Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Agturturayen ti Pagarian ti Dios!

 KAPITULO 22

Itungtungpal ti Pagarian ti Pagayatan ti Dios Ditoy Daga

Itungtungpal ti Pagarian ti Pagayatan ti Dios Ditoy Daga

NAKAIPAMAYSAAN TI KAPITULO

Itungpal ti Pagarian ti amin a kari ti Dios mainaig iti sangatauan ken iti daga

1, 2. (a) Apay a narigat a panunoten no dadduma nga agpaypayso ti Paraiso? (b) Ania ti tumulong a mangpabileg iti pammatitayo kadagiti kari ti Dios?

NAKIGIMONG ti matalek a kabsat a lalaki kalpasan ti makabannog nga aldaw. Inungtan ti istrikto nga amona, nabannog a mangas-asikaso iti pamiliana, ken maladladingitan gapu ta masakit ni baketna. Ngem idi naipatokar ti panglukat a kanta, nabang-aran ken maragragsakan ta napan iti Kingdom Hall a kadua dagiti kapammatianna. Ti kanta ket maipapan iti namnama a biag iti Paraiso, a mangyaw-awis a panunotenna nga addan iti kasta a kasasaad. Kaay-ayona daytoy a kanta, ken bayat a kankantaenna a kadua ti pamiliana, napno ti pusona iti namnama.

2 Nariknam met kadi daytan? Adun ti nakarikna iti kasta. Ngem di mailibak a gapu iti kasasaad ti biag iti daytoy daan a sistema, kasla saan nga agpaypayso ti Paraiso kadatayo. Agbibiagtayo iti “napeggad a tiempo a narigat a pakilangenan,” ken saan a paraiso ti kasasaad ti lubong. (2 Tim. 3:1) Kasano nga agbalin a napaypayso kadatayo dayta a namnama? Kasanotay nga ammo a talaga nga asidegen nga iturayan ti Pagarian ti Dios ti intero a sangatauan? Usigentayo ti sumagmamano kadagiti impaipadto ni Jehova a nakita ti ilina a natungpal idi un-unana. Repasuentayo met ti kaitungpalan dagita ita ken ti dadduma pay nga umasping a padto. Kamaudiananna, bayat a mapatpatibker ti pammatitayo, usigentayo no kasano a matungpal dagita a padto iti masanguanan.

No Kasano a Tinungpal ni Jehova Dagiti Karina Idi Un-unana

3. Ania a kari ti nangliwliwa kadagiti Judio a nakautibo idiay Babilonia?

3 Panunotem ti kasasaad dagiti Judio a nakautibo idiay Babilonia idi maikanem a siglo B.C.E. Adu ti dimmakkel sadiay, a kas met laeng kadagiti dadakkelda, ken nakarigrigat ti biagda. Inuy-uyaw ida dagiti taga-Babilonia gapu iti pammatida ken Jehova. (Sal. 137:1-3) Adu a dekada a kumkumpet dagiti nasungdo a Judio iti daytoy a naraniag a namnama: Inkari ni Jehova nga isublina ti ilina iti bukodda a daga. Imbaga ni Jehova a nasayaatto ti kasasaad sadiay. Inyarigna pay ketdi ti pagsublianda a daga ti Juda iti hardin ti Eden, a maysa a paraiso! (Basaen ti Isaias 51:3.) Nalawag a naipaay dagitoy a kari a mangpatalged iti rikna ti ili ti Dios ken mangikkat iti panagduadua a mabalin nga adda iti  pusoda. Kasano? Usigentayo ti sumagmamano nga espesipiko a padto.

