Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agturturayen ti Pagarian ti Dios!

 KAPITULO 1

“Umay Koma ti Pagariam”

“Umay Koma ti Pagariam”

NAKAIPAMAYSAAN TI KAPITULO

No ania ti insuro ni Jesus maipapan iti Pagarian ti Dios

1, 2. Ania ti imbaga a mismo ni Jehova a nangngeg ti tallo kadagiti apostol ni Jesus? Ania ti reaksionda?

NO ADDA ipaaramid kenka ni Jehova a Dios, ania ti reaksionmo? Aniaman ti ipaaramidna, magagaranka kadi nga agtulnog? Sigurado a magagaranka!

2 Sumagmamano a panawen kalpasan ti Paskua idi 32 C.E., napadasan dayta ti tallo kadagiti apostol ni Jesus a da Pedro, Santiago, ken Juan. (Basaen ti Mateo 17:1-5.) Idi addada iti “nangato a bantay” a kadua ti Apoda, nasirmatada ni Jesus kas maysan a nadayag a nailangitan nga Ari. Kasla agpaypayso ti sirmata ta uray la inkagumaan ni Pedro ti makipaset iti dayta. Bayat nga agsasao ni Pedro, adda nabukel nga ulep iti ngatuenda. Kalpasanna, nangngegda ti mismo a timek ni Jehova—maysa a pribilehio a sumagmamano laeng ti nakapadas. Kalpasan a pinasingkedanna nga Anakna ni Jesus, kinuna ni Jehova: “Agimdengkayo kenkuana.” Tinungpal dagiti apostol dayta a bilin ti Dios. Impangagda dagiti pannursuro ni Jesus, ken indagadagda kadagiti dadduma nga aramidenda met dayta.—Ara. 3:19-23; 4:18-20.

Ad-adu ti insuro ni Jesus maipapan iti Pagarian ti Dios ngem iti aniaman a sabali pay a topiko

3. Apay a kayat ni Jehova nga imdengantayo ti Anakna? Ania a topiko ti nasayaat nga usigentayo?

3 Ti sasao nga “Agimdengkayo kenkuana,” a nailanad iti Biblia, ket pakagunggonaantayo. (Roma 15:4) Apay? Gapu ta ni Jesus ket pannakangiwat ni Jehova ken tunggal mangisuro ni Jesus, iranranudna no ania ti kayat ti Amana a maammuantayo. (Juan 1:1, 14) Yantangay ad-adu ti insuro ni Jesus maipapan iti Pagarian ti Dios—ti nailangitan a Mesianiko a gobierno a buklen ni Kristo Jesus ken ti 144,000 a makipagturay kenkuana—ngem iti aniaman a sabali a topiko, nasayaat no usigentayo a naimbag daytoy a napateg a topiko. (Apoc. 5:9, 10; 14:1-3; 20:6) Ngem usigentayo pay nga umuna no apay nga adu ti insuro ni Jesus maipapan iti Pagarian ti Dios.

“Ti Naruay iti Puso . . .”

4. Kasano nga impakita ni Jesus nga asideg iti pusona ti Pagarian?

4 Asideg iti puso ni Jesus ti Pagarian. Apay a maikunatayo dayta? Gapu ta mailasin iti sao ti linaon ti puso—kayatna a sawen, dagiti sasaotayo ipakitana no ania a talaga ti napateg kadatayo. Kinuna ni Jesus: “Ti naruay iti puso sawen ti ngiwat.” (Mat. 12:34) Tunggal adda gundaway, isarsarita ni Jesus ti maipapan  iti Pagarian. Nasurok a 100 a daras a nadakamat ti Pagarian iti uppat nga Ebanghelio. Kaaduan kadagita ket sinao ni Jesus. Ti Pagarian ti kangrunaan nga inkasabana. Kinunana: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:43) Uray idi napagungar ni Jesus, intultuloyna nga insarsarita ti maipapan iti Pagarian kadagiti adalanna. (Ara. 1:3) Sigurado nga iti puso ni Jesus, agliplippias ti apresasionna iti Pagarian ta uray la natignay a mangisarsarita iti dayta.

