan dayta iti demonismo wenno espiritismo. Ngem ibilbilin ti Biblia nga adaywantayo ti aniaman nga adda koneksionna kadagiti demonio. (Galacia 5:19-21) Apay? No kasano nga agus-usar dagiti mangnganup iti silo tapno makaala kadagiti animal, agus-usar met dagiti demonio kadagiti pangallilaw tapno masiluan ken makontrolda dagiti tattao.​—Kitaen ti Endnote 26.

11. Ania ti panagpadles, ken apay a masapul a liklikantayo dayta?

11 Ti maysa a pangallilawda ket ti panagpadles. Panangusar dayta ti maysa a tao iti ekstraordinario a pannakabalin tapno maammuan ti masanguanan wenno ti banag a saan nga ammo. Kas pagarigan, kitaenna ti posision dagiti bituen, agbirok kadagiti pagilasinan, basaenna ti baraha (tarot card), agusar iti bola a kristal, wenno basaenna ti dakulap ti maysa a tao. Adu ti mangipapan nga awan pagdaksan dagitoy, ngem ti agpayso, nakapegpeggad dagita. Kas pagarigan, ipakita ti Biblia nga agtintinnulong dagiti demonio ken dagiti mammadles. Iti Aramid 16:16-18, mabasatayo ti maipapan iti ‘dakes nga espiritu a tumultulong iti panagbuyon’ tapno ‘makaipadles’ ti maysa a babai. Kalpasan a pinaruar ni apostol Pablo ti demonio, saanen a kabaelan ti babai nga ibaga ti mapasamak iti masanguanan.

12. (a) Apay a makadangran ti pannakisarita kadagiti natay? (b) Apay a saan a makiramraman dagiti adipen ti Dios kadagiti dinedemonio a kaugalian?

12 Adda pay sabali nga us-usaren dagiti demonio tapno maallilawda dagiti tattao. Kayatda a patientayo a posible a makasaritatayo dagiti natay, a talaga a sibibiagda iti sabali a lubong ken mabalin a makasarita wenno madangrandatayo. Kas pagarigan, ti maysa a natayan iti gayyem wenno kabagian ket mabalin nga umasideg iti maysa a tao, kas iti espiritista, a mangibagbaga a makasaritana dagiti natay.  Mabalin a makaibaga ti espiritista iti makapainteres maipapan iti natay a gayyem wenno kabagian ken matuladna pay ti boses ti natay. (1 Samuel 28:3-19) Adu met a kaugalian iti panagminatay ti naibatay iti patpatien a sibibiag dagiti natay iti sabali a lubong. Mabalin a karaman kadagita dagiti selebrasion kalpasan ti pumpon, tinawen a pananglagip iti natay, panagatang para iti natay, ritual a panagladingit dagiti nabalo, wenno dadduma a kaugalian iti pannakaimansayag ti natay. No saan a kayat dagiti Kristiano ti makiraman kadagiti kasta a kaugalian, mabalin nga uyawen, insultuen, wenno liklikan ida dagiti kapamilia wenno kalugaranda. Ngem ammo dagiti Kristiano a dagiti natay ket saan a sibibiag iti sabali a lugar. Imposible a makasaritatayo ida ken saandatayo a madangran. (Salmo 115:17) Agannadka ken saanmo a padasen ti makisarita kadagiti natay wenno kadagiti demonio ken saanka a makiraman kadagiti dinedemonio a kaugalian.​—Basaen ti Deuteronomio 18:10, 11; Isaias 8:19.

13. Ania ti naaramidanen dagiti tattao a mabutbuteng idi kadagiti demonio?

13 Saan laeng nga al-allilawen dagiti demonio dagiti tattao no di ket butbutngenda pay ida. Ammo ni Satanas ken dagiti demoniona nga ‘ababan ti tiempo’ a nabatbati sakbay nga ikkaten ida ti Dios ditoy daga, isu a narangranggas ken nauy-uyongda itan. (Apocalipsis 12:12, 17) Rinibu a tattao ti mabutbuteng idi kadagiti demonio ngem saan itan. Kasanoda a nawayawayaan iti butengda kadagiti demonio?