4. Kasano nga impasigurado ni Jehova kadagiti Judio a natalgeddanto iti dagada?

4 Kinatalged. Saan a literal a paraiso ti pagsublian dagiti nakautibo a Judio, no di ket iti adayo a daga a saan a napagnaedan iti 70 a tawen, ken manmano laeng kadakuada ti nakakita iti dayta. Adu idi ti leon kadagiti lugar a nadakamat iti Biblia, kasta met dagiti lobo, leopardo, ken dadduma pay a narungsot nga animal. Mabalin a panunoten ti maysa nga ulo ti pamilia, ‘Kasanok a masalakniban ti asawak ken dagiti annakmi? Dagiti ngay karnero ken dadduma pay a tarakenmi?’ Natural laeng dagita a pakaseknan. Ngem panunotem ti kari ti Dios a nailanad iti Isaias 11:6-9 ken no kasano a makaliwliwa dayta. (Basaen.) Babaen kadagita a naindaniwan a sasao, impasigurado ni Jehova kadagiti nakautibo a Judio a natalgeddanto agraman dagiti tarakenda. Agarabto ti leon iti garami, kayatna a sawen, saannanto a dangran dagiti tarakenda. Awanto ti pagbutngan dagiti matalek a Judio kadagiti narungsot nga animal. Inkari ni Jehova a natalgedto ti ilina iti daga ti Juda a pagsublianda, uray iti let-ang ken kabakiran.—Ezeq. 34:25.

5. Ania dagiti padto a nakatulong kadagiti nakautibo a Judio nga agtalek a siwawadwad nga ipaay ni Jehova dagiti kasapulanda?

5 Kinawadwad. Mabalin a ti dadduma pay a pakaseknanda ket, ‘Kabaelakto ngata a biagen ti pamiliak iti lugar a pagsublianmi? Paggiananminto ngay? Anianto ngata ti trabahok? Nasaysayaatto ngata ngem iti nadagsen a trabahok iti sidong dagiti nangkautibo kadakami?’ Sinungbatan ni Jehova dagita a saludsod babaen met laeng kadagiti padto. Inkari ni Jehova kadagiti natulnog nga adipenna a sigurado nga itednanto ti tudo a kasapulanda tapno mangpataud ti ‘daga iti bunga,’ kayatna a sawen, nawadwadto ti taraon. (Isa. 30:23) No maipapan iti pagtaengan ken makapnek a trabaho, inkari ni Jehova iti ilina: “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.” (Isa. 65:21, 22) Wen, nasaysayaatto ti biagda no idilig iti kasasaadda kas kautibo iti pagano a Babilonia. Ngem kasano ngay dagiti nakaro a parikutda—dagidiay makagapu a nakautiboda?

6. Ania a parikut iti salun-at ti nabayagen a sagsagabaen ti ili ti Dios, ken ania ti impanamnama ni Jehova kadagiti nakautibo a Judio?

6 Naespirituan a salun-at. Sakbay pay a nakautibo ti ili ti Dios, nabayagen a masakitda iti naespirituan. Babaen ken propeta Isaias, kinuna ni Jehova iti ilina: “Ti intero nga ulo masaksakit ti kasasaadna, ket ti intero a puso nakapsut.” (Isa. 1:5) Bulsek ken tulengda iti naespirituan ta saanda a kayat a denggen ti balakad ni Jehova ken saanda a kayat a kitaen ti panangiwanwanna. (Isa. 6:10; Jer. 5:21; Ezeq. 12:2) No kastanto manen ti problema dagiti Judio nga agsubli iti dagada, kasanoda nga agbalin a natalged? Saan ngata a nalakadanto manen a mapukaw ti anamong ni Jehova? Nagsayaat ti inkari ni Jehova: “Iti dayta nga aldaw sigurado a dagidiay tuleng mangngegdanto ti sasao ti libro, ket manipud  iti kinadaguyemyem ken manipud iti kinasipnget uray dagiti mata dagidiay bulsek makakitanto.” (Isa. 29:18) Wen, agasan ni Jehova iti naespirituan ti nadalusanen ken nagbabawi nga ilina. No la ket ta agtalinaedda a natulnog, iwanwan ken suruanna ida tapno agbiagda.