5-7. (a) Kasanotayo nga ammo nga asideg iti puso ni Jehova ti Pagarian? Iyilustraryo. (b) Kasanotay a maipakita nga asideg iti pusotayo ti Pagarian?

5 Asideg met iti puso ni Jehova ti Pagarian. Kasanotayo nga ammo? Laglagipem nga imbaon ni Jehova ti bugbugtong nga Anakna ditoy lubong; nagtaud ken Jehova ti amin a sinao ken insuro ti Anakna. (Juan 7:16; 12:49, 50) Nagtaud met ken Jehova ti amin a nailanad iti uppat nga Ebanghelio maipapan iti biag ken ministerio ni Jesus. Ania ti kayat a sawen dayta?

Nasayaat nga isaludsod ti tunggal maysa kadatayo, ‘Asideg kadi iti pusok ti Pagarian ti Dios?’

6 Panunotem nga agar-aramidka iti photo album ti pamiliayo. Nakaad-adu ti retratoyo ngem bassit laeng ti malaon ti album. Ania ti aramidem? Agpilika no ania ti ikabilmo. Umasping iti dayta, dagiti Ebanghelio ket kas iti photo album a pakakitaantayo iti maipapan ken Jesus. Saan a pinaltiingan ni Jehova dagiti nangisurat iti Ebanghelio a mangilanad iti amin a sinao ken inaramid ni Jesus ditoy daga. (Juan 20:30; 21:25) Imbes ketdi, inwanwan ida ti espiritu ni Jehova a mangisurat kadagiti sinao ken inaramid ni Jesus a tumulong kadatayo a mangtarus iti panggep ti ministerio ni Jesus ken no ania ti kapatgan ken ni Jehova. (2 Tim. 3:16, 17; 2 Ped. 1:21) Yantangay napno ti Ebanghelio kadagiti pannursuro ni Jesus maipapan iti Pagarian ti Dios, maikunatayo ngarud nga asideg ti Pagarian iti puso ni Jehova. Agasem—kayat ni Jehova a maammuantayo ti maipapan iti Pagarianna!

7 Nasayaat nga isaludsod ti tunggal maysa kadatayo, ‘Asideg kadi iti pusok ti Pagarian ti Dios?’ No wen, magagarantayo a mangipangag iti sinao ken insuro ni Jesus maipapan iti dayta a Pagarian—ti kinapategna ken no kasano ken kaano nga umay dayta.

“Umay Koma ti Pagariam”—Kasano?

8. Kasano a ginupgop ni Jesus ti kinapateg ti Pagarian?

8 Usigentayo ti modelo a kararag. Iti nabagas ken simple a sasao, ginupgop ni Jesus ti kinapateg ti Pagarian, nga impakitana no ania ti ibanag dayta. Naglaon dayta a kararag iti pito a dawat. Ti umuna a tallo ket maipapan iti panggep ni Jehova—ti pannakasantipikar ti naganna, ti iyaay ti Pagarianna, ken ti pannakaibanag ti pagayatanna ditoy daga kas sadi langit. (Basaen ti Mateo 6:9, 10.) Agkakanaig dagita a tallo a dawat. Ti Mesianiko a Pagarian ti usaren ni Jehova a mangsantipikar iti naganna ken mangibanag iti pagayatanna.

9, 10. (a) Kasano nga umay ti Pagarian ti Dios? (b) Ania a kari ti Biblia ti segseggaam a matungpal?

9 Kasano nga umay ti Pagarian ti Dios? No ikarkararagtayo nga, “Umay koma ti pagariam,” kidkiddawentayo nga agtignay  koman ti Pagarian. Inton umay ti Pagarian, naan-anayto ti panagturayna ditoy daga. Ikkatennanto ti agdama a dakes a sistema ti bambanag, a pakairamanan ti amin a gobierno ti tao, ken iyegnanto ti nalinteg a baro a lubong. (Dan. 2:44; 2 Ped. 3:13) Kalpasanna, iti sidong ti panagturay ti Pagarian, agbalinto a paraiso ti intero a daga. (Luc. 23:43) Mapagungarto dagidiay adda iti lagip ti Dios ket makaduadanto manen dagiti ing-ingungotenda. (Juan 5:28, 29) Agbalinto a perpekto dagiti natulnog a tattao ken agbiagdanto nga agnanayon. (Apoc. 21:3-5) Maaramidto met laengen ti pagayatan ni Jehova a Dios ditoy daga a kas sadi langit! Saanka kadi a magagaran a makakita iti pannakatungpal dagita a kari ti Biblia? Laglagipem a tunggal ikararagmo nga umay koma ti Pagarian ti Dios, ikarkararagmo a matungpal dagita nga agkakasayaat a kari.

