Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Siasino Ita Dagiti Mangar-aramid iti Pagayatan ni Jehova?

 LEKSION 28

Ania ti Adda iti Website-mi?

Ania ti Adda iti Website-mi?

France

Poland

Russia

Imbaga ni Jesu-Kristo kadagiti pasurotna: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mateo 5:16) Gapu iti dayta, us-usarenmi a naimbag ti moderno a teknolohia, agraman ti Internet. Ti jw.org ket isu ti opisial a Website-mi. Naglaon daytoy kadagiti impormasion maipapan kadagiti patpatien ken aktibidad dagiti Saksi ni Jehova. Ania ti itamtampok daytoy?

Dagiti sungbat ti Biblia kadagiti gagangay a saludsod. Makitam sadiay dagiti sungbat ti sumagmamano kadagiti kapapatgan a saludsod dagiti tattao. Kas pagarigan, dagiti tract nga Agpatingganto Pay Ngata ti Panagrigrigat? ken Agbiagto Kadi Manen Dagiti Natay? ket mabasan iti website iti nasurok nga 600 a lenguahe. Naikabil met sadiay ti Baro a Lubong a Patarus iti nasurok a 130 a lenguahe ken ti sumagmamano a katulongan iti panagadal iti Biblia, a pakairamanan ti Ania a Talaga ti Isursuro ti Biblia? ken dagiti ka­udian a ruar Ti Pagwanawanan ken Agriingkayo! Adu kadagitoy a publikasion ti mabasa wenno mangngeg iti Internet wenno mabalin nga i-download iti MP3, PDF, wenno EPUB a format. Mabalinmo pay ketdi nga iyimprenta ti sumagmamano a panid ti publikasion a kayatmo nga ited kadagiti interesado a tattao iti bukodda a lenguahe! Adu met ti video para iti nagduduma a sign language. Mabalinmo ti agi-download kadagiti audio drama ti panagbasa iti Biblia, drama a naibatay iti Biblia, ken napipintas a musika.

Umiso nga impormasion maipapan kadagiti Saksi ni Jehova. Naikabil met iti Web site dagiti kaudian a damag ken video clip maipapan iti sangalubongan a trabahomi, dagiti pasamak a mangap-apektar kadagiti Saksi ni Jehova, ken ti panangsaranaymi kadagiti nadidigra. Adda met dagiti impormasion maipapan kadagiti mapaspasungad a kombension ken dagiti detalye no kasano a makontak dagiti sanga nga opisinami.

Babaen kadagitoy, isilsilnagmi ti lawag ti kinapudno uray kadagiti kasusulinekan a paset ti daga. Mabembenepisiaran dagiti tattao iti tunggal kontinente, a pakairamanan ti Antarctica. Ikarkararagmi a “ti sao ni Jehova agtultuloy nga agtignay a sipapardas” iti intero a daga, a pakaidayawan ti Dios.—2 Tesalonica 3:1.

  • Kasano a makatulong ti jw.org iti ad-adu pay a tattao a mangammo iti kinapudno a linaon ti Biblia?

  • Ania ti kayatmo a basaen iti website-mi?