7. Kasano a natungpal dagiti kari ti Dios iti nakautibo nga ilina, ken apay a makapabileg dayta iti pammatitayo?

7 Tinungpal kadi ni Jehova dagiti karina? Makitatayo ti sungbat kadagiti napasamak iti napalabas. Dagiti Judio a nagsubli iti dagada ket naipaayan iti kinatalged, kinawadwad, ken kinasalun-at iti naespirituan. Kas pagarigan, sinalakniban ida ni Jehova kadagiti tattao iti aglawlawda a nabilbileg ken ad-adu ngem kadakuada. Saan a dinangran dagiti narungsot nga animal dagiti taraken dagiti Judio. Pudno a ti nakita dagiti Judio ket limitado laeng a kaitungpalan dagiti padto maipapan iti paraiso nga insurat dagiti lallaki a kas kada Isaias, Jeremias, ken Ezequiel. Ngem ti makapagagar a kaitungpalan a nakita idi ti ili ti Dios ket isu laeng ti kasapulanda iti daydi a tiempo. No usigentayo ti inaramid idi ni Jehova agpaay iti ilina, ad-adda a bumileg ti pammatitayo. No makapagagar dagita a damo ken limitado a kaitungpalan ti padto, kasanonto laengen ti dakdakkel a kaitungpalanna? Kitaentayo no ania ti inaramid ni Jehova para kadatayo ita.

No Kasano nga Inrugi ni Jehova a Tungpalen Dagiti Karina iti Kaaldawantayo

8. Ania a kita ti “daga” ti pagnanaedan ti ili ti Dios ita?

8 Ti ili ni Jehova ita ket saan a buklen dagiti tattao nga agnanaed iti maymaysa a literal a nasion. Imbes ketdi, dagiti napulotan a Kristiano ti mangbukel iti naespirituan a nasion, ti “Israel ti Dios.” (Gal. 6:16) Kaduada dagiti “sabsabali a karnero” iti naespirituan a “daga,” a pagdaydayawanda a sangsangkamaysa ken ni Jehova a Dios. Dayta a panagdaydayaw ti kapatgan iti biagda. (Juan 10:16; Isa. 66:8) Ania a kita ti “daga” ti inted kadatayo ni Jehova? Maysa a naespirituan a paraiso. Iti naespirituan a pamay-an, matungtungpal ditoy dagiti nagsayaat a kari ti Dios maipapan iti kasasaad ti Eden. Usigentayo ti sumagmamano a pagarigan.

9, 10. (a) Kasano a matungtungpal ita ti padto iti Isaias 11:6-9? (b) Ania ti pammaneknek nga adda talna iti nagbabaetan ti ili ti Dios?

9 Kinatalged. Iti padto a nailanad iti Isaias 11:6-9, adda nadeskribir a nagsayaat a kasasaad: Dagiti tattao ken dagiti tarakenda ket saan a mabuteng kadagiti narungsot nga animal ken dagiti narungsot nga animal ket saan met a mabuteng kadakuada. Matungtungpal kadi dayta ita iti naespirituan a pamay-an? Wen! Iti bersikulo 9, naammuantayo no apay a saanton a mangdangran wenno mangdadael dagita a parsua: “Agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” Agbalbaliw kadi dagiti animal gapu iti “pannakaammo ken Jehova”? Saan. Dagiti tattao ti agbalbaliw gapu ta naam-ammoda ti Kangatuan a Dios ken nasursuroda a tuladen dagiti kababalinna a mangitandudo iti talna. Dayta ti gapuna a mapalpaliiwtayo ita ti makaparegta a kaitungpalan dayta a padto iti naespirituan a paraisotayo. Iti sidong ti turay ti  Pagarian, masursuro dagiti pasurot ni Kristo nga iwaksi ti naranggas ken inaanimal a kababalin ket tagiragsakenda ti talna ken panagkaykaysa a kadua dagiti kakabsatda iti naespirituan.