10 Nalawag a saan pay nga ‘immay’ ti Pagarian ti Dios a mangitungpal iti modelo a kararag. Ngamin, agturturay pay laeng dagiti gobierno ti tao ken awan pay ti nalinteg a baro a lubong. Ngem adda naimbag a damag. Naipasdeken ti Pagarian ti Dios, kas maammuantayto iti sumaganad a kapitulo. Usigentayo ita ti kinuna ni Jesus no kaano a naipasdek ti Pagarian ken no kaano nga umay.

Kaano a Naipasdek ti Pagarian ti Dios?

11. Ania ti impasimudaag ni Jesus maipapan iti pannakaipasdek ti Pagarian ti Dios?

11 Impasimudaag ni Jesus a saan a maipasdek ti Pagarian idi kaaldawanna uray no dayta ti ninamnama ti dadduma kadagiti adalanna. (Ara. 1:6) Usigentayo ti dinakamatna iti dua nga agduma a pangngarigna, a ti maysa ket insalaysayna idi 31 C.E. ken ti maysa ket idi 33 C.E.

12. Kasano nga ipasimudaag ti pangngarig maipapan iti trigo ken dakes a ruot a saan a naipasdek ti Pagarian idi kaaldawan ni Jesus?

12 Ti pangngarig maipapan iti trigo ken dakes a ruot. (Basaen ti Mateo 13:24-30.) Kalpasan ti panangisalaysayna iti daytoy a pangngarig, nalabit idi umuna a paset ti 31 C.E., inlawlawag daytoy ni Jesus kadagiti adalanna. (Mat. 13:36-43) Daytoy ti kababagas ti pangngarig ken ti kaipapananna: Kalpasan ti ipapatay dagiti apostol, agimula ti Diablo kadagiti dakes a ruot (sinsinan Kristiano) iti nagbabaetan dagiti trigo (“annak ti pagarian,” wenno napulotan a Kristiano). Agpada a mabaybay-an a dumakkel dagiti trigo ken dakes a ruot iti panawen ti idadakkel nga agtultuloy agingga iti panagani, nga isu ti “panungpalan ti sistema ti bambanag.” Kalpasan ti panangrugi ti panagani, maummong dagiti dakes a ruot sa maurnong dagiti trigo. No kasta, ipasimudaag ti pangngarig a ti Pagarian ket saan a naipasdek idi kaaldawan ni Jesus, no di ket inton agpatingga ti panawen ti idadakkel. Kas ipakita dagiti pasamak, nagpatinggan ti panawen ti idadakkel ket nangrugi ti panawen ti panagani idi 1914.

13. Kasano nga impakita ni Jesus nga isu ket saan a dagus a maitrono kas Mesianiko nga Ari kalpasan ti panagsublina idiay langit?

13 Ti pangngarig maipapan kadagiti mina. (Basaen ti Lucas 19:11-13.) Imbaga ni Jesus daytoy a pangngarig idi 33 C.E. bayat  ti ipapanna idiay Jerusalem iti maudi a gundaway. Impapan ti dadduma kadagiti dumdumngeg kenkuana nga ipasdekna ti Pagarianna apaman a makasangpet idiay Jerusalem. Tapno mailinteg dayta a kapanunotan ken tapno ipakitana a mabayag pay a maipasdek ti Pagarian, inyarig ni Jesus ti bagina iti “maysa a tao a natan-ok ti pannakayanakna” nga agdaliasat “iti adayo a daga tapno gumun-od iti naarian a pannakabalin.” * Iti kasasaad ni Jesus, ti “adayo a daga” ket idiay langit, a pangawatanna iti pannakabalin kas Ari a dinutokan ti Amana. Ngem ammo ni Jesus nga isu ket saan a dagus a maitrono kas Mesianiko nga Ari kalpasan ti panagsublina idiay langit. Imbes ketdi, agtugaw iti makannawan ti Dios ken aguray agingga iti naituding a tiempo. Kas ipakita dagiti pasamak, ginasut a tawen a naguray ni Jesus.—Sal. 110:1, 2; Mat. 22:43, 44; Heb. 10:12, 13.

