Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agturturayen ti Pagarian ti Dios!

Surat ti Bagi a Manarawidwid

Surat ti Bagi a Manarawidwid

Patgenmi a Pada nga Agibumbunannag iti Pagarian:

PANUNOTEM a maysaka a miembro ti pamilia ti Bethel iti Brooklyn iti agsapa ti Biernes, Oktubre 2, 1914. Addaka iti naituding a tugawmo iti siled a panganan ket ur-urayenyo ni Kabsat C. T. Russell. Idi kuan, naglukat ti ridaw ket simrek ni Kabsat Russell. Nagsardeng iti apagbiit, kas iti dati nga ar-aramidenna, ket siraragsak a kinablaawanna ti pamilia ti Bethel iti “Naimbag a bigatyo amin.” Ngem imbes a mapan a dagus iti tugawna, nagpalakpak ken sigagagar nga impakaammona: “Nagpatinggan ti Panawen dagiti Gentil; nalpasen ti al-aldaw dagiti arida!” Dimo masbaalan ti ragsakmo—nabayagen a padpadaanam daytoy a kanito! Nagpaut ti palakpakmo kasta met ti intero a pamilia ti Bethel gapu iti dayta a makapagagar a damag.

 Adu a dekadan ti napalabas manipud idi imbaga dayta ni Kabsat Russell. Ania ti naibanagen ti Pagarian manipud idi? Nakaad-adun! Babaen ti Pagarian, agtultuloy a guggugoran ken sansanayen ni Jehova ti ilina—nga agdagup laeng iti sumagmamano a ribu idi 1914 ngem itan ket nasuroken a pito ket kagudua a milion. Kasanoka a nagunggonaan iti kasta a pannakasanay?

Ita, masansan nga ibagbaga dagiti kakabsat nga, “Agtultuloy nga umab-abante ti nailangitan a karuahe ni Jehova!” ket pudno dayta. Ngem iti kinapudnona, idi pay 1914 a nakaparpartak ti panagabante ti nailangitan a karuahe, a mangirepresentar iti di makita a paset ti organisasion ni Jehova, kas makitatayo no basaentayo a naimbag daytoy a publikasion. Tapno maikasaba ti naimbag a damag iti intero a lubong, nagusar dagiti agibumbunannag iti Pagarian iti nagduduma a pamay-an, a pakairamanan dagiti pagiwarnak, plakard, pelikula, testimony card, ponograpo, radio, ken uray ti Internet.

Gapu ta bembendisionan ni Jehova ti trabahotayo, makaipabpablaaktayon kadagiti makaawis a literatura a naibatay iti Biblia iti nasurok nga 670 a lengguahe ken iwarwarastayo dagita nga awan bayadna. Adda met dagiti managsakripisio a boluntario a tumultulong iti panagibangon kadagiti Kingdom Hall, Assembly Hall, ken pasilidad ti sangay, kadagiti man nabaknang wenno limitado ti sanikuana a pagilian. No adda mapasamak a didigra, tumulong a dagus dagiti naayat a kakabsat kadagiti nadidigra, a mangipakita nga isuda ket pudno a kakabsat a ‘nayanak no adda rigat.’—Prov. 17:17.

No dadduma, rirriribukendatayo dagiti klero ken dadduma pay a bumusbusor babaen ti panangusarda iti linteg, ngem makapabileg a makita a gapu kadagita nga ar-aramidenda, masansan nga ad-adda a maiwaragawag ti “naimbag a damag.”—Sal. 94:20; Fil. 1:12.

Ibilangmi a pribilehio ti makikadua kadakayo a padami a “katulong.” Kayatmi a maammuanyo nga ay-ayatendakayo unay. Ikarkararagmi a ti linaon daytoy a publikasion ket makatulong kadakayo nga ad-adda a mangipateg iti naespirituan a tawidyo.—Mat. 24:45.

Awatenyo ti nabara a kablaawmi,

Dagiti kakabsatyo,

Bagi a Manarawidwid Dagiti Saksi ni Jehova