10 Kas pagarigan, nailawlawag iti daytoy a publikasion ti maipapan iti neutral a takder dagiti Kristiano—ti Nainkasuratan a pakaibatayan ti pannakatarustayo ken ti pannakaidadanes a napasaran ti ili ti Dios gapu iti neutral a takderda. Saan kadi a nakaskasdaaw ta iti daytoy naranggas a lubong adda maysa a kalkalaingan ti kadakkelna a “nasion” dagiti tattao nga agkedked a makiraman iti aniaman a kinaranggas, uray no agpeggad ti biagda? Talaga a naisangsangayan daytoy a pammaneknek a tagtagiragsaken dagiti iturayan ti Mesianiko nga Ari ti panagkaykaysa a dineskribir ni Isaias! Imbaga ni Jesus a mailasin dagiti pasurotna babaen ti ayatda iti maysa ken maysa. (Juan 13:34, 35) Iti uneg ti kongregasion, siaanus nga us-usaren ni Kristo ti “matalek ken masirib nga adipen” a mangisuro iti amin a pudno a Kristiano nga agbalin a mannakikappia, naayat, ken naalumamay.—Mat. 24:45-47.

11, 12. Ania a kita ti bisin ti sagsagabaen ti lubong ita, ngem kasano a siwawadwad nga ipapaay ni Jehova ti kasapulan ti ilina?

11 Kinawadwad. Ti lubong ket mabisbisinan iti naespirituan. Impakdaar ti Biblia: “‘Adtoy! Adda um-umayen nga al-aldaw,’ kuna ti Soberano nga Apo Jehova, ‘ket mangipagtengakto iti nakaro a bisin iti daga, maysa a nakaro a bisin, saan nga iti tinapay,  ken waw, saan nga iti danum, no di ket iti panagdengngeg iti sasao ni Jehova.’” (Amos 8:11) Agbisbisin kadi met dagiti umili ti Pagarian ti Dios? Impakpakauna ni Jehova ti nagdumaan ti ilina ken dagiti bumusbusor kenkuana: “Dagiti bukodko nga adipen mangandanto, ngem dakayo agbisinkayto. Adtoy! Dagiti bukodko nga adipen uminumdanto, ngem dakayo mawawkayto. Adtoy! Dagiti bukodko nga adipen agrag-odanto, ngem dakayo agsagabakayto iti pannakaibabain.” (Isa. 65:13) Makitkitam kadi ti kaitungpalan dagita a sasao?

12 Ti panagayus dagiti naespirituan a probision a maaw-awattayo ket mayarig iti karayan a lumawlawa ken umad-adalem. Dagiti publikasiontayo a naibatay iti Biblia—kasta met dagiti audio ken video, gimong ken kombension, ken dagiti material a naipablaak iti Web site-tayo—ipakitana nga aglaylayus ti naespirituan a taraontayo idinto ta mabisbisinan ti lubong iti naespirituan. (Ezeq. 47:1-12; Joel 3:18) Saanka kadi a maragsakan a makakita a tungtungpalen ni Jehova dagiti karina nga ipaayna a siwawadwad dagiti kasapulam iti inaldaw? Sigsiguraduem kadi a regular ti pannanganmo iti lamisaan ni Jehova?

Dagiti kongregasion tulongannatayo a mapnek, agbalin a natalged, ken nasalun-at iti naespirituan

13. Ania ti nakitam a kaitungpalan ti kari ni Jehova a makakitanto dagiti bulsek ken makangngegto dagiti tuleng?

13 Naespirituan a salun-at. Iti intero a lubong, adu ita ti bulsek ken tuleng iti naespirituan. (2 Cor. 4:4) Ngem ag-agasan ida ni Kristo. Nakakitaka kadin iti bulsek a nakakita ken tuleng a nakangngeg? No adda ammom nga immawat iti umiso a pannakaammo maipapan iti kinapudno iti Sao ti Dios ken nangiwaksi kadagiti narelihiosuan a sursuro a nangbulsek ken namagbalin kadakuada a tuleng iti kinapudno, nakitamon ti kaitungpalan daytoy a kari: “Iti dayta nga aldaw sigurado a dagidiay tuleng mangngegdanto ti sasao ti libro, ket manipud iti kinadaguyemyem ken manipud iti kinasipnget uray dagiti mata dagidiay bulsek makakitanto.” (Isa. 29:18) Iti intero a lubong, tinawen a ginasut a ribu a tattao ti maag-agasan iti naespirituan. Tunggal tao a mangtallikud iti Babilonia a Dakkel ken makikadua kadatayo nga agdaydayaw iti naespirituan a paraiso ket pammaneknek a matungtungpal dagiti kari ni Jehova!