Kaano nga Umay ti Pagarian ti Dios?

14. (a) Kasano a sinungbatan ni Jesus ti saludsod dagiti uppat nga apostolna? (b) Ania ti ipalgak ti kaitungpalan ti padto ni Jesus maipapan iti kaaddana ken ti Pagarian?

14 Sumagmamano nga aldaw sakbay a napapatay ni Jesus, insaludsod ti uppat kadagiti apostolna: “Anianto ti pagilasinan ti kaaddam ken ti panungpalan ti sistema ti bambanag?” (Mat. 24:3; Mar. 13:4) Sinungbatan dayta ni Jesus babaen ti panangibagana iti detalyado a padto a nailanad iti Mateo kapitulo 24 ken 25. Imbinsabinsa ni Jesus dagiti pasamak iti lubong nga agserbi kas tanda ti periodo ti panawen a maawagan iti ‘kaaddana.’ Mangrugi ti kaaddana iti panawen a pannakaipasdek ti Pagarian;  ken agpatingga ti kaaddana inton umay ti Pagarian. Adu ti pammaneknek a matungtungpalen dayta a padto ni Jesus manipud pay idi 1914. * Gapuna, nangrugi ti kaaddana ken naipasdek ti Pagarian iti dayta a tawen.

15, 16. Siasino ti tuktukoyen ti sasao a “daytoy a kaputotan”?

15 Ngem kaano nga umay ti Pagarian ti Dios? Awan ti espesipiko a petsa nga imbaga ni Jesus. (Mat. 24:36) Ngem adda imbagana a mangipasigurado a nakaas-asidegen dayta. Impasimudaag ni Jesus nga umay ti Pagarian kalpasan a maimatangan “daytoy a kaputotan” ti kaitungpalan dagiti pagilasinan nga impakaunana. (Basaen ti Mateo 24:32-34.) Siasino ti tuktukoyen ti sasao a “daytoy a kaputotan”? Usigentayo a naimbag ti kinuna ni Jesus.

16 “Daytoy a kaputotan.” Dagiti kadi saan a manamati ti adda iti panunot ni Jesus? Saan. Kitaentayo no siasino dagiti dumdumngeg kenkuana. Insalaysay ni Jesus daytoy a padto iti sumagmamano nga apostol nga ‘immasideg kenkuana nga is-isuda.’ (Mat. 24:3) Mabiit idin a mapulotan dagiti apostol iti nasantuan nga espiritu. Usigentayo met ti konteksto. Sakbay nga imbagana ti maipapan iti “daytoy a kaputotan,” kinuna ni Jesus: “Ita agsursurokayo manipud iti kayo a higos kas maysa a pangngarig iti daytoy a punto: Apaman a ti kabbaro a sangana gumanus ken mangpataud iti bulbulong, ammoyo a ti kalgaw asidegen. Kasta met a dakayo, inton makitayo dagitoy amin a banag, ammuenyo nga isu asidegen kadagiti ruangan.” Dagiti napulotan a pasurot ni Jesus—saan a dagiti di manamati—ti makakita kadagiti banag nga impadtona ken makatarus iti kaipapanan dagita, a ni Jesus ket “asidegen kadagiti ruangan.” Gapuna, idi imbaga ni Jesus ti maipapan iti “daytoy a kaputotan,” dagiti napulotan a pasurotna ti adda iti panunotna.