LABANAM KEN SUMINAKA KADAGITI DEMONIO

14. Kas kadagiti Kristiano idi umuna a siglo, kasanotayo a sumina kadagiti demonio?

14 Ibaga ti Biblia no kasanotayo a malabanan dagiti demonio ken no kasano ti sumina kadakuada.  Kas pagarigan, dadduma kadagiti taga-Efeso ti makisarsarita idi kadagiti demonio sakbay a naammuanda ti kinapudno. Kasanoda a simmina? Ibaga ti Biblia: “Adu a salamangkero ti nangummong kadagiti libroda sa pinuoranda dagita iti sanguanan ti amin a tattao.” (Aramid 19:19) Gapu ta kayatda ti agbalin a Kristiano, pinuoranda ti amin a libroda maipapan iti mahika. Kasta met ti masapul nga aramiden dagiti mayat nga agserbi ken Jehova ita. Masapul a perdienda ti amin a banag nga adda koneksionna kadagiti demonio. Karaman iti dayta dagiti libro, magasin, banag a konektado iti horoscope, pelikula, musika, ay-ayam, ken uray dagiti poster a mamagparang a makaparagsak wenno saan a makadangran dagiti mahika, demonio, wenno misterioso a banag. Karaman met iti dayta dagiti isusuot dagiti tattao nga ibilangda a mangprotektar kadakuada iti dakes.​—1 Corinto 10:21.

15. Ania pay ti masapul nga aramidentayo tapno malabanantayo ni Satanas ken dagiti demonio?

15 Sumagmamano a tawen kalpasan a pinuoran dagiti taga-Efeso dagiti libroda maipapan iti mahika, insurat ni apostol Pablo a masapul latta a labananda dagiti “dakes nga espiritu a puersa.” (Efeso 6:12) Wen, uray no pinuorandan dagiti libroda, kayat latta ida a dangran dagiti demonio. Isu nga ania pay ti masapul nga aramidenda? Imbaga kadakuada ni Pablo: “Alaenyo ti dakkel a kalasag ti pammati, tapno kabaelanyo a depdepen [wenno, pasardengen] ti amin nga umap-apuy a pana daydiay managdakdakes.” (Efeso 6:16) No kasano a ti kalasag protektaranna ti soldado iti gubat, protektarannatayo met ti pammatitayo. No naan-anay nga agtalektayo a protektarannatayo ni Jehova, malabanantayo ni Satanas ken dagiti demonio.​—Mateo 17:20.

16. Kasanotayo a mapabileg ti pammatitayo ken Jehova?

16 Kasanotayo a mapabileg ti pammatitayo ken Jehova?  Masapul nga inaldaw a basaentayo ti Biblia ken sursuruentayo ti agtalek a protektarannatayo ni Jehova. No nabileg ti panagtalektayo kenkuana, saannatay a madangran ni Satanas ken dagiti demonio.​—1 Juan 5:5.

17. Ania pay ti mangprotektar kadatayo manipud kadagiti demonio?

17 Ania pay idi ti masapul nga aramiden dagiti Kristiano idiay Efeso? Agnanaedda iti siudad a napno iti demonismo. Isu nga imbaga ni Pablo kadakuada: “Itultuloyyo ti agkararag . . . iti amin a tiempo.” (Efeso 6:18) Masapul nga ikararagda ken Jehova a protektaranna ida iti amin a tiempo. Datayo ngay? Agbibiagtayo met iti lubong a napno iti demonismo. Isu a kasapulantayo met a dawaten ken Jehova a protektarannatayo, ken masapul nga usarentayo ti naganna no agkararagtayo. (Basaen ti Proverbio 18:10.) No kanayontayo nga ikararag ken Jehova nga isalakannatayo manipud ken Satanas, denggennatayo.​—Salmo 145:19; Mateo 6:13.

18, 19. (a) Kasanotayo a malabanan ni Satanas ken dagiti demonio? (b) Ania a saludsod ti masungbatan iti sumaruno a kapitulo?

18 No ikkatentayo iti biagtayo ti amin a banag nga adda koneksionna iti demonismo ken agtalektayo a protektarannatayo ni Jehova, malabanantayo ni Satanas ken dagiti demonio. Saantayo a rumbeng a kabuteng ida. (Basaen ti Santiago 4:7, 8.) Adayo a nabilbileg ni Jehova ngem kadagiti demonio. Dinusana ida idi tiempo ni Noe, ken dadaelennanto ida iti masanguanan. (Judas 6) Laglagipem a saanka nga agmaymaysa. Us-usaren ni Jehova dagiti anghelna a mangprotektar kadatayo. (2 Ar-ari 6:15-17) Makapagtalektayo nga iti tulong ni Jehova, malabanantayo ni Satanas ken dagiti demonio.​—1 Pedro 5:6, 7; 2 Pedro 2:9.

19 Ngem no nakaro ti panangparparigat kadatayo ni Satanas ken dagiti demonio, apay a saan pay la ida a dadaelen ti Dios? Masungbatan dayta iti sumaruno a kapitulo.