14. Ania ti utobentayo tapno bumileg ti pammatitayo?

14 Ti tunggal kapitulo daytoy a libro ket naglaon iti nabileg a pammaneknek nga inturong ni Kristo dagiti pasurotna iti pudpudno a naespirituan a paraiso iti daytoy tiempo ti panungpalan. Sapay koma ta itultuloytayo nga utoben ti adu a pamay-an a mabembendisionantayo ita iti dayta a paraiso. No aramidentayo dayta, agtultuloy a tumibker ti pammatitayo kadagiti kari ni Jehova iti masanguanan.

“Umay Koma ti Pagariam”

15. Apay a masiguradotayo nga agbalinto a paraiso ti daga?

15 Nabayagen a panggep ni Jehova a pagbalinen ti intero a daga a paraiso. Insaadna da Adan ken Eva iti paraiso ken binilinna ida a punnuenda ti daga kadagiti kaputotanda ken aywananda amin a parsua. (Gen. 1:28) Ngem tinulad da Adan ken Eva ni Satanas a  nagrebelde iti Dios isu a natawid dagiti kaputotanda ti kinaimperpekto, basol, ken ipapatay. Nupay kasta, saan a nagbaliw ti panggep ti Dios. Kanayon a matungpal ti saona. (Basaen ti Isaias 55:10, 11.) No kasta, masiguradotayo a mapnonto ti daga iti kaputotan da Adan ken Eva, ken iturayan ken aywanandanto dagiti parsua ni Jehova iti paraiso a daga. Iti dayta a tiempo, naan-anayton a matungpal dagiti padto a naited kadagiti nakautibo a Judio maipapan iti kasasaad ti biag iti paraiso! Usigentayo dagiti sumaganad a pagarigan.

16. Kasano a dineskribir ti Biblia ti kinatalged a tagiragsakentayto iti Paraiso?

16 Kinatalged. Literal a matungpalto a naan-anay ti makapagagar a kasasaad a nadeskribir iti Isaias 11:6-9. Natalgedton dagiti lallaki, babbai, ken ubbing sadinoman ti papananda ditoy daga. Saanton a mangdangran ti aniaman a parsua, tao man wenno animal. Panunotem ti panawen inton ti intero a planeta ket agbalin a pagtaengam, makalangoyka kadagiti karayan, danaw, ken baybay; maulim dagiti bantay; ken masawarmo dagiti nasamek a karuotan nga awan ti aniaman a pagbutngam. Awanton ti pagdanagam uray sumipngeten. Matungpalton ti Ezequiel 34:25, isu a ti ili ti Dios ket mabalinto pay ketdin nga ‘agnaed a sitatalged iti let-ang ken maturogda kadagiti bakir.’

17. Apay a masiguradotayo a siwawadwad nga ipaay ni Jehova dagiti kasapulantayo inton agturayen ti Pagarian iti intero a daga?

17 Kinawadwad. Panunotem ti tiempo nga awanton ti kinapanglaw, malnutrision, bisin, wenno dagiti programa ti gobierno a mangipaay iti tulong. Ti nawadwad a naespirituan a taraon a tagtagiragsaken ti ili ti Dios ita ipasiguradona a taraonanto ti Mesianiko nga Ari dagiti iturayanna iti amin nga aspeto. Idi adda ni Jesus ditoy daga, impakitana iti limitado a pamay-an a kabaelanna a tungpalen dagita a kari, ta pinakanna ti rinibu a tattao a mabisbisin babaen ti sumagmamano laeng a tinapay ken ikan. (Mat. 14:17, 18; 15:34-36; Mar. 8:19, 20) Inton agturayen ti Pagarian ti Dios iti intero a daga, literal a matungpalto dagiti padto a kas iti daytoy: “Itednanto ti tudo maipaay iti bin-im a dayta ti pangmulam iti daga, ken tinapay kas bunga ti daga, nga agbalinto a nataba ken nalanit. Dagiti dinguenmo agarabdanto iti dayta nga aldaw iti maysa a nalawa a pagaraban.”—Isa. 30:23.