17. Ania ti kayat a sawen ti sasao a “kaputotan” ken “amin dagitoy a banag”?

17 “Saanto a pulos lumabas agingga a mapasamak amin dagitoy a banag.” Kasano a matungpal daytoy? Tapno masungbatantayo, nasken nga ammuentayo ti dua a banag: ti kaipapanan ti “kaputotan” ken ti “amin dagitoy a banag.” Iti Biblia, ti sao a “kaputotan” masansan a tukoyenna dagiti tattao a nagduduma ti edadna a naginnabut iti maymaysa a periodo ti panawen. Ti maysa a kaputotan ket saan a napaut unay, ken adda patinggana. (Ex. 1:6) Ti sasao nga “amin dagitoy a banag” ramanenna ti amin a pasamak a naipadto kabayatan ti kaadda ni Jesus, a mangrugi iti 1914 agingga iti panagpatinggana inton “dakkel a rigat.”—Mat. 24:21.

18, 19. Kasanotayo a tarusan ti sasao ni Jesus maipapan iti “daytoy a kaputotan”? Ania ti konklusiontayo?

18 Kasanotayo ngarud a tarusan ti sasao ni Jesus maipapan iti “daytoy a kaputotan”? Daytoy a kaputotan ket buklen ti dua a grupo dagiti napulotan a naginnabut ti biagda—umuna, dagiti napulotan a nakakita iti panangrugi ti kaitungpalan ti pagilasinan idi 1914, ken ti maikadua, dagiti napulotan a nakainnabut ti umuna a grupo. Addanto sumagmamano iti maikadua a  grupo a makakita iti panangrugi ti dakkel a rigat. Daytoy dua a grupo ket maibilang a maysa a kaputotan gapu ta naginnabut ti biagda iti sumagmamano a panawen kas napulotan a Kristiano. *

19 Ania ngarud ti konklusiontayo? Bueno, ammotayo a ti pagilasinan ti kaadda ni Jesus kas agturay iti Pagarian ket silalawag a mapaspasamak iti intero a lubong. Makitkitatayo met a dagiti napulotan a sibibiag pay laeng ken paset “daytoy a kaputotan” ket natataenganen; ngem saanda a matay amin sakbay a mangrugi ti dakkel a rigat. Gapuna, maikunatayo a talaga a nakaas-asidegen nga umay ti Pagarian ti Dios ket agturayton iti intero a daga! Anian a makaparagsak a makita ti kaitungpalan ti kararag nga insuro kadatayo ni Jesus nga: “Umay koma ti pagariam”!

20. Ania a napateg a topiko ti mailawlawag iti daytoy a publikasion? Ania ti mausig iti sumaganad a kapitulo?

20 Ditay koma liplipatan dagiti imbaga a mismo ni Jehova manipud langit maipapan iti Anakna: “Agimdengkayo kenkuana.” Kas pudno a Kristiano, magagarantayo a mangipangag iti dayta a bilin ti Dios. Interesadotayo unay iti amin nga imbaga ken insuro ni Jesus maipapan iti Pagarian ti Dios. Mailawlawag iti daytoy a publikasion dagiti napateg a topiko maipapan kadagiti naibanagen daytoy a Pagarian ken dagiti aramidennanto iti masanguanan. Mausig iti sumaganad a kapitulo dagiti makaparagsak a pasamak maipapan iti pannakaipasngay ti Pagarian ti Dios idiay langit.

^ par. 13 Ti pangngarig ni Jesus mabalin nga impalagipna kadagiti dumdumngeg ti maipapan ken ni Arquelao, nga anak ni Herodes a Dakkel. Sakbay a natay ni Herodes, dinutokanna ni Arquelao kas sumaruno nga agturay iti Judea ken iti dadduma pay a lugar. Ngem sakbay a nangrugi nga agturay ni Arquelao, masapul nga agbiahe iti adayo nga agpa-Roma tapno dumawat iti pammalubos ni Augusto Cesar.

^ par. 14 Para iti kanayonan nga impormasion, kitaenyo ti kapitulo 9 ti libro nga Ania a Talaga ti Isursuro ti Biblia?

^ par. 18 Ti siasinoman a napulotan kalpasan ti ipapatay ti maudi kadagiti napulotan iti umuna a grupo—kayatna a sawen, kalpasan dagidiay nakasaksi iti “pangrugian dagiti ut-ot ti panagrigat” idi 1914—ket saan a paset “daytoy a kaputotan.”—Mat. 24:8.