18, 19. (a) Ania ti kaipapananna kenka ti padto iti Isaias 65:20-22? (b) Ania ti kayatna a sawen a ti al-aldawtayo ket agbalinto a “kas iti al-aldaw ti maysa a kayo”?

18 Para iti adu, kasla imposible ita ti maaddaan iti komportable a pagtaengan wenno nasayaat ken makapnek a trabaho. Iti daytoy dakes a sistema, marikna ti adu nga awan ti magangganabda ken ti pamiliada uray no ipapatida ti agtrabaho, idinto ta bumakbaknang latta dagiti nabaknang ken naagum. Panunotem ti kasasaad inton matungpal daytoy a padto iti intero a lubong: “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. Ta kas iti al-aldaw ti maysa a kayo kastanto ti al-aldaw ti ilik; ket ti aramid dagiti bukodda nga ima usarento a naan-anay dagidiay pinilik.”—Isa. 65:20-22.

 19 Ania ti kayatna a sawen a ti al-aldawtayo ket agbalinto a “kas iti al-aldaw ti maysa a kayo”? No agtakderka iti puon ti nakadakdakkel a kayo, saanka kadi a masdaaw bayat a pampanunotem no kasano kapauten ti biagna—nalabit nabayagen a naimula sakbay pay a nayanak ti apongmo iti tumeng? Mabalin a mapanunotmo a no agtalinaedka nga imperpekto, nabayagton a natayka ngem sibibiag ken saanto pay laeng a naan-ano dayta a kayo. Nakaim-imbag ni Jehova ta impasiguradona nga idiay Paraiso, ti al-aldawtayo, wenno ti biagtayo, ket napaut ken saanton a maan-ano! (Sal. 37:11, 29) Dumtengto ti aldaw nga uray dagiti kayo a napaut ti biagna ket kaslanto laengen iti ruot nga agtubo ken magango idinto ta saan nga agpatingga ti biagtayo!

20. Kasanonto a matagiragsak dagiti nasungdo nga iturayan ti Pagarian ti perpekto a salun-at?

20 Perpekto a salun-at. Iti daytoy a lubong, saantayo a maliklikan ti sakit ken ipapatay. Arigna nga addaantayo amin iti makapapatay a sakit, a maaw-awagan iti basol. Ti kakaisuna nga agas ket ti daton a subbot ni Kristo. (Roma 3:23; 6:23) Kabayatan ti Sangaribu a Tawen a Panagturay, dagiti tattao ket tulonganto ni Jesus ken dagiti makipagturay kenkuana a mabenepisiaran a naan-anay iti dayta a daton, ket in-inutto a maikkat nga interamente kadagiti matalek a tattao ti basol nga impatawid ni Adan. Naan-anayto a matungpal ti padto ni Isaias: “Awanto ti agtataeng nga agkuna: ‘Masakitak.’ Dagiti umili nga agnanaed iti daga isudanto dagidiay napakawan ti biddutda.” (Isa. 33:24) Panunotem ti panawen nga awanton ti bulsek, tuleng, wenno baldado. (Basaen ti Isaias 35:5, 6.) Awanto ti sakit a saan a kabaelan nga agasan ni Jesus—pisikal man, mental, wenno emosional. Matagiragsakton dagiti nasungdo nga iturayan ti Pagarian ti perpekto a salun-at!

21. Anianto ti mapasamak iti ipapatay, ken apay a maliwliwaka iti dayta?

21 Komusta met ti gagangay a pagtungpalan ti sakit, ti di maliklikan nga epekto ti basol—ti ipapatay? Daytoy ti ‘maudi a kabusor’ ti amin nga imperpekto a tattao, nga iti din agbayag ket awanton ti maaramidanna. (1 Cor. 15:26) Ngem ni kadi patay ket nabileg a kabusor ni Jehova? Imutektekanyo ti impadto ni Isaias: “Alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” (Isa. 25:8) Mailadawam kadi dayta? Awanton ti maipumpon, awanton ti sementerio, ken awanton ti aglua gapu iti ladingit! Maisupadi iti dayta, agluatayto gapu iti rag-o inton tungpalen ni Jehova ti makapagagar a karina a pagungarenna dagiti natay! (Basaen ti Isaias 26:19.) Aglunitto met laengen dagiti sugat nga inyeg ni patay.

22. Ania ti mapasamak inton maitungpalen ti Mesianiko a Pagarian ti pagayatan ti Dios ditoy daga?

22 Iti ngudo ti Milenio, naibanagton ti Pagarian ti pagayatan ti Dios ditoy daga, ket isublinton ni Kristo ti panagturay iti Amana. (1 Cor. 15:25-28) Ti sangatauan, a nagbalinen a perpekto, ket nakasaganan a mangsango iti maudi a pannubok inton maruk-atan ni Satanas manipud iti yuyeng. Kalpasanna, rumekenton ni  Kristo dayta a naulpit a serpiente ken ti amin a mangsupsuporta kenkuana. (Gen. 3:15; Apoc. 20:3, 7-10) Ngem amin a nasungdo a mangay-ayat ken ni Jehova ket addaan iti naraniag a masakbayan. Mabalin nga awanen ti sabali a balikas a makailadawan iti dayta malaksid iti sasao a nausar iti Biblia. Dayta ti kari nga amin a matalek ket maaddaan “iti nadayag a wayawaya ti annak ti Dios.”—Roma 8:21.

Itungpalto ti Pagarian ti amin a kari ni Jehova mainaig iti sangatauan ken iti daga

23, 24. (a) Apay a sigurado a matungpal dagiti kari ti Dios? (b) Ania ti determinado nga aramidem?

23 Dagita a kari ket saan laeng a basta namnama, arapaap, wenno tagtagainep. Sigurado a matungpal dagiti kari ni Jehova! Apay? Lagipem dagiti sasao ni Jesus nga inusigtayo iti umuna a kapitulo daytoy a libro. Insurona kadagiti pasurotna nga ikararagda ken ni Jehova: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mat. 6:9, 10) Ti Pagarian ti Dios ket saan laeng a parnuay ti imahinasion ti tao. Agpaypayso dayta ken agturturay itan idiay langit! Sangagasut a tawenen nga itungtungpalna dagiti kari ni Jehova kadagiti pamay-an a silalawag a makitatayo iti kongregasion Kristiano. No kasta, masiguradotayo a matungpalto amin a kari ni Jehova inton naan-anayen nga iturayan ti Pagarian ti Dios ti intero a daga!

24 Ammotayo nga umay ti Pagarian ti Dios. Ammotayo a matungpal amin a kari ni Jehova. Apay? Gapu ta AGTURTURAYEN TI PAGARIAN TI DIOS! Ngem ti saludsod a rumbeng a panunotentayo ket, ‘Iturturayannak kadi ti Pagarian?’ Aramidentayo koma ti amin a kabaelantayo nga agbiag kas nasungdo nga iturayan ti Pagarian itan, tapno mabenepisiarantayo iti perpekto ken nalinteg a turayna iti agnanayon!

Ammuem ti Ad-adu Pay

Pannakabalin a Mangisubli—Ni Jehova ‘Pagbalbalinenna a Baro ti Amin a Bambanag’

Insublin ni Jehova ti nasin-aw a panagdayaw. Ania pay ti isublina iti masanguanan?

Maaddaan iti Natibker a Pammati iti Pagarian

Inusar ni Jehova ti innem nga agsasaruno a tulag a mangipasigurado nga ibanag ti Pagarianna ti panggepna. Kasano a mapabileg ti pammatitayo gapu kadagitoy a